Yesu wafunjishenga ne kubuka bantu mu Yudea ne mu Yelusalema. Kabiji waabukijile ku bushiya bwa Mukola wa Yodano na kufunjisha mu mizhi ya mu nkambi ya Pelia. Bino kechi wabanjileko ne, wayile ku Yelusalema.

Byo ajinga mu Pelia, muntu umo wamwipwizhe’mba: “Nkambo, nanchi kya kine kuba’mba bantutu bacheche bo bakapuluka nyi?” Kyamweka uno muntu wayukile mapata ajinga pakachi ka bantangi ba bupopweshi pa kukeba kuyuka kana bantu bavula bakapuluka nangwa bachechetu. Bino Yesu kechi waambile pa kuvula kwa bantu bakapuluka ne, aye waambile pa byafwainwa kuba muntu pa kuba’mba akapuluke. Waambile’mba: “Ibikishaiko pa kutwela pa kibelo kyakepa.” Kya kine, kikebewa kwingila na ngovu. Mambo ka? Yesu walumbulwile’mba: “Nemubuula namba bavula bakakeba kutwela, bino bakakankalwa.”—Luka 13:23, 24.

Pa kumwesha buneme bwa kwingila na ngovu, Yesu waambile’mba: “Mwina nzubo inge waimana ne kushinka kinzhilo, anweba mukemana pangye na kukonkonsha ku kinzhilo amba, ‘Nkambo tushinkwilaiko.’ . . . Bino aye ukemwambila’mba, ‘Kechi nayuka ko mwafuma ne. Fumai papo, anweba muba byatama!’”—Luka 13:25-27.

Kyamweka uno muntu wakelelwe, kampe waishile pa kimye kyo akebelenga aye mwine, kabiji wataaine kinzhilo bekishinka. Wafwainwe kwiya bukiji pa kuba’mba atwele nangwa kya kuba kechi kyayijilemo na kimye kyo akebelenga kwishilamo ne. Byo byo kyajinga ne ku bantu bavula bafwainwe kumwenamo mu byafunjishenga Yesu kimye kyo ajinga nabo. Bakankelwe kutangizhako bupopweshi bwa kine mu bwikalo bwabo. Bantu Yesu bo bamutumineko na kusapwila, bakaine kuswa lunengezho lwawama lwa Lesa lwa kwibapulwishamo. Onkao mambo, Yesu waambile’mba bakajila ne kushenka ku meno byo bakebataya pangye. Pakuba bantu “bakafuma ku musela, ku muzhika, ku kabeta ka bulenge ne ku kabeta ka ku buyeke,” kokuba’mba mu bisaka byonse, kwiya “kwikala ku tebulu mu Bufumu bwa Lesa.”—Luka 13:28, 29.

Yesu watwajijile kwamba’mba: “Kuji bapelako [bantu babujile Bayudea bo balengulwile ne Bayudea bo bamanyikanga] bakekala batanshi kabiji aba batanshi [Bayudea bajinga na bintu bya ku mubiji bo banemekele mu bupopweshi] bakekala bapelako.” (Luka 13:30) Kwikala “bapelako” kibena kulumbulula’mba, na mambo a muleele wabo ne kubula lusanchilo kechi bakatwelamo mu Bufumu bwa Lesa ne.

Bafaliseo bamo baishile kwi Yesu ne kumwambila’mba: “Fumako kuno uyenga, mambo Heloda [Antipasa] ubena kukeba kukwipaya.” Kampe Heloda ye walengejile bantu kutatula kwamba bino kuba’mba Yesu anyememo mu yoya nyaunda. Kyamweka Heloda waakaminwe’mba usakwivwangamo mu lufu lwa ngauzhi mukwabo wa Lesa byonka byo kyajinga pa kwipaya Yoano Mubatizhi. Bino Yesu wabuujile  Bafaliseo amba: “Yainga mukamubuule awa lubwala amba, ‘Amiwa mbena kupanga bandemona ne kubuka bantu lelo ne kesha, ne pa juba ja busatu po po nkapwisha.’” (Luka 13:31, 32) Byo atelele Heloda amba “lubwala,” Yesu kyamweka waambilenga pa bujimuku bwa balubwala. Nangwa byonkabyo, Yesu kechi bamujimbaikile nangwa kumupanga kwi Heloda nangwa muntu mukwabo ne. Yesu waingijile mwingilo wamupeele Bashanji kwesakana na mwatanchikijile mwine Lesa kechi muntu ne.

Yesu byo apwishishe kwingila mwingilo wanji ku yoya nyaunda, watwajijile lwendo lwanji lwa kuya ku Yelusalema, mambo waambile’mba, “ngauzhi kechi bafwainwa kumwipayila pangye ya Yelusalema ne.” (Luka 13:33) Kafwako bungauzhi bwa mu Baibolo bwaambile’mba Mesiasa ukafwila mu Yelusalema ne. Pano mambo ka Yesu o aambijile’mba mo mo bakamwipayila? Mambo Yelusalema ye wajinga muzhi mukatampe, mwajinga Kije Kikatampe kyajinga na bantu 71 kabiji mo mo batotolweshanga bantu bo bamonanga’mba bangauzhi ba bubela. Kabiji mo mo batapishishanga ne bitapisho bya banyama. Onkao mambo, Yesu wamwene kuba’mba kechi kyayilamo kumwipayila ku mpunzha ikwabo ne.

Yesu wajijile’mba: “Yelusalema, Yelusalema, obewa wipaya bangauzhi ne kwasa mabwe bo bakutumina! Nakebeshe bingi kukonkanya pamo baana bobe, byonka kyaje byo akonkenya pamo twana twanji mu byapi! Bino kechi wakebele kino ne. Talai! Nzubo yenu beikana ne kwimushilayo.” (Luka 13:34, 35) Na mambo a kukana Mwana Lesa, akya kisaka kyafingilwe.

Yesu byo anangijilenga ku Yelusalema, bamwichile ku nzubo ya ntangi wa Bafaliseo na kuja kajo pa juba ja Sabado. Bantu bo baichile bamutajilenga bingi mambo pajinga muntu wajinga na kikola kya butumbwevumo (kuvula mema mu mubiji kikatakata ku maboko ne ku maulu). Yesu washikishe Bafaliseo ne bashayuka ba Mizhilo batainwepo’mba: “Nanchi kijitu bulongo kubuka nangwa kubula kubuka muntu pa juba ja Sabado nyi?”—Luka 14:3.

Abo bazhindaminetu nzoo. Onkao mambo, Yesu wabukile yewa muntu kabiji wibepwizhe’mba: “Ñanyi mwi anweba umvwe mwananji wa mulume nangwa ñombe waponena mu mushima ubula kumutuntulamo bukiji pa juba ja Sabado?” (Luka 14:5) Ne pa kino kimye kafwako nangwa umo wamukumbwile ne.