Jesus okwa kala nokuhonga nosho yo okuvelula ovanhu muJudea nomuJerusalem. Okwa li a tauluka omulonga waJordan opo a ka honge ovanhu moilando yomoshitukulwa shaPerea. Okwa li ta ka shuna kuJerusalem moule wefimbo lixupi.

Ofimbo Jesus e li muPerea, omulumenhu umwe okwe mu pula a ti: “Omwene, hano ovanini ashike tava xupifwa?” Otashi dulika omulumenhu oo a li e shii eenhamanana odo da li pokati kovawiliki vomalongelokalunga kutya vangapi tava ka xupifwa. Ponhele Jesus a popye kutya ovanhu vangapi tava ka xupifwa, okwa popya osho ve na okuninga opo va ka xupifwe. Okwa ti: “Kondjeni mwa mana mo mu pite moshivelo sha finana.” Omunhu okwa pumbwa okuninga eenghendabala nokukondja opo a pite moshivelo osho. Omolwashike mbela? Jesus okwa yelifa a ti: “Vahapu otava ka kendabala okuya mo ndele otava ka nyengwa.” — Lukas 13:23, 24.

Opo Jesus a yelife nawa kutya otwa pumbwa okukondja twa mana mo, okwa ti: “Ngeenge mwene weumbo okwa pate omuvelo, otamu ka kala pondje tamu konghola, tamu ti, ‘Omwene, tu yeulula.’ . . . Opo nee ota ka tya kunye, ‘Kandi mu shii kutya onye oolyelye. Djeni po pwaame, ovakolokoshi nye!’” — Lukas 13:25-27.

Efaneko olo ola faafanifwa nomulumenhu oo e uya kwa toka pefimbo olo e wete le mu wapalela kuye nokwa hanga omivelo da patwa. Okwa li e na okuuya diva nonande efimbo olo ka la li tali mu wapalele. Osho osha faafana naavo va li tava dulu okumona ouwa mehongo laJesus. Ova li va xutwifa omhito yokukala melongelokalunga lashili. Ovanhu ovo Jesus a li a tumwa kuvo kava li ve mu tambula ko e li efiloshisho laKalunga li na sha nexupifo. Jesus okwa ti otava ka “lilaana nokulikwesha komayoo” eshi tava ka ekelwa pondje. Ndele ovanhu vomoiwana aishe va “dja koushilo, kouninginino, kolundume nokolukadi,” otava “ka kala omutumba poshitaafula mOuhamba waKalunga.” — Lukas 13:28, 29.

Jesus okwe va lombwela a ti: “Ope na vaxuuninwa [ngaashi ovo vehe fi Ovajuda nOvajuda ovo va dinika] ovo tava ka ninga votete, nope na votete [Ovajuda ovo va fimanekwa molwaashi ve li oludalo laAbraham] ovo tava ka ninga vaxuuninwa.” (Lukas 13:30) Okukala “vaxuuninwa” osha hala kutya ovo vehe na olupandu itava ka ya mo mOuhamba waKalunga nandenande.

Ovafarisai vamwe ova li ve uya kuJesus ndele tave mu lombwele tava ti: “Fiya po onhele ei, molwaashi Herodes [Antipas] okwa hala oku ku dipaa.” Otashi dulika ohamba Herodes oyo ya li ya hovela okupopya oshinima sha tya ngaho opo i ningife Jesus a dje mo moshilando. Herodes otashi dulika a li a tila kutya ota ka kufa ombinga mefyo lomuprofeti umwe vali, ngaashi ashike medipao laJohannes Omuninginifi. Ashike Jesus okwa lombwela Ovafarisai a ti: “Indeni mu ka lombwele kavandje oo, tamu ti, ‘Tala, ohandi te mo eendemoni nokuvelula ovanhu nena nomongula,  nohandi ka mana mefiku etitatu.’” (Lukas 13:31, 32). Eshi Jesus a ifana Herodes “kavandje,” okwa li a hala kutya oku na oikala youkengeleledi a fa kavandje. Onghee Jesus ka li ta ka nwefwa mo ile a endelelifwe kuHerodes ile komunhu umwe. Okwa li e na okuwanifa po oshinakuwanifwa osho a pewa kuXe she likolelela kehalo laKalunga, ndele kali fi lovanhu.

Jesus okwa li a twikila nolweendo laye a yuka kuJerusalem molwaashi okwa ti “itashi shiiva omuprofeti a dipaelwe kondje yaJerusalem.” (Lukas 13:33) Kape na exunganeko mOmbiibeli la popya kutya Messias ota ka fila moshilando osho, ndele omolwashike Jesus a popya kutya ota ka dipaelwa oko? Omolwaashi Jerusalem oshi li oshilandopangelo, noku na oilyo 71 yOmhangu yoPombada yOvajuda noshi li onhele oko haku pangulilwa ovo hava lundilwa kutya ove li ovaprofeti ovanaipupulu. Natango, oko kwa li haku yambelwa oinamwenyo. Onghee Jesus okwa li a mona kutya itashi ka kala pandunge oku dipaelwa pamwe pe li li.

Jesus okwa ti: “Jerusalem, Jerusalem, ovaprofeti owe va dipaa, naavo wa tuminwa owe va denga nomamanya fiyo va fya. Olungapi nda kala nda hala okwoongela ovamwoye ngaashi oxuxwa tai ongele ouxuxwena vayo koshi yomavava ayo, ashike ino shi hala. Taleni, eumbo leni otamu li fiilwa ongaho.” (Lukas 13:34, 35) Molwaashi oshiwana osho kasha li sha tambula ko Omona waKalunga, otashi ka mona oilanduliko.

Ofimbo Jesus ina ya kuJerusalem, omuwiliki wOvafarisai okwa li e mu shiva keumbo laye va ka lye pamwe mefiku lEshabata. Ovanhu ovo va li va shivwa ova li tava konenene kutya Jesus ota ka ningila shike omulumenhu oo a li ta vele oudu wodindo. Jesus okwa li a pula Ovafarisai nosho yo ovanongo vomhango a ti: “Oshi li ngoo pamhango okuvelula mEshabata?” — Lukas 14:3.   

Kape na oo a li e mu nyamukula. Jesus okwa velula omulumenhu, ndele te va pula ta ti: “Olyelye womunye e na omonamati ile ongobe yaye ya wila mondungu mefiku lEshabata ndele ta kala ine i kufa mo diva?” (Lukas 14:5) Natango, kava li tava dulu oku mu nyamukula omolwokutomhafana kwaye kuwa.