Yesu anangwilenga nakuka vatu muYuleya namuYelusalema. Kaha azaukile Kalwiji Yotau nakuya nakunangula munganda hinganda mungalila yaPeleya. Nakushimbula chiku, akindulukile muYelusalema.

Omu Yesu apwile muPeleya, lunga umwe amuhulishile ngwenyi: “Ove Mwata, uno ava navalwila vavandende kaha tahi?” Uze lunga atela atachikijile chihande chize chepukile muli vatwamina vamukwitava hakusaka vawane numba nge navakalwila vatu vavavulu nyi vavandende kaha. Muchishishisa chakukumbulula chihula vamuhulishile, Yesu ahanjikile vyuma vize vatela kulinga vatu numba vakavalwile. Ambile ngwenyi: “Kilikitenu chikuma hakwingila muchikolo chachindende.” Chikupu vene, kukilikita chili nakusakiwa numba mutu vakamulwile. Mwomwo ika? Yesu alumbunwine ngwenyi: “Vavavulu navakasaka kwingilamo, oloze kaveshi kukahasako.”—Luka 13:23, 24.

Hakusaka kulumbununa ovyo vyatela kulingisa mutu akilikite, Yesu ambile ngwenyi: “Omu mwakalinga mwenyazuvo nakatuka lyehi nakusoka kuchikolo, enu namukemana kuweluka nakungongomweza kuchikolo nakwamba ngwenu, ‘Ove Mwata, tusokolweleko.’ . . . Oloze mwakamba kuli enu ngwenyi, ‘Kangwatachikijile okwo munafumuko. Fumenu kuli ami, enu vaka-kulinga vilinga vyakuhenga muvosena!’”—Luka 13:25-27.

Echi chakutalilaho chili nakulumbununa ukalu eji kumonanga mutu kachi nge nakotokela, kaha himweza halwola luze nazange ivene, ngocho himwawana chikolo vanachisoko lyehi. Atelanga kwiza washi, numba tuhu ivene kazanganga kwiza halwola kanako. Omu mukiko chapwile nakuvatu vavavulu vaze vatelelele kunganyala kuvyuma apwile nakuvanangula Yesu. Vahonene kumona kulemesa chamuchano kupwa chachilemu chikuma mukuyoya chavo. Yesu vamutumine kuya kuli vaYuleya, oloze vaYuleya vavavulu vakanyine kwitavila vyuma vize avahanyine Kalunga mangana vavalwile. Yesu ambile ngwenyi ‘navakalila nakulingenjunga kumazo’ omu navakavambila haweluka. Oloze vatu vakufuma “kumututuko nakumulauko, nakunote nakusulo,” eyo, vakufuma kumafuchi osena, navakeza “nakusendavala kumesa muWangana waKalunga.”—Luka 13:28, 29.

Yesu alumbunwine ngwenyi: “Vamwe vaze vakukuminyina [vakufwana nge vatu vaze kavapwile vaYuleyako navaYuleya vakuyanda] navakapwa vakulivanga, kaha vamwe vaze vakulivanga [vaYuleya vamukwitava vaze valivwimbilenga hakupwa vana vaApalahama] navakapwa vakukuminyina.” (Luka 13:30) Vatu kana ‘navakakuminyina,’ kulumbununa nge ava vatu vakuhona kusakwilila kaveshi kukengila muWangana waKalungako.

VaFwaliseu vamwe vejile kuli Yesu nakumulweza ngwavo: “Kuno fumako, yako kweka, mwomwo Helote [Andepa] ali nakusaka kukujiha.” Pamo Mwangana Helote ikiye aputukile kuhanjika mazu awa mangana valingise Yesu afume mungalila kana. Atela Helote evwile woma ngwenyi pamo mwajiha kapolofweto mukwavo, ngana muze ajihile Yowano  Muka-kumbapachisa. Oloze Yesu alwezele vaFwaliseu ngwenyi: “Yenu mukalweze owo mumbwe ngwenu, ‘Ivwa! Lelo nahamene nangulovola vandemone nakuka vatu, kaha halikumbi lyamuchitatu numbanyi ngukakumise.’” (Luka 13:31, 32) Yesu hakuvuluka Helote ngwenyi “mumbwe,” pamo apwile nakutalisa kuvilinga vyavamyumbwe. Ngocho Yesu kavatelelele kumukanjikiza kuli Helote chipwe kuli kala mutu ayenga kungalila yekako. Azachilenga mulimo uze vamuhanyine, kweseka nakunoneka chaKalunga keshi chamutuko.

Yesu atwalileho lika ungeji wenyi wakuya kuYelusalema mwomwo ambile ngwenyi, “kapolofweto kavatela kumujihila kuweluka waYelusalemako.” (Luka 13:33) Hakuwana nge kakwatwama upolofweto muMbimbiliya uze wahanjika nge Meshiya atela kufwila muYelusalemako, kaha mwomwo ika Yesu ahanjikile vyakufwila munganda kana? Mwomwo Yelusalema yapwile nganda yayinene, kaha mukiko mwapwilenga zango yayinene yaSunendeline yize yapwilenga navaka-kuyula 71. Mukiko nawa vasopeselelenga vapolofweto vaze vamwenenga kupwa vamakuli, kaha nawa mukiko vatu vahanyinyinenga vimuna vakuvatula. Ngocho Yesu atachikijile ngwenyi nachipwa chakuhenga kumujihila kunganda yeka.

Yesu aliveyele ngwenyi: “Ove Yelusalema, ove Yelusalema, ove muka-kujiha vapolofweto, ove muka-kwasa malolwa vaze vanatumu kuli ove. Ngwasakile mapapa kakavulu kukungulula vana vove nge omu chali eji kukungulwilanga vana venyi mumavava enyi. Oloze enu kamwasakileko. Talenu! Zuvo yenu vanamiselayo.” (Luka 13:34, 35) VaYuleya vakanyine MwanaKalunga, ngocho vatelele kuvazangamisa.

Shimbu kanda Yesu ahete kuYelusalema, twamina umwe wavaFwaliseu amusanyikile kuzuvo yenyi mangana akalye vyakulya halikumbi lyaSambata. Vatu vaze vasanyikile kukulya kana vapwile nakuvandamina vamone ovyo Yesu mwalinga kuli lunga uze apwile namusongo walilupa-kuvova. Yesu ahulishile vaFwaliseu navaze vatachikijile chikuma Jishimbi ngwenyi: “Uno vachitavisa kuka mutu haSambata tahi, nyi chiku?”—Luka 14:3.

Naumwe amukumbulwile wauchi. Yesu okile uze lunga, kaha avahulishile ngwenyi: “Iya hali enu, kachi nge mwanenyi chipwe ngombe yenyi naholokela muwina halikumbi lyaSambata, mwazeneka kumufumisamo washiwashi?” (Luka 14:5) Kavamukumbulwile chekako.