Okathi Yesu iixuttiha awe oYudeya ni oYerusalemu aahaapenuxa atthu anceene. Nuumala-vo, aahilapuwa Muro Yordani iixuttihaka mittetthe sa edistritu ya oPereya. Masi, moohipisa aahaana orowa oYerusalemu.

Okathi aari awe oPereya, mulopwana mmosa aahimukoha Yesu wira: “Pwiya, khino ari vakhani ale anrowa wopowa?” Woonasa wene, mulopwana ole aahisuwela wira ahooleli a itiini yaanivaanyihana akhala wira yaamoopowa atthu anceene aahiiso atthu vakhaani. Ohiya olavula nummuru na atthu anrowa woopowa, Yesu aalavunle etthu mutthu onitthuneya awe opaka wira oopowe. Owo aahimmye so: “Mwikhanyereriheke okela mukhora wophunyeya”. Mwekeekhai, mutthu ohaana wiimananiha vanceene. Nthowa xeeni? Yesu aatthokihenrye so: “Atthu anjene animwererya okela, masi animojela”.​—Luka 13:23, 24.

Ophavelaka olikanyiha otthuneya waya wiimananiha vanceene, Yesu aahimmye wira: “Okathi mwanene etthoko ontthunawe ovenya n’uwala mukhora, nyuwo munohala vaté. Vano munopajerya omana mukhor’owo, muhimyaka wira: ‘Pwiya, munihulele!’ . . . Owo onowakhulani-tho wira: ‘Nkinsuwela onkhumanyu. Mukhumase va, othene anyu munìra sotakhala’”.​—Luka 13:25-27.

Yesu aahilikanyiha mukhalelo wa mutthu ophiyale opuro oxeleliwe ene, woonasa wene onaphwanya mukhora owaliwe ene. Owo aahaana opeherya hata vaamuxankiha. Eyo yaahiwiiranela atthu anceene yaawo yaarowa ottottela mureerelo soowiixuttiha sa Yesu. Awo khiyaattottenle mureerelo eparakha yaarina aya ya opaka okokhorela wekeekhai okhala etthu yuulupale mookumini mwaya. Atthu ale anceene Yesu aarummwale awe, khiyeemerenrye ephiro Muluku aarumenle awe wira owoopole. Yesu aahimmye wira atthu ale yaarowa “wunla n’ulumanyiha maino”, okathi yaarowa aya woomoleliwa ota. Tthiri atthu a “onikhuma nsuwa n’okusini n’unikela nsuwa n’unikela epheyo” ni a maloko otheene, “anokilathi vamesa Momweneni wa Muluku”.​—Luka 13:28, 29.

Yesu aatthokihenrye so: “Akina yari òkiserya [atthu ale yahaakhanle aYuda ni aYuda yaahaaxiwa], anrowa okhala òpajerya: akina yari òpajerya [ahooleli a itiini sa aYuda yiihimya okhala osuulu wa Abrahamu], anrowa okhala òkiserya”. (Luka 13:30) Okhala wira aahimmye wira yaarowa okhala “òkiserya”, Yesu aaphavela ohimya wira yaari atthu oohixukhuru ni khiyaarowa okela Momweneni mwa Muluku.

AFarisi akina yaahirowa opuro aari Yesu khimuleela wira: “Nvenyé, mukhume elapo ela, mana Herodi [Antipa] onniphavela owivani”. Woonasa wene, Mwene Herodi aahilavula masu ale wira omwiirihe Yesu okhuma muttetthe ole. Pooti wira Herodi aanoova wiirela mpantta omwiiva profeta mukina, ntoko siisaale amwiivale  awe Yohani Mbatiza. Masi Yesu aahaaleela aFarisi ale wira: “Murowé, mwamuhimerye khwatté owo wira: miyo kinòmola malaikha òtakhala, kinavoniha aretta olelo ni melo: murotto kinomaleliha muteko aka”. (Luka 13:31, 32) Mwaha woomuhimya Herodi okhala “khwatté”, woona wene Yesu aahimya olavilavi wa khwatte. Masi, Yesu khaarowa owokiwa aahiiso okhanyereriwa ni Herodi aahiiso mutthu mukina. Maana aahaana omaleliha muteko aavahiwe awe ni Tiithi awe, moovarihana ni eprograma ya Muluku ohiya ya apinaatamu.

Yesu aahivikaniha mukwaha awe mpakha oYerusalemu, maana aahimmye wira: “Khavanrerela profeta okhwa elapo ekina, ohikhanle oYerusalemu”. (Luka 13:33) Iprofesia sa mBiibiliyani sinihimya wira Mesiya aarowa okhwa elapo ele, nto xeeni Yesu ohalaka ohimya wira aarowa okhwa elapo ele? Okhala wira oYerusalemu yaari ekapitaali, weiwo yaari aya eSineedrio yaarina makhulupale 71. Nave waari opuro yoole yaaphukeliwa aya atthu yooniwa okhala maprofeta oowootha. Nave-tho waari opuro saavahiwa aya mikuttho sa inama. Tivonto, Yesu aahisuwela wira khivaareerela wiiviwa opuro mukina.

Yesu aahikhupanyerya muttetthe wa oYerusalemu, oriki: “Yerusalemu! Nyuwo Yerusalemu! Nyuwo muniwiva maprofeta, munavonyakasa maluku atthu ale Muluku òrumihenlyaweni! Imara sinjene kàphavela wathukumanya atthu anyu, ntoko mwalyakhu onapuramelawe axan’awe mmapuphani: nto nyuwo khuhitthuna. Vano emp’anyu enrowa okhala milepe”. (Luka 13:34, 35) Nloko nne naamukhoottale Mwaana a Muluku namphukeliwa.

Yesu ohinatthi orowa oYerusalemu, mukhulupale a aFarisi aahimulattula orowa olya owannyawe nihiku na Saabadu. Atthu ale yaalattuliwe yaaniphavela woona etthu Yesu aarowa awe ompakela mulopwana aipelana (oretta onimwiiriha mutthu wiipelana mmettoni aahiiso munawuni). Yesu aahaakoha aFarisi yaawo yaasuwela saana Nlamulo, oriki: “Onvoniha muretta nihiku na Sábadu onnèmihiwa walá onkhottihiwa?”​—Luka 14:3.

Khuuvo mutthu aakhunle. Yesu aahimpenuxa mulopwana ole ni aahaakoha aFarisi wira: “T’ani a nyuwo onìra mwan’awe walá enyompe awe emorenlene vatthiyani nihiku na Sábadu, khuhikumiha nananoru, nihiku nenlo na Sábadu?” (Luka 14:5) Nave-tho, aYuda ale khiyaakhunle etthu.