Hi Jesus nanutdo ngan nanambal ha Judea ngan Jerusalem. Katapos tinabok hiya ha Salog Jordan basi manutdo ha tagsa nga syudad ha distrito han Perea. Pero diri mag-iiha, mabalik hiya ha Jerusalem.

Samtang nakadto ha Perea, may lalaki nga nagpakiana ha iya: “Ginoo, gutiay la ba an matatalwas?” Bangin maaram ito nga lalaki nga gindidebatihan han mga lider han relihiyon kon damu o gutiay la an matatalwas. Imbes nga igsumat kon pira an matatalwas, nagpokus hi Jesus kon ano an angay buhaton basi matalwas. Hiya nagsiring: “Paniguro gud kamo pagsulod ha haligot nga purtahan.” Oo, kinahanglan maniguro o mangalimbasog. Kay ano? Hi Jesus nagsaysay: “Susumatan ko kamo, damu an mangangalimbasog pagsulod pero diri hira makakahimo.”—Lucas 13:23, 24.

Basi iilustrar nga kinahanglan maniguro gud, hi Jesus nagsiring: “Kay pagbuhát han tagbalay ngan pagtrangkahi han purtahan, aadto kamo natindog ha gawas ngan nagtutuktok ha purtahan, nasiring, ‘Ginoo, abrihi kami.’ . . . Pero masiring hiya ha iyo, ‘Diri ako maaram kon diin kamo tikang. Iwas ha akon, kamo ngatanan nga magburuhat hin karaotan!’”—Lucas 13:25-27.

Iginpapakita hini an makuri nga kahimtang han usa nga inabot nga urhi—posible nga tungod kay kombinyente ito para ha iya—ngan pag-abot niya sarado na an purtahan ngan nakatrangka. Nagtemprano unta hiya bisan kon diri ito kombinyente para ha iya. Sugad hito an nahitabo ha damu nga nagpahimulos unta tikang ha igintutdo ni Jesus. Waray nira salingabota an higayon nga unahon ha ira kinabuhi an tinuod nga pagsingba. Kadam-an han mga tawo nga amo an hinungdan han pagkanhi ni Jesus waray kumarawat han tagana han Dios nga katalwasan. Hi Jesus nagsiring nga ‘mananangis ngan mangingigot an ira mga ngipon’ kon ilabog na hira ha gawas. Pero an mga tawo “tikang ha este, weste, norte, ngan sur,” oo, tikang ha ngatanan nga nasud, ‘malingkod ha may lamesa ha Ginhadian han Dios.’—Lucas 13:28, 29.

Hi Jesus nagsaysay: “May mga nauurhi [sugad han diri Judio ngan gintatalumpigos nga mga Judio] nga mahiuuna, ngan may mga nahiuuna [mga lider han relihiyon nga iginhahambog an ira pagin tulin ni Abraham] nga mauurhi.” (Lucas 13:30) An ira pagin ‘urhi’ nagpapasabot nga an sugad nga diri mapasalamaton nga mga indibiduwal diri gud makakapanunod ha Ginhadian han Dios.

May mga Pariseo nga kumadto kan Jesus ngan nagsagdon ha iya: “Gawas ngan iwas dinhi, kay karuyag ni Herodes [Antipas] nga patayon ka.” Posible nga hi Hadi Herodes mismo an nagpatikang hini nga hurobhurob basi paiwason hi Jesus ha ira lugar. Bangin nahahadlok hi Herodes nga mahidabi hiya ha kamatay han usa pa nga propeta, pariho han iya iginpapatay nga hi Juan nga Parabaptis. Pero ginsidngan ni Jesus an mga Pariseo: “Kadto kamo ngan sumati ito nga garong, ‘Pamati! Nagpapagawas ako hin mga demonyo ngan nananambal yana pati buwas, ngan ha ikatulo ka adlaw matatapos ako.’” (Lucas 13:31, 32) Ha pagtawaga kan Herodes nga “garong,” bangin iginpapakita ni Jesus kon mationan-o ka tuso an mga garong. Pero hi Jesus diri makukontrol o madadali-dali ni Herodes o han bisan hin-o. Tutumanon niya an toka nga iginhatag han iya Amay, uyon ha panahon nga igintanda han Dios, diri han tawo.

Nagpadayon hi Jesus ha iya pagbiyahe ngadto ha Jerusalem kay sugad han iya ginsiring, an “usa nga propeta diri puydi patayon ha gawas han Jerusalem.” (Lucas 13:33) Waray tagna ha Biblia nga nasiring nga an Mesias kinahanglan mamatay dida hito nga syudad, salit kay ano nga nagsiring hi Jesus nga kinahanglan niya mamatay didto? Tungod kay an Jerusalem amo an kapital nga syudad diin naukoy an 71 nga membro han Sanhedrin, an hitaas nga korte, ngan didto ginbibista an mga gin-akusaran sugad nga buwa nga mga propeta. Dugang pa, didto iginhahalad an mga hayop. Salit nasantop ni Jesus nga diri angayan nga mamatay hiya ha iba nga lugar.

Hi Jesus masurub-on nga nagsiring: “Jerusalem, Jerusalem, an parapamatay han mga propeta ngan nagbabato han mga ginsugo ngada ha imo! Makadamu ako nangalimbasog nga tirukon an imo mga anak, sugad hin ugang nga nagtitirok han iya mga pisô ha ilarom han iya mga pako, pero diri kamo naruruyag! Kitaa! Babayaan han Dios an iyo balay.” (Lucas 13:34, 35) Iginsalikway han nasud an Anak han Dios, ngan kinahanglan nira atubangon an resulta hito!

Antes pa umabot hi Jesus ha Jerusalem, gin-imbitar hiya han usa nga lider han mga Pariseo basi kumaon ha iya balay durante han Sabbath. Ginbinantayan han mga nakadto kon ano an bubuhaton ni Jesus ha lalaki didto nga nanhuhupong (tungod han damu nga natirok nga tubig ha lawas, kasagaran ha bitiis ngan tiil). Ginpakianhan ni Jesus an mga Pariseo ngan an mga eksperto ha Balaud: “Uyon ba ha Balaud an pagtambal ha adlaw han Sabbath o diri?”—Lucas 14:3.

Waray hira bumaton. Gintambal ni Jesus an lalaki katapos nagpakiana: “Hin-o ha iyo an diri makadto dayon basi kuhaon an iya anak o toro kon mahulog ito ha atabay ha adlaw han Sabbath?” (Lucas 14:5) Waray na liwat hira makabaton han iya maopay nga pangatadongan.