Jesu akoretwo akĩrutana na kũhonia andũ thĩinĩ wa Judea na Jerusalemu. Agacoka akaringa Rũĩ rwa Jorodani nĩguo akarutane kuuma itũũra rĩmwe nginya rĩrĩa rĩngĩ gĩcigo-inĩ kĩa Perea. No thutha wa kahinda, nĩ egũcoka Jerusalemu.

Arĩ kũu Perea, mũndũ ũmwe akamũũria: “Mwathani, hihi arĩa makahonokio nĩ anini?” No kũhoteke mũndũ ũcio nĩ oĩ ndeto iria atongoria a ndini makararanagĩria ciĩgiĩ kana andũ arĩa makaahonoka nĩ aingĩ kana nĩ anini. Jesu akagarũra ũhoro kuuma nĩ aigana makaahonoka, akarĩrĩria ũrĩa mũndũ abatiĩ gwĩka nĩguo akaahonoka. Akoiga: “Giginyanai mũno nĩguo mũtonyere mũromo ũrĩa mũceke.” Kwoguo kĩyo nĩ kĩrabatarania. Nĩkĩ hihi? Jesu agataarĩria akoiga: “Ngũmwĩra atĩrĩ, aingĩ nĩ makaageria gũtonya, no matikaahota.”​—Luka 13:​23, 24.

Jesu akoiga ũũ nĩguo atĩtĩrithie bata wa gwĩkĩra kĩyo: “Rĩrĩa mwene nyũmba agookĩra ahinge, inyuĩ mũkaarũgama nja mũkĩringaringa mũrango, mũkiugaga, ‘Mwathani, tũhingũrĩre.’ . . . No we nĩ akamwĩra atĩrĩ, ‘Niĩ ndiũĩ kũrĩa muumĩte. Njehererai inyuothe mwĩkaga maũndũ matarĩ ma ũthingu!’”​—Luka 13:​25-27.

Ũndũ ũcio ũronania ũrĩa gũgaathiĩ harĩ mũndũ ũrĩa ũgoka acereirũo, hihi mathaa marĩa arona marĩ mega nake, akore mũrango nĩ ũhingirũo. Agĩrĩirũo gũkinya tene, o na angĩkorũo ndarona ihinda rĩu rĩmwagĩrĩire. Ũguo no taguo kũrĩ harĩ andũ aingĩ arĩa mangĩagunĩkire kuumana na Jesu gũkorũo kũu akĩmaruta. Nĩ maagire kuoya mweke wa gũtua ũthathaiya wa ma ũndũ ũrĩa wa bata makĩria ũtũũro-inĩ. Andũ aingĩ arĩa Jesu atũmĩtwo kũrĩ o nĩ maregete gwĩtĩkĩra mũbango wa Ngai wa kũmahonokia. Jesu akoiga atĩ ‘makaarĩraga na makahagarania magego’ rĩrĩa magaikio nja. Ĩndĩ andũ “kuuma mwena wa irathĩro na ithũĩro na wa rũgongo na mũhuro,” ũguo nĩ kuuga kuuma ndũrĩrĩ ciothe, ‘nĩ magaikara thĩ metha-inĩ thĩinĩ wa Ũthamaki wa Ngai.’​—Luka 13:​28, 29.

Jesu akoiga atĩrĩ: “Na rĩrĩ, nĩ harĩ a thutha [ta arĩa matarĩ Ayahudi na Ayahudi arĩa monagwo matarĩ kĩene] magaatuĩka a mbere, na nĩ harĩ a mbere [atongoria a ndini arĩa meyonaga nĩ a bata nĩ ũndũ wa gũkorũo marĩ njiarũa cia Iburahimu] magaatuĩka a thutha.” (Luka 13:30) Magaakorũo marĩ “a thutha” na njĩra ya atĩ andũ ta acio matarĩ ngatho matigakorũo Ũthamaki-inĩ wa Ngai o na hanini.

