Yesu ohaahusiha ni waapenusa achu o Yuteya ni o Yerusalemu. Voocharela onnalapuwa Muhice Yortano wi ahusihe mu epooma mmuceche wa Pereya. Moohilekela, onahaala okookela o Yerusalemu.

Vaavaa oreiye o Pereya, mulopwana onnamukoha: “Pwiya, hanatxa atxhu anavuluwa?” Akhweya mulopwana oosuwela ovaanyihana variyari va ahooleli a malapelo waakhanle wi ancipale anahaala ovulusiwa naari vakhaani. Yesu onnarukunusa mwaha mmukhalelo taani ancipale eneeraaya evulusiwe ni yeeyo anaphwanelaaya opaka wi evulusiwe. “Lipiseryani ovolowa mulako mukhani,” Yesu onnaloca. Chiryene, wiilipiserya onnachuneya. Ntakhara heeni? Yesu onnathariha: “Miyo kinnolèlani, atxhu antxipale anamwasya ovolowa ni hewerya.”—Luka 13:23, 24.

Wi aphwanaphwanihe okhweleya waya wiilipiserya, Yesu onnaloca: “Mwanene a empa, avinyaka, àwala mulako, nyuwo mwakhala vate, muni munamana mulako muriki: ‘Pwiya nihulele! . . . Nto apwiya ewakhuleni: ‘Kinnalotxa wiliwili wi nkinasuwela munarwanyuwo. Vinyani vamithoni vaka othene nyuwo munera sotakhala.’”—Luka 13:25-27.

Niphwanaphwaniho nla nnamuloca muchu yoowo onakooka ohiyu, akhweya vaavaa onooneiye wi ti yoophwanelela wa yoowo nave aphwanya nsele niwaliwe. Owo aaphwanela ophiya woosiilo, naamwi wahaari woophwanelela. Eyo enalikana ni ancipale yaawo yaaphwanela ophuravo mahusiheryo a Yesu. Awo yaahesa okumihavo ekari ya opaka malapelo eeparipari okhala echu yookhweleya mookumini mwaya. Hanka vooloca sa yaale ahineemererya soovaha sa Muluku ntakhara ovulusa? Yesu onnaloca wi awo anahaala “wunla ni owurawura mìno” vaavaa eneeraaya ekumiheryiwe vaate. Nyenya Yesu onnaloca wi achu “weiwo onakhuma nsuwa ni nnavolowayawo, weiwo onarwa etxheku ya murupi ni enayayawo,” chiryene orweela maloko oothene, enarwa “ekirathi vamesa mwa omwene wa Muluku.”—Luka 13:28, 29.

Yesu onnathariha: “Arivo ókiserya [hiiha ntoko Ayuta ni yahaari Ayuta ni oohoosiwa] yawo enarwa-ekhala ópacherya; nave arivo ópacherya [ahooleli a malapelo yaawo aniirumiha okhala nloko na Aparahamu] enarwa-ekhala ókiserya.” (Luka 13:30, Nlakano Nahihano) Okhala waya “ókiserya” enataphulela wi yaale ahiri oothamalela heni evolowe mu Omwene wa Muluku.

Afarisi akina annarwa wa Yesu nave annamulopola: “Tximulàni opwahevo vava, ntakhara Heróde [Antipa] onakhwela owipha.” Akhweya Mwene Herote aahipaceryiha woopopiha wi eerihe  wi Yesu akhume mmucecheni. Akhweya Herote aanoova woona wi aaheeriha wiiphiwa wa mulipa a miririmu, Yohani Mpatisi. Nyenya Yesu onnaaleela Afarisi: ‘Haweni mwamulèle nanthala owo: miyo kinnakumiha [masololo] nave kinnàpenusa aretxa olelo ni omelo, nave nihiku naneraru naya kinammaliha.’ (Luka 13:31, 32) Moorweela wa omwiichana Herote ntoko “nanthala,” Yesu akhweya ooniherya mukhalelo nanthala oreiye awoopiha. Mwawiihiiha, Yesu tahi wi aahooleliwa ni Herote naari muchu mukina. Owo eerano muteko yoowo aavahiweiye ni Tiithi awe, weerano mwawiiwanana ni marehereryo a Muluku, ohiya a muchu.

Yesu onnatoroka mukwahaawe wi akookele o Yerusalemu, hiiha ntoko onaloceiye “wi tahi yaphama wi mulipa a miririmu akhwe elapo ekina ohikhanle o Yerusalemu.” (Luka 13:33) Hiyaavovo yooloherya ya Piipiliya enaloca wi Mesiya aaphwanela okhwa mu epooma yeele, vano ntakhara heeni Yesu onaloceiye sa okhwa weiwo? Nthowa nawi Yerusalemu epooma etokweene, weiwo oriwo asitokweene a nikhuuru Noothoriha 71 nave ti weiwo yaale anootheriwa okhala alipa a miririmu oowoka anaphwanelaayawo othorihiwawo. Mwawaaceererya, ti weiwo mukucho wa asinama onavahiwaayawo. Mwawiihiiha, Yesu onnasuwela wi heni ekhale yoophwanelela wiiphiwa nipuro nikina.

Yesu onniikhupanyerya: “Jerusalém, Yerusalemu, onawipha alipa a miririmu ni onàvonya ni maluku ale arummwe, vahai miyo kikhwenlaka wathukumanya ana à ntoko mwalakhu onàthukumanyeiye asana awe mmakupheloni mwawe, nto weyo hokhwenle! Vano etxheko à enamukhala milepe.” (Luka 13:34, 35) Nloko nnamukhooca Mwaana a Muluku nave nnaphwanela othorihiwa!

Yesu ahaakumve oya o Yerusalemu, muhooleli a Afarisi onnanwopa wi alye owannyawe nihiku Nawoorowa. Yaale awompwe annamvarerya phaama Yesu wi yoone yeeyo oneereiye apake ntakhara mulopwana ori vaava onahooseya ni wiipelana (osareya wa maahi, wiiliwiili mu ikatha ni inaani) Yesu onnaakoha Afarisi nave onnaromola Nlamulo: “Ti yaphama nari tahi yaphama ompenusa mutxhu nihiku naworowa?”—Luka 14:3.

Haavovo onaakhula. Yesu onnampenusa mulopwana nave onnaakoha: “Tani wa nyuwo akhalano mwanawe nari emope nave mmoha wa yawo uwelà vehimeni, vohilekela ahivinyà akumihamo nihiku naworowa?” (Luka 14:5) Wanaawiili, awo hanamwaakhula ntakhara nthowa nawe nawiiweya.