Kwa nyengu yitali, Yesu wasambizanga kweniso kuchizga ŵanthu ku Yudeya ndi ku Yerusalemu. Pavuli paki, wanguyambuka Msinji wa Yorodani ndi kuluta ku Pereya ko wangusambiza ŵanthu mumatawuni ngakupambanapambana. Kweni pati pajumpha nyengu yimanavi, wanguwere so ku Yerusalemu.

Pa nyengu yo Yesu wenga ku Pereya, munthu munyaki wangumufumba kuti: “Ambuya, kumbi ŵanthu akutaskika mbamanavi?” Munthu mwenuyu watenere kuti wayiziŵanga nkhani yo alongozgi a visopa asuskananga yakuti mbanthu anandi wuli wo azamutaskika. M’malu mwakuti wamuki kuti mbanthu alinga wo azamutaskika, Yesu wangukamba vo munthu wakhumbika kuchita kuti wazitaskiki. Iyu wanguti: “Yesesani kusere pakhomu lifinyi.” Ivi vilongo kuti munthu wakhumbika kuchita phamphu kuti wazitaskiki. Ntchifukwa wuli ve viyo? Yesu wangukamba kuti: “Nditikukambiyani kuti ŵanthu anandi azamukhumba kuserepu kweni azamutondeka.”—Luka 13:23, 24.

Pakukhumba kulongo kuti munthu wakhumbika kuyesesa ukongwa kuti wazitaskiki, Yesu wangukamba ntharika yakuti: “Asani mweneku wa nyumba wasoka ndi kujala chisasa, yimwi mwazamukuma kubwalu ndi kugong’osa pachisasa ndipu mwazamukamba kuti, ‘Ambuya, tijuliyeniku.’ . . . Kweni iyu wazakukukambiyani kuti, ‘Ndiziŵa cha ko mwatuwa. Tuwanipu yapa, mosi yimwi akuchita vinthu vambula urunji!’”—Luka 13:25-27.

Ntharika yo Yesu wangukamba yilongo masuzgu ngo munthu yo wanguswera wangukumana nangu. Chinanga kuti munthu mwenuyu wangusoka nyengu yo iyu wawonanga kuti njamampha, kweni wanguchisaniya kuti mweneku wa nyumba wajala chisasa. Iyu wakhumbikanga kusoka luŵi chinanga kuti nyengu yenga yechendakwani. Venivi, viyanana ŵaka ndi mo venge ndi ŵanthu anandi wo atingi ayanduwengi pa nyengu yo Yesu waŵasambizanga. Yiwu ŵenga ndi mwaŵi wakuŵika kusopa kwauneneska pa malu ngakwamba pa umoyu wawu kweni angutondeka kuchita venivi. Ŵanthu wo Yesu wangutumika kuti wakaŵapharazgiyi, angukana nthowa yo Chiuta wangupereka kuti azitaskiki. Yesu wangukamba kuti yiwu ‘azamuliya ndi kukukuta minyu’ asani aziponyeka kubwalu. Kweni ŵanthu amitundu yosi akutuliya “kuvuma, kuzambwi, kumpotu, ndi kumwera, . . . azamuja pathebulu mu Ufumu waku Chiuta.”—Luka 13:28, 29.

Yesu wangukamba kuti: “Pe ŵanthu wo ŵe kukumaliya [nge ŵanthu amitundu yinyaki kweniso Ayuda wo akandirizgikanga] wo azamuja kukwamba ndipuso pe ŵanthu wo ŵe kukwamba [alongozgi avisopa Achiyuda wo ajikuzganga ukongwa chifukwa chakuti ŵenga mphapu yaku Abrahamu] wo azamuja kukumaliya.” (Luka 13:30) Mazu ngakuti “azamuja kukumaliya” ngang’anamuwa kuti ŵanthu ŵenaŵa wo ŵenga ambula kuwonga, azamusere cha mu Ufumu waku Chiuta.