Rĩu Afarisai amwe magoka kũrĩ Jesu, makamwĩra: “Uma gũkũ wĩthiĩre, tondũ Herode [Antipasi] nĩ arenda gũkũũraga.” No gũkorũo Mũthamaki Herode nĩwe wambĩrĩirie mũhuhu ũcio akĩenda Jesu ore oime gĩcigo kĩu. Kwahoteka aretigĩra gũtigathiĩ ũndũ anyite itemi harĩ kũũraga mũnabii ũngĩ, ta ũrĩa oragithirie Johana Mũbatithania. No Jesu akeera Afarisai acio: “Thiĩi mwĩre  mbwe ĩyo atĩrĩ, ‘Ngũingata ndaimono na honie andũ ũmũthĩ na rũciũ, na mũthenya wa gatatũ ngorũo ndĩkĩtie.’” (Luka 13:​31, 32) No kũhoteke Jesu agĩĩta Herode “mbwe,” aramũringithania na ũrĩa mbwe ikoragwo na waara. Ĩndĩ Jesu ndegwĩtĩkĩra Herode kana mũndũ ũngĩ o wothe amũhĩke kana amwĩre ũrĩa agĩrĩirũo gwĩka. Ekũruta wĩra ũrĩa aaheirũo nĩ Ithe akĩrũmĩrĩra mũtaratara wa Ngai no ti wa mũndũ.

Jesu agathiĩ na mbere na rũgendo rwake erekeire Jerusalemu tondũ o ta ũrĩa aroiga, “gũtingĩtuĩka atĩ mũnabii nĩ agĩrĩirũo kũũragĩrũo nja ya Jerusalemu.” (Luka 13:33) Nĩ kĩĩ kĩratũma Jesu arie ũhoro wa kũũragĩrũo itũũra-inĩ rĩu na gũtirĩ ũrathi wa Bibilia woigĩte atĩ no mũhaka Mesia angĩakuĩrĩire kũu? Tondũ Jerusalemu nĩrĩo itũũra rĩrĩa inene, kũrĩa igooti inene rĩa Sanhedrini rĩa acirithania 71 rĩkoragwo, na nĩkuo arĩa mathitangagwo atĩ nĩ anabii a maheeni macirithagĩrio. Makĩria ma ũguo, nĩkuo magongona ma nyamũ marutagĩrũo. Nĩ ũndũ ũcio, Jesu nĩ aramenya atĩ ndũngĩkorũo ũrĩ ũndũ mwagĩrĩru angĩũragĩrũo kũndũ kũngĩ.

Jesu arĩ na kĩeha akoiga ũũ: “Jerusalemu, Jerusalemu, wee ũragaga anabii na ũkahũũra na mahiga arĩa matũmagwo kũrĩ wee​—nĩ maita maigana ndanenda gũcokanĩrĩria ciana ciaku o ta ũrĩa ngũkũ ĩcokanagĩrĩria tũcui twayo rungu rwa mathagu mayo! No wee ndwendire ũndũ ũcio. Atĩrĩrĩ, nyũmba yanyu nĩ ĩtiganĩirio.” (Luka 13:​34, 35) Nĩ ũndũ wa rũrĩrĩ rũu kũrega Mũrũ wa Ngai, no mũhaka ruone moimĩrĩro!

Jesu atanakinya Jerusalemu, mũtongoria ũmwe wa Afarisai akamũnyita ũgeni gwake mũciĩ marĩanĩre mũthenya wa Thabatũ. Arĩa manyitĩtwo ũgeni makarora mone ũrĩa Jesu egwĩka mũndũ ũrĩ iruga-inĩ rĩu ũrwarĩte mũrimũ ũtũmĩte aimbe mwĩrĩ. Jesu akoria Afarisai acio na arutani a Watho atĩrĩ: “Watho nĩ wĩtĩkĩrĩtie kũhonania mũthenya wa Thabatũ kana ndwĩtĩkĩrĩtie?”​—Luka 14:3.

Gũkaga mũndũ ũgũcokia. Jesu akahonia mũndũ ũcio agacoka akamoria: “Nũ gatagatĩ-inĩ kanyu, ndegwa yake kana mũrũwe angĩgwa thĩinĩ wa gĩthima mũthenya wa Thabatũ, ũtangĩmũgucia o hĩndĩ ĩyo amũrute?” (Luka 14:5) O rĩngĩ makaremwo nĩ kũmũcokeria.