Hesus a pasa algun tempu ta siña i kura hende na Hudea i Herúsalèm. Despues, el a krusa Riu Yordan pa e bai di stat pa stat pa siña e hendenan den e distrito di Perea. Pero su intenshon tabata pa despues di un poko tempu e bai Herúsalèm bèk.

Na Perea, un hòmber a puntr’é: “Señor, ta bèrdat ku ta poko hende so lo salba?” Podisé e hòmber tabata sa di e diskushonnan ku e lidernan religioso tabatin tokante kuantu hende lo a ser salbá, si ta poko òf hopi. Pero Hesus a kambia e kòmbersashon i a kuminsá papia di loke un persona mester hasi pa ser salbá. El a bisa: “Hasi esfuerso vigoroso pa pasa dor di e porta smal.” Sí, pa ser salbá ta rekerí esfuerso. Dikon? Hesus a splika: “Mi ta bisa boso: Hopi lo purba di drenta ma lo no por.”—Lukas 13:23, 24.

Anto pa ilustrá e importansia di hasi esfuerso vigoroso, Hesus a bisa: “Unabes ku e doño di kas a lanta i sera e porta na yabi, boso lo para pafó i kuminsá bati riba porta i bisa: ‘Señor, habri porta pa nos.’ . . . Ma lo e bisa boso: ‘Mi no sa ken boso ta. Bai for di mi, hasidónan di maldat!’”—Lukas 13:25-27.

Asina, Hesus a señalá na e problema ku un persona ku yega lat ta hañ’é kuné; kisas e persona ta yega na un ora ku ta kumbiniente p’e, ma e ta haña e porta será na yabi. E mester a bini mas trempan maske esei no tabata kumbinié. Esei ta loke a sosodé ku hopi hende ku no a probechá di e oportunidat ku nan tabatin di siña for di Hesus ora ku e tabata huntu ku nan. Nan no a pone adorashon berdadero na promé lugá den nan bida. Pues, kiko di hende ku no aseptá Dios su medio pa haña salbashon? Hesus a bisa ku nan lo ‘yora i morde riba djente’ ora nan ser tirá pafó. No opstante, el a bisa tambe ku lo tin hende ku lo a bini “di ost i wèst, i for di nort i zùit,” sí, di tur nashon, ku sí lo “sinta kome na mesa den e Reino di Dios.”—Lukas 13:28, 29.

Hesus a splika: “Tin di esnan ku ta último [por ehèmpel, hende ku no tabata hudiu òf hudiunan ku tabata ser oprimí] ku lo ta promé, i tin di esnan ku ta promé [esta, e lidernan religioso kendenan tabata masha orguyoso di ta desendiente di Abraham] ku lo ta último.” (Lukas 13:30) E echo ku e personanan ingrato akí lo ta “último” ta nifiká ku nan lo no heredá e Reino di Dios.

Awor bon, algun fariseo a bini serka Hesus i a bis’é: “Bai for di akinan, pasobra Heródes [Antipas] ke mata bo.” Podisé ta Rei Heródes mes a kuminsá plama e rumor akí pa Hesus spanta i hui bai for di einan. Heródes lo tabatin miedu di bira kómplise atrobe di morto di un profeta, manera tabata e kaso ku Huan Boutista. Pero Hesus a bisa e fariseonan: “Bai bisa e chatiger ei: ‘Tende! Awe ku mañan mi ta saka demoño i kura  hende, i riba e di tres dia lo mi ta kla ku mi trabou.’” (Lukas 13:31, 32) E palabra griego ku Hesus a usa aki ku den e Tradukshon di Mundu Nobo a ser tradusí komo “chatiger” ta referí na Heródes su astusia. Pero Hesus no a laga Heródes ni ningun hende manipul’é ni preshon’é. Hesus tabata determiná pa kumpli ku e asignashon ku su Tata a dun’é, segun e orario di su Tata i no di hende.

Di manera ku Hesus a sigui ku su biahe pa Herúsalèm pasobra manera e mes a bisa: “Un profeta no tin mag di ser matá pafó di Herúsalèm.” (Lukas 13:33) No tin ningun profesia di Beibel ku ta bisa ku e Mesías mester a muri na Herúsalèm. Dikon anto Hesus a bisa ku lo el a ser matá einan? Wèl, Herúsalèm tabata e kapital kaminda Sanedrin, e korte supremo hudiu ku tabata konsistí di 71 miembro, tabata situá. Ta einan tur persona ku tabata ser akusá di ta profeta falsu mester a ser husgá. Ademas, ta na Herúsalèm nan tabata ofresé sakrifisio di bestia. P’esei, Hesus tabata konsiente ku ta einan lo e mester a ser matá, i ningun otro kaminda.

Hesus a lamentá: “Herúsalèm, Herúsalèm, abo ku a mata e profetanan i ku a piedra esnan ku Dios a manda serka bo, kuantu biaha mi kier a hala bo yunan huntu, manera un galiña ta hala su puitunan huntu bou di su alanan, ma boso no tabata ke! Dios lo bandoná boso tèmpel!” (Lukas 13:34, 35) E nashon tabata rechasando e Yu di Dios, p’esei nan lo a sufri e konsekuensianan!

Ora Hesus tabata riba kaminda pa Herúsalèm, un lider di e fariseonan a invit’é pa bin kome riba sabat na su kas. Na e komementu, Hesus a topa un hòmber ku tabata sufri di dewater (un malesa ku ta pone hende su kurpa hincha debí na vògt, mayoria di biaha nan pianan). E otro invitadonan tabata opservá Hesus atentamente pa wak si lo el a yuda e hòmber ei. Hesus a puntra esnan vèrsá den Lei i e fariseonan: “Tin mag di kura hende riba sabat, sí òf nò?”—Lukas 14:3.

Niun hende no a kontestá nada. Hesus a kura e hòmber i a hasi nan un pregunta lógiko: “Kua di boso, si su yu òf su toro kai den pos, lo no sak’é mesora riba dia di sabat?” (Lukas 14:5) Atrobe, nan no por a kontestá nada.