Pavuli paki, Afarisi anyaki anguza kwaku Yesu ndipu angumukambiya kuti: “Nyamukani, tuwaniku kunu chifukwa Herodi [Antipasi] wakhumba kukubayani.” Panyaki Fumu Herodi yakambanga venivi chifukwa yakhumbanga kuti Yesu watuwemu muchigaŵa cho wenga. Herodi watenere kuti wachitanga mantha kuti nayu wajengi so mugulu lakubaya mchimi munyaki nge mo venge ndi kubayika kwaku Yohane Mubatizi. Kweni Yesu wangukambiya Afarisi wo kuti: “Lutani, mukamukambiyi kambwi yo kuti, ‘Awona! ndituzga viŵanda ndi kuchizga  ŵanthu msanawale ndi mawa, kweni pa zuŵa lachitatu ndimalizengi ntchitu yangu.’” (Luka 13:31, 32) Panyaki Yesu wangukamba kuti Herodi ndi “kambwi,” chifukwa chakuti kambwi wachita vinthu mwakuchenje ukongwa kweniso mwachinyengu. Chinanga kuti venga viyo, Yesu wangutuwaku cha ku Pereya chifukwa cha vo Herodi kweniso ŵanthu akambanga. Iyu wangulutirizga kuchita uteŵeti wo Awisi angumupaska mwakukoliyana ndi nyengu ya ŵanthu cha, kweni mwakukoliyana ndi nyengu yo Chiuta wangumukambiya.

Yesu wangulutirizga ulendu waki wakuwere ku Yerusalemu chifukwa wangukamba kuti: “Vingachitika cha kuti mchimi wabayikiyi kubwalu kwa Yerusalemu.” (Luka 13:33) Palivi uchimi wa m’Bayibolu wo ungukamba kuti Mesiya wazamubayikiya mutawuni yeniyi. Nanga ntchifukwa wuli Yesu wangukamba kuti wamubayikiya kwenuku? Yerusalemu yenga tawuni yikulu ya Yudeya ndipuso ndiku kwenga khoti la Ayuda lo lajanga ndi akuyeruzga 71. Khoti lenili laziŵikanga kuti Mphara Yikulu ya Milandu ndipu kwenuku ndiku ayeruzgiyanga ŵanthu wo aŵakambanga kuti mbachimi aboza. Kusazgiyapu pa fundu yeniyi, ku Yerusalemu ndiku ŵanthu aperekiyanga sembi za nyama. Ndichu chifukwa chaki Yesu wanguwona kuti kwenga kwambula kwenere kuti iyu wakabayikiyi kumalu nganyaki.

Pavuli paki, Yesu wangukamba kuti: “Yerusalemu, Yerusalemu, wakubaya achimi ndipuso wakuponya mya ŵanthu wo angutumika kwaku yiwi! Kanandi ndakhumbanga kuwunganiska ŵana ŵaku nge mo nyakhutu wawunganiskiya ŵana ŵaki mumapapa ngaki! Kweni yiwi ungukana. Awonani! Akujowoliyani nyumba yinu.” (Luka 13:34, 35) Ayuda akhumbikanga kulangika chifukwa chakuti angumukana Mwana waku Chiuta.

Yesu wechendaluti ku Yerusalemu, mulongozgi wa Afarisi wangumudaniya kunyumba yaki kuti wakaryi nayu chakurya pa zuŵa la Sabata. Ŵanthu anyaki wo angudanika, alereseskanga kuti awoni vo Yesu watingi wachitengi ndi munthu yo watamanga nthenda yakutupama yo wenga kunyumba kwenuku. (Munthu yo watama nthenda yeniyi, kanandi maji ngazaza mumalundi ndi mumaphazi.) Sonu Yesu wangufumba ŵanthu akuziŵa Dangu kweniso Afarisi kuti: “Kumbi ntchakwenere kuchizga pa Sabata pamwenga cha?”—Luka 14:3.

Kweni pengavi weyosi yo wangumuka. Pavuli paki, Yesu wanguchizga munthu yo watamanga ndipu wangufumba ŵanthu wo kuti: “Ndiyani waku yimwi yo asani ng’ombi yaki pamwenga mwana waki wangawa muchisimi pa zuŵa la Sabata wangaleka kumutuzgamu mwaliŵi?” (Luka 14:5) Yapa napu ŵanthu wosi angumumuka cha chifukwa Yesu wangukamba fundu yambula kususkika.