Nambangat tan nampaabig si Jesus diad Judea tan Jerusalem. Insan binaliw toy Ilog Jordan pian manbangat ed saray syudad diad distrito na Perea. Balet agmanbayag et ompawil lanlamang ed Jerusalem.

Legan ya walad Perea si Jesus, tinepetan na sakey a laki: “Katawan, daiset labat kasi so nilaban?” Nayarin amta na laki ya pandedebatian na saray lider na relihyon no kasin dakel odino daiset so nilaban. Imbes ya ebatan nen Jesus no pigaray nilaban, say impaimano to et no antoy nepeg a gawaen pian nilaban. “Pampursigian yoy makaloob ed mainget a puerta,” so kuan to. On, kaukolay pampursige o pansagpot. Akin ey? Impaliwawa nen Jesus: “Dakel naani so manpirawat a makaloob balet agda nayarian.”—Lucas 13:23, 24.

Pian nipanengneng ya kaukolan so pampursige, oniay ilustrasyon nen Jesus: “No intalak la na akan-abung so puerta, onalagey kayod paway tan ontoktok ed puerta, ya ikuan yon, ‘Katawan, paloob mo kami.’ . . . Balet ikuan tod sikayo, ‘Agta kayo kabat. Arawi kayod siak, amin yon manggagaway kaugsan!’”—Lucas 13:25-27.

Ipapanengneng na saya so nagawad toon atrasadon onsabi—nayarin no kapigan kombeniente ed sikato—tan akatalak lay puerta. Asakbay la komon ya linma anggano aliwan kombeniente ed sikato. Ontan so agawad dakel ya agunggonaan komon ed panagbangat nen Jesus. Agda sinambot so pankanawnawan iyunad bilay da so dugan panagdayew. Ag-inawat na maslak a totoo si Jesus ya imbaki na Dios, say intarya To parad kilalaban. Imbaga nen Jesus ya ‘onakis tan manngalatenget so ngipen da’ no nibantak irad paway. Balet saray totoon “manlapud bukig tan sagur, tan manlapud amianen tan abalaten,” on, manlapud amin ya nasyon, et “ondungo rad lamisaan diad Panarian na Dios.”—Lucas 13:28, 29.

Impaliwawa nen Jesus: “Wala ray unor [singa saray aliwan Judio tan saray napapairap a Judio] a magmaliw ya unaan, tan wala ray unaan [saray lider na relihyon ya mangilalastog a nanlapu rad poli nen Abraham] a magmaliw ya unor.” (Lucas 13:30) Nibagan “unor” irayan agmaapresyan totoo ta ag-iran balot magmaliw a kabiangan na Panarian na Dios.

Inasinggeran na arum ya Fariseo si Jesus tan binilin da: “Paway ka la tan taynan ka dia, ta labay to kan pateyen nen Herodes [Antipas].” Nayarin si Arin Herodes mismo so angikayat ed sayan balbalita pian onekal lay Jesus ed nasasakopan to. Ompan natatakot si Herodes ya nalanor lamet ed ipatey na sananey nin propeta, ya singa ed samay impamatey ed si Juan a Managbautismo. Balet imbaga nen Jesus ed saray Fariseo: “La kayo tan ibaga yod satan a masilib a kuyangen, ‘Papawayen ko iray demonyo tan mamaabig ak na totoo ed sayan agew tan nabuas,  tan diad komatlon agew et sumpalen koy kimey ko.’” (Lucas 13:31, 32) Tinawag nen Jesus ya “kuyangen” si Herodes ta nayarin iisipen toy inkamasilib na saray kuyangen, o masisibeg ya aso. Balet, agnayarin kontrolen o apuraen nen Herodes, odino na anggan siopa, si Jesus. Sumpalen toy asainmin ya inter ed sikato nen Ama to, base ed eskedyul na Dios, aliwan eskedyul na too.

Intuloy nen Jesus so nambiahe paonlad Jerusalem ta imbaga ton “agnayari a say sakey a propeta et pateyen diad paway na Jerusalem.” (Lucas 13:33) Anggapoy propesiyad Biblia ya mangibabagan nepeg ya ompatey ed satan a syudad so Mesias, kanian akin et inisip nen Jesus ya ditan ompatey? Lapud say Jerusalem so manunan syudad ya kulaan na atagey a korte na Sanhedrin ya 71 so membro, tan ditan bibistaen iray naakusaan ya palson propeta. Sakey ni, ditan iyaapay iray bagat ya ayep. Kanian amoria nen Jesus ya nepeg a ditan ompatey, aliwan diad sananey a lugar.

“Jerusalem, Jerusalem, say managpatey na saray propeta tan managtupak na saramay imbaki ed sikato,” so maermen ya imbaga nen Jesus, “aminpigan labay kon tiponen komon iray anak mo, a singa ed panitipon na nganak ed saray siwsiw to diad saray payak to! Balet agyo labay. Napaulyanan la so abung yo.” (Lucas 13:34, 35) Impulisay na nasyon so Anak na Dios, kanian anien day resulta!

Antis ya akasabid Jerusalem si Jesus, sikatoy inimbitaan ed abung na sakey ed saray lider na saray Fariseo pian midungo legan na Sabaton. Iimanoen a maong na saray arum ya inimbitaan no anto kasi gawaen tod samay lakin wadman ya linmarag so laman to (nayarin linmarag so bikking tan sali to lapud natitipoy danum). Tinepetan nen Jesus iray Fariseo tan saray ekspertod Ganggan: “Kasin unong ed ganggan so mamaabig legan na Sabaton odino andi?”—Lucas 14:3.

Anggapoy inmesel. Pinaabig nen Jesus so laki insan to ra tinepetan: “Siopad sikayo so agmangagwat a tampol ed anak to odino baka to no naplag ed bobon diad agew na Sabaton?” (Lucas 14:5) Ag-ira lamet akaebat ed sayan makatunongan ya tepet to.