Jesús kamapaksama tatatlanin chu lichuwinama Dios kJerusalén chu xlikalanka Judea. Alistalh titaxtu kkgalhtuchokgo Jordán chu tsuku masiya kʼakgatunu kachikin nema tapakgsikgo kPerea, pero nialh makgas nataspita kJerusalén.

Anta kPerea, chatum chixku kgalhskin: «Malana, ¿pi kaj ni chalhuwa tiku nalakgtaxtukgo?». Max uma chixku katsi pi xpulalinanin takanajla litaʼakglhuwikgo komo lhuwa o ni lhuwa tiku nalakgtaxtukgo. Pero Jesús ni kgalhti xtakgalhskinin, wata wani tuku xlitatlawat xlakata nalakgtaxtukan: «Lu kaliskujtit natanuyatit kxatitsu malakcha». Chuna, lu talakaskin naliskujkan. Jesús wan tuku xlakata: «Lhuwa tiku natanuputunkgo, pero nila katitanukgolh» (Lucas 13:23, 24).

Xlakata namasiya pi xlakaskinka lu naliskujkan, Jesús wili akgtum liʼakxilhtit: «Akxni xmalana chiki liwana malakchuwanita malakcha, wixin nalakgatlakgtayayatit malakcha kkilhtin, nawanatit: “Malana, kakilamalakkiniw”. [...] Pero xla nakawaniyan: “Ni kkatsi niku xalanin wixin. ¡Kakintapanunitit, putum wixin xtlawananin tuku ni xaʼakgstitum!”» (Lucas 13:25-27).

Uma liʼakxilhtit lichuwinan chatum lataman tiku ni sokg chin, min akxni matlani chu akxni chin malakchuwakanita. Xtalakaskin pi sokg xchilh maski max ni matlani uma hora. Xtachuna kakitaxtuni tiku tlan xlitamakgtayakgolh tuku Jesús masiyama, pero ni xlakaskinka liʼakxilhkgo xaxlikana takaknin chu ni pulana wilikgo kxlatamatkan. Lhuwa tiku ni makglhtinamputun tuku Dios lakkaxwilinit xlakata nalakgmaxtunan. Jesús wan pi umakgolh latamanin “natasakgo chu namalaksanikgo xtatsankan” akxni nakatamakxtukan. Pero atanu latamanin «naminkgoyacha niku taxtu chichini chu niku tatsekga chichini chu knorte chu ksur», uma wamputun, xalak putum kachikinin chu «akxtum nawayankgo kxTamapakgsin Dios» (Lucas 13:28, 29).

Jesús wan: «Makgapitsi tiku xaʼawatiya, [akgtum liʼakxilhtit, tiku ni judíos chu judíos tiku kamakgapatinamaka] xapulana nawankgo, chu makgapitsi tiku xapulana, [xpulalinanin takanajla] xaʼawatiya nawankgo» (Lucas 13:30). Tiku ni paxtikatsininankgo, «xaʼawatiya» nawankgo, uma wamputun pi ni katitanukgolh kxTamapakgsin Dios.

Makgapitsi fariseos talakatsuwinikgo Jesús chu wanikgo: «Kapit alakatanu, xlakata Herodes [Antipas] makgniputunan». Max wa mapakgsina Herodes tiku chuna wanit xlakata Jesús nataxtu kʼuma kachikin. Xlakata wa mamakgnininalh Juan Mununa, max pekuan xlakata nalimawakakan pi namakgni atanu palakachuwina. Pero Jesús kawani fariseos: «Kapitit chu kawanitit ama wekgni: “¡Kaʼakxilhti! Kkatamakxtuma demonios chu kkamapaksama latamanin uku chu chali, chu xliʼakgtutu kilhtamaku nakmasputu”» (Lucas 13: 31, 32). Akxni Jesús limapakuwi Herodes «wekgni», Jesús tamalakxtumima xliskgalala uma animal. Pero Jesús ni katimastalh talakaskin pi Herodes chu atanu namalaktlawikgo tuku xlitlawat. Xla lakpuwanit namakgantaxti tuku xTlat lakgayawanit, chu chuna natlawa la lakkaxwilinit Dios chu ni wa lakchixkuwin.

Jesús an kJerusalén xlakata, chuna la wan, «chatum palakachuwina ni xlilat namakgnikan komo ni anta kJerusalén» (Lucas 13:33). Xlakata nitu xwankanit pi Mesías xlinit kʼuma kachikin, ¿tuku xlakata Jesús wan pi anta nani? Xlakata kJerusalén wi Sanedrín, tlakg xlakaskinka tribunal, nema 71 latamanin likgatsikgo, chu anta katalakkaxlakan tiku kalimawakakan pi nixaxlikana palakachuwinanin. Nachuna, kJerusalén makamastakan animales. Wa xlakata, Jesús akxilha pi ni xlilat nani kʼatanu kachikin.

Jesús xatalipuwan wan: «Jerusalén, Jerusalén, tiku kamakgni palakachuwinanin chu kaʼaktalamakgnikgo tiku kamalakgachanikan..., ¡lu makglhuwa kkamamakgstokgputulh minkamanan chuna la xatse xtilan kamamakxtumi xlakgskgatan kxtampin xpakgan! Pero wixin ni lakaskintit. ¡Kaʼakxilhtit! Dios naʼakgxtakgwili minchikkan» (Lucas 13:34, 35). Kachikin lakgmakgama xKgawasa Dios chu namalakgaxokgekan.

Akxni Jesús nina chan kJerusalén, chatum xpulalinakan fariseos wani pi kaʼalh wayan kxchik akgtum sábado. Tiku wilakgo anta kuentajtlawamakgo komo namapaksa chatum tiku na anta wi chu kgalhi hidropesía (uma tajatat tlawa pi nakun makni, liwaka chaxpan chu tantun). Jesús kakgalhskin fariseos chu tiku lu lakgapaskgo Limapakgsin: «¿Xlilat mapaksanankan Sábado, o ni?» (Lucas 14:3).

Pero niti kgalhtinan. Wa xlakata Jesús mapaksa chixku chu kakgalhskin: «¿Tiku wixin, komo xkgawasa o xtoro tamokgosa kʼakgtum pozo, ni tunkun katimakutulh maski Sábado?» (Lucas 14:5). Uma tuku wan amakgtum kaks kamalakawanipara chu nila kgalhtinankgo.