Iesu pala kö hnine la hnalapa ne la ketre Faresaio, nge nyidrëti a ase aloine lo trahmanyi hna tithi hnei mec. Iesu a nyiqaane goeëne jë la itre xa atr hna hën, nge angatr a isa thele göhnë ka mama. Matre nyidrëti a hamë ini jë koi angatr, ini göi aqane troa ipië. Öni nyidrë:

“Ame la kola hë eö troa xen, the lapa kö ngöne la göhnë ka mama. Ke maine jë, hna hane fe hëne la ketre atr ka draië catre kö hui eö. Nge e cili, tro pë hë la atre ce könë epon a traqa koi eö me hape: ‘Nue pi la göhnë i eö koi nyidrë.’ Nge tro hë eö lai a hmahma, me lapane la göhnë ka tha mama.”—Luka 14:8, 9.

Thupene lai öni Iesu: “Ngo e kola hë eö, lapane ju la göhnë ka co catr, matre e traqa jë öhnyi eö hnene la atre hë eö, tro hë angeice lai a qaja koi eö ka hape: ‘Sineeng, trohemi pe kowe la göhnë ka draië.’ Nge e cili, tro ha atrunyi eö qëmekene la nöjei hna könën.” Tha Iesu kö e celë a ithuecatre troa imetrötrekeu, ngo öni nyidrë pe: “Ke ame la atre sipu selë angeice kö, tro ha thaipiën, ngo ame la atre ipië, tro ha adraiën.” (Luka 14:10, 11) Eje hi, nyidrëti a ithuecatre koi itre ka drei nyidrë troa hane ipië.

Thupene lai, nyidrëti a hamëne jë la ketre ini kowe la Faresaio ka hë nyidrë. Nyidrëti a qaja la pengöne ihë ka amadrinë Akötresie. Öni Iesu: “Ame la eö a hnëkë nyikein, maine nyine xeni hej, the könëne kö la itre sinee i eö, maine trejin me eö, maine itre atr hnei eö hna atre, maine itre trenamo ka lapa easenyi eö. Ke ijiji angatre hi troa könë eö hmaca, matre të koi eö. Ngo maine eö a hnëkë xen, hëne jë la itre ka pë ewekë, me itre sinatr, me itre ka peje ca, me itre timek; nge tro hë eö a madrin, ke pëkö nyine tro angatr a të hmaca koi eö.”—Luka 14:12-14.

Nyipici laka, canga majemine hi së hëne la itre sinee së, me itre hne së hna atre, maine itre ka lapa easeny. Nge öni Iesu, tha ewekë ka ngazo kö lai. Ngo nyidrëti pe a amamane ka hape, e tro sa thuane la itre ka aja ixatua, tune la itre ka pë ewekë, me itre ka peje ca, me itre timek, tro hë së a manathith. Öni Iesu kowe la atre ka hë nyidrë: “Tro pe eö lai a kepe thupen ngöne la ijine troa amelene hmaca la itre atr ka meköt.” Matre önine jë hi la ketre hna könën: “Manathithi la atre xeni ngöne la Baselaia i Akötresie.” (Luka 14:15) Trotrohnine hi angeic la etrune la manathithi celë. Ngazo pe, