Jesu o be a dutše a ruta e bile a fodiša batho kua Judea le Jerusalema. Ke moka o tshela Noka ya Jorodane gore a yo ruta metseng ka go latelelana seleteng sa Perea. Lega go le bjalo, go se go ye kae o tla be a boetše Jerusalema.

Ge Jesu a sa le Perea, monna yo mongwe o botšiša gore: “Morena, na bao ba phološwago ke ba sego kae?” Monna yo a ka ba a tseba ka dingangišano tšeo baetapele ba bodumedi ba nago le tšona tša mabapi le ge e ba go tla phološwa ba bantši goba ba sego kae. Jesu ga a bolele ka taba ya gore ke ba bakae bao ba tlago go phološwa, eupša o bolela ka taba ya seo motho a swanetšego go se dira gore a phološwe. O re: “Katanang ka matla gore le tsene ka mojako o pitlaganego.” Ee, go nyakega boiteko, gona go katana. Ka baka la’ng? Jesu o a hlalosa o re: “Ba bantši ba tla nyaka go tsena eupša ba ka se kgone.”—Luka 13:23, 24.

E le go bontšha go nyakega ga go dira boiteko bjo bogolo, Jesu o re: “E tla re ge mong wa ntlo a tsogile a notlela mojako, lena la ema ka ntle la thoma go kokota mojakong la re: ‘Morena, re bulele.’ . . . Eupša o tla re go lena: ‘Ga ke tsebe moo le tšwago gona. Tlogang go nna, lena ka moka badiri ba tše di sa lokago!’”—Luka 13:25-27.

Se se bontšha tlalelo ya motho yo a tlago ka morago ga nako—mohlomongwe nakong yeo maemo a gagwe a mo dumelelago—fela a hwetša mojako o tswaletšwe e bile o notletšwe. Nkabe a ile a tla pejana, gaešita le ge maemo a gagwe a be a sa mo dumelele. Go bjalo ka batho ba bantši bao ba ka bego ba ile ba holwa ke go ba gona ga Jesu moo ge a be a ba ruta. Ba paletšwe ke go ikhola ka sebaka sa go dira gore borapedi bja therešo e be morero wa bona o mogolo bophelong. Ge e le ba bantši bao Jesu a rometšwego go bona ga se ba amogela tokišetšo ya Modimo ya phološo. Jesu o re ba tla ‘lla le go tsikitlanya meno’ ge ba lahlelwa ka ntle. Lega go le bjalo, batho “ba tla tla ba etšwa ka bohlabela, ka bodikela, ka leboa le ka borwa,” ee, go tšwa ditšhabeng ka moka, gomme “ba tla dula tafoleng Mmušong wa Modimo.”—Luka 13:28, 29.

Jesu o hlalosa gore: “Go na le ba mafelelo [ba bjalo ka bao e sego Bajuda le Bajuda bao ba gateletšwego] bao e tlago go ba ba pele gomme go na le ba pele [Bajuda ba e lego batho ba bodumedi bao ba ikgantšhago ka go ba ditlogolo tša Aborahama] bao e tlago go ba ba mafelelo.” (Luka 13:30) Go ba ga bona “ba mafelelo” go bolela gore batho bao ba sa lebogego ba ka se be gona le gatee Mmušong wa Modimo.

Bjale Bafarisei ba bangwe ba tla go Jesu ba mo eletša ka gore: “Etšwa mo o tloge gobane Heroda [Antipase] o nyaka go go bolaya.” Mohlomongwe Kgoši Heroda ka boyena ke yena a thomilego mabarebare a go dira gore Jesu a tloge tikologong yeo. Heroda a ka ba a boifa gore ka tsela e itšego o tla kgatha tema lehung la moporofeta yo mongwe, go etša ge a ile a e kgatha go bolaweng ga Johane Mokolobetši. Eupša Jesu o botša Bafarisei o re: “Sepelang le botše phukubje yeo ya moradia le re: ‘Bona! Ke leleka batemona le go fodiša lehono le gosasa, gomme ka letšatši la boraro ke tla be ke feditše.’” (Luka 13:31, 32) Jesu ka go bitša Heroda gore ke “phukubje,” a ka ba a bontšha kamoo diphukubje di ka bago le boradia ka gona. Lega go le bjalo, Jesu a ka se laolwe goba go dirišwa dilo ka go akgofa ke Heroda goba motho yo mongwe. O tlo phetha kabelo yeo a e filwego ke Tatagwe, a dira bjalo go ya kamoo Modimo a rulagantšego ka gona, e sego go ya ka thulaganyo ya motho.

Jesu o tšwela pele leetong la gagwe a lebile Jerusalema ka gobane, bjalo ka ge a bolela, “ga se gwa dumelelwa gore moporofeta a bolaelwe ka ntle ga Jerusalema.” (Luka 13:33) Ga go na boporofeta bja Beibele bjo bo itšego Mesia o swanetše go hwela motseng woo, ka gona ke ka baka la’ng Jesu a bolela gore o tla bolaelwa moo? Ka gobane Jerusalema ke motsemošate, moo kgorokgolo ya ditho tše 71 tša Sanhedrine e lego gona, e bile ke moo bao ba latofatšwago ka go ba baporofeta ba maaka ba tlago go sekišwa gona. Go oketša moo, ke moo go direlwago dihlabelo tša diphoofolo. Ka gona, Jesu o lemoga gore go be go ka se amogelege gore a bolawe lefelong le lengwe.

Jesu o goeletša ka gore: “Hee Jerusalema, hee Jerusalema, wena mmolai wa baporofeta le yo a kgatlago ka maswika bao ba rometšwego go wena—ke gantši gakaakang ke nyaka go bokanya bana ba gago gotee ka mokgwa woo kgogo e bokanyago matswiana a yona ka tlase ga diphego tša yona, eupša lena ga se la ka la nyaka! Bonang! Modimo o tla lahla ntlo ya lena.” (Luka 13:34, 35) Setšhaba se se gana Morwa wa Modimo gomme se tla lebeletšana le ditlamorago tša seo e le ruri!

Pele Jesu a ka fihla Jerusalema, moetapele wa Bafarisei o mo laletša dijong ntlong ya gagwe ka Sabatha. Bao ba laleditšwego ba mo šetša gore ba bone seo Jesu a ka se dirago ka monna yo a lego gona yo a swerwego ke bolwetši bja go ruruga (e lego go tlala meetse o šoro, gantši maotong le dinaong). Jesu o botšiša Bafarisei le ditsebi tša Molao, o re: “Na go dumeletšwe ke molao go fodiša ka Sabatha goba ga go a dumelelwa?”—Luka 14:3.

Ga go na yo a arabago. Jesu o fodiša monna yoo gomme o ba botšiša gore: “Ke mang go lena yo e ka rego ge morwa wa gagwe goba poo ya gagwe e wela ka sedibeng a ka se kego a e ntšha gateetee ka letšatši la Sabatha?” (Luka 14:5) Le gona mo, ga ba arabe ka ge ba ekwa gore mabaka a gagwe a a kwagala.