Wan pisi ten kaba Yesus gi leri na ini Yudea nanga Yerusalem èn a dresi sma drape. Baka dati a e abra Yordan-liba fu go gi sma leri na ini den foto fu a distrikt Perea. Ma heri esi a o drai kon baka na Yerusalem.

Te Yesus de na ini Perea, wan man e aksi en: „Masra, na wan tu sma nomo o kisi frulusu?” Kande a man sabi taki son kerki fesiman feni taki furu sma o kisi frulusu aladi tra kerki fesiman feni taki wan tu sma nomo o kisi frulusu. Ma Yesus e drai a tori. Na presi fu taki omeni sma o kisi frulusu a e sori san wan sma musu du fu man kisi frulusu. A e taki: „Du ala muiti fu pasa a smara doro go na inisei.” Iya, wan sma musu meki tranga muiti. Fu san ede? Yesus e taki: „Furu sma o pruberi fu go na inisei, ma den no sa man go.”​—Lukas 13:23, 24.

Yesus e fruteri wan agersitori fu sori den sma taki a de fanowdu fu meki tranga muiti fu kisi frulusu. A e taki: „Te a masra fu na oso opo go sroto a doro kaba, dan unu o tanapu na dorosei e naki na tapu a doro èn unu o taki: ’Masra, opo a doro gi wi.’ . . . Ma a o taigi unu: ’Mi no sabi fu pe unu komoto. Unu komoto na mi tapu, un ogriman!’”​—Lukas 13:25-27.

Yesus e taki dyaso fu wan sma di e begi fu kon na inisei aladi a doro sroto kaba. Ma soleki fa a sori, dan a sma lati fu di a kon na wan ten di bun gi en. A ben musu kon moro fruku, awinsi a no ben de wan bun ten gi en. Na dati o pasa nanga furu sma di ben kan kisi wini fu den sani di Yesus leri den, ma den no teki na okasi dati. Den sma disi no poti a tru anbegi na a fosi presi na ini den libi. Furu sma no poti bribi na ini Yesus, a sma di Gado seni kon fu frulusu den. Yesus taki dati den sma disi o „krei èn kaw tifi” te den o trowe den na dorosei. Toku sma o kon „fu owstusei, west-sei, noordsei nanga zuidsei” fu arki Yesus. Iya, sma fu ala kondre „o sidon na a tafra na ini a Kownukondre fu Gado”.​—Lukas 13:28, 29.

Yesus e taki: „We, wan tu fu den lastiwan o tron den fosiwan, èn wan tu fu den fosiwan o tron den lastiwan” (Lukas 13:30). Den „lastiwan” di o tron den fosiwan, na den mofinawan nanga den trakondre sma di den Dyu e wisiwasi. Den „fosiwan” di o tron den lastiwan, na den Dyu kerki fesiman di e meki bigi taki den na bakapikin fu Abraham. A grupu disi di o de den „lastiwan” no abi warderi gi san Gado du gi den. Dati meki den no o go na ini Gado Kownukondre srefisrefi.

Son Fariseiman e kon na Yesus èn den e taigi en: „Opo gowe fu dya, bika Herodes [Antipas] wani kiri yu.” A kan taki na Kownu Herodes srefi bigin panya a tori disi fu meki Yesus komoto na ini a kontren fu en. Kande Herodes e frede  taki a o tyari a nen baka taki a kiri wan profeiti, soleki fa dati ben pasa di den kiri Yohanes a Dopuman. Ma Yesus e taigi den Fariseiman: „Go taigi a bedrigiman dati: ’Tide nanga tamara mi o puru ogri yeye na sma tapu èn mi o meki sma kon betre, èn na a di fu dri dei mi o kaba mi wroko’” (Lukas 13:31, 32). A wortu di Yesus gebroiki dyaso gi „bedrigiman” abi fu du nanga wan sabanadagu di sma sabi leki wan meti di lai triki. Yesus no o meki Herodes noso iniwan tra sma kori en fu gowe fu drape èn a no o meki den hasti en fu du a wroko fu en. A o tan du a wroko di en Papa gi en teleki a ten doro di en Papa poti fu tapu nanga a wroko dati.

Now Yesus o go na Yerusalem. Fu san ede? Ensrefi e taki: „A no fiti fu kiri wan profeiti dorosei fu Yerusalem” (Lukas 13:33). Nowan Bijbel profeititori e taki dati a Mesias musu dede na ini a foto dati. Ma fu san ede Yesus e taki dati den o kiri en drape? Fu di Yerusalem na a mamafoto fu a kondre, pe a Grankrutu fu den Dyu de di abi 71 memre. Na drape den e krutu den sma di den e si leki falsi profeiti. Boiti dati, na drape sma e tyari meti leki ofrandi. Sobun, Yesus e frustan taki den no o kiri en na wan tra presi.

Nanga sari Yesus e taki: „Yerusalem, Yerusalem, di kiri den profeiti èn di ston den sma kiri di Gado seni kon na yu. Omeni leisi mi ben wani tyari den pikin fu yu kon na wán neleki fa wan mamafowru e tyari den pikin fu en kon na wán na ondro en frei, ma unu no ben wani! Luku, Gado o gowe libi a tempel disi” (Lukas 13:34, 35). A pipel no wani poti bribi na ini a Manpikin fu Gado èn dati meki den o kisi strafu!

Fosi Yesus doro Yerusalem, wan fesiman fu den Fariseiman e kari en fu kon nyan na en oso na Sabat-dei. Den sma e luku finifini san Yesus o du, fu di wan man de drape di abi wan siki di e meki en skin sweri (Nofo tron wan sma en futu e sweri te a abi a siki disi). Yesus e aksi den Fariseiman nanga den leriman fu Wet: „Sma kan meki trawan kon betre na Sabat-dei?”​—Lukas 14:3.

Nowan sma e piki en. Yesus e dresi a man, dan a e aksi den: „Te un manpikin noso un mankaw fadon go na ini wan peti na Sabat-dei, dan suma fu unu no o hari en puru wantewante?” (Lukas 14:5) Agen den no man piki en, fu di den sabi taki a abi leti.