A Zeezi zĩnda Zʋʋde la Zeruzalɛm n zãms nebã Wẽnnaam daabã, la a sãoog bãad-rãmba. Masã a rʋʋga Zʋrdẽ kʋɩlgã n na n tɩ moon koɛɛgã Peere tẽnsã. La pa na n kaoos la a lebg n wa Zeruzalɛm ye.

A Zeezi sẽn wa n be Peere wã, rao n sok-a yaa: “Zu-soaba, yaa neb bilf bal n na n paam fãagre?” Tõe tɩ raoã miime tɩ tũudmã taoor dãmb wẽeda no-koɛɛm n na n bãng sẽn na n paam-b fãagrã sõor sã n na n yɩɩ bilf bɩ wʋsgo. A Zeezi pa leok a sokrã vẽeneg-vẽeneg ye. A wilga bũmb ning ned sẽn segd n maan n paam fãagrã. A yeelame: “Nang-y pãng n tũ digno-sẽkã n kẽ.” Sɩd me, yaa tɩlɛ tɩ d modg wʋsgo. Bõe yĩnga? A Zeezi meng yeelame: “Mam yeta yãmb tɩ neb wʋsg na n baoome tɩ kẽ la b ka na n tõog ye.”—Luk 13:23, 24.

Sẽn na yɩl n wilg tɩ d tog n nanga pãnga, a Zeezi rɩka makre. A yeelame: “Yirã soab sã n yik n pag rignoorã, tɩ yãmb pa yɩng n sɩng n kabsdẽ, la y yet Zu-soabã tɩ b pak tɩ y kẽ, . . . b na n leoka yãmb n yeele: ‘Mam ka mi yãmb sẽn yitẽ ye. Zãag-y ne maam, yãmb fãa sẽn tʋmd ka-tɩrlem tʋʋma.’”—Luk 13:25-27.

A Zeezi makrã wilgdame tɩ b sã n bool ned zĩig ninga, t’a wa yẽ sẽn dat wakat n mik tɩ kʋɩlengã pagame, a sũur sãamda wʋsgo. Baa sɛkã sẽn pa zems ne-a wã, a ra segd n modg n waa pĩnda. Neb wʋsg me sẽn kelg a Zeezi maana woto. B paamame t’a zãms-b bũmb wʋsgo, la b pa sak n na n lʋɩɩs Wẽnnaam tũubã taoor b vɩɩmã pʋgẽ ye. Wẽnnaam sẽn tʋm a Zeezi neb nins nengẽ wã wʋsg pa sak n kelg-a ye. Yaool n da yaa ne yẽ maasem la b tõe n paam fãagre. A Zeezi yeelame tɩ b na n lob-b-la yɩnga, la tɩ “nintãm ne yẽn wãbr na zĩnd be.” La neb n na n yi “yaang la taoore, dɩtg la goabga,” rat n yeel tɩ tẽns fãa pʋsẽ, “n zĩnd n dɩ Wẽnnaam soolmã pʋgẽ.”—Luk 13:28, 29.

A Zeezi yeelame: “La gese, poorẽ dãmb [neb sẽn ka zʋɩf-rãmba, la zʋɩf-rãmb b sẽn ka nande] n be n na n yɩ dẽenem dãmba, tɩ dẽenem dãmb me [tũudmã taoor dãmb sẽn yet tɩ b yaa a Abrahaam yagensã] na n yɩ poorẽ dãmba.” (Luk 13:30) B sẽn na n yɩ “poorẽ dãmbã” rat n yeelame tɩ b ka na n paam n kẽ Wẽnnaam soolmã pʋgẽ ye.

Fariizẽ-dãmbã kẽer waa a Zeezi nengẽ n yeel-a yaa: “Yik-y n kẽng-y zĩig a to t’a Erod [Ãntipaas] dat n kʋʋ yãmba.” Tõe tɩ yaa rĩm a Erood mengã a toor n kɩt tɩ b yelg kibar a woto, sẽn na yɩl t’a Zeezi yi a soolmẽ wã. Wõnda a Erood ra zoeta na n le tũ ne yẽ tɩ b kʋ no-rɛɛs a to, wa sẽn yɩ to-to ne a Zãmbatiisã. La a Zeezi yeela Fariizẽ-rãmbã yaa: “Tɩ yeel-y m Ba sɩlem soaba Waaga, ade, maam yiisda sʋtãamba la m sãoogd bãad-dãmb dũna la beoogo la da-yɩten-daara tɩ m sɛɛme.” (Luk 13:31, 32, Sebr Sõngo) A Zeezi bee bʋʋm la a sẽn bool a Erood tɩ “waagã,” bala waag tara sɩlem. La a pa na n bas t’a Erood wall ned a to wilg yẽ a sẽn tog n maan ye. A na n tʋma tʋʋmd ning a Ba wã sẽn kõ-a wã, tɩ zems ne a Ba wã sẽn dat tɩ yɩ to-to wã. A pa na n tũ ninsaal raab ye.

A Zeezi kell n dɩka sor n lebd Zeruzalɛm, bala a meng yeelame tɩ “ka zems tɩ Wẽnnaam no-rɛɛs ki zĩig a to tɩ ka Zeruzalɛm ye.” (Luk 13:33) No-rɛɛs baa a ye pa reng n togs tɩ Mesi wã tog n kii Zeruzalɛm ye. La bõe yĩng t’a Zeezi yeel tɩ yaa be la b na n kʋ yẽ? Bala Zeruzalɛm yaa na-tẽnga, tɩ zʋɩf-rãmbã bʋ-kaoodbã sull b sẽn boond tɩ Sãnedrẽ wã be be. B sullã yaa neb 71. Nin-buiidã sã n dõd ned t’a yaa ziri no-rɛɛsa, yaa Zeruzalɛm la b kaood a bʋʋdo. Sẽn paase, yaa be la nebã kʋʋd rũmsã n maand maandã. Rẽ kɩtame t’a Zeezi getẽ tɩ b sã n kʋ yẽ zĩig a to tɩ pa Zeruzalɛm, pa zems ye.

A Zeezi kʋma Zeruzalɛm nebã, n yeele: “Zeruzalɛm! Zeruzalɛm! Fo sẽn kʋʋd Wẽnnaam no-rɛɛsdba, la f lobd neb nins Wẽnnaam sẽn tʋm fo nengẽ wã kugã, naoor a wãn la mam dag n tʋlg n tigs fo kambã wa no-yãang sẽn põgended a kamb a pɩgsẽ? La yãmb ka tʋlg ye. Gese, b na n basa yãmb ne y roogã.” (Luk 13:34, 35) Zeruzalɛm nin-buiidã pa sak n reeg Wẽnnaam Biigã ye. Rẽ ra na n waa ne yelle.

Nand t’a Zeezi ta Zeruzalɛm, Fariizẽ-rãmbã taoor soab a ye n bool-a a zakẽ vʋʋsg daare, t’a wa rɩ. Rao n da be be tɩ bã-motem tar-a. B sẽn bool neb ninsã ra gũusd n geta a Zeezi sẽn na n maane. A soka Fariizẽ-rãmbã ne tõog karen-saam-dãmbã yaa: “Dẽ yĩnga, noor beeme tɩ maag ned vʋʋsg daare?”—Luk 14:3.

Ned baa a ye pa leok ye. A Zeezi sãooga raoã, la a sok woto: “Ãnda yãmb sʋkã bi-ribl bɩ a naaf n na n lʋɩ bulgẽ vʋʋsg daar t’a ka yiis-a tao-tao?” (Luk 14:5) A Zeezi gomdã sẽn yaa sɩdã kɩtame tɩ ned baa a ye pa tõog n leok ye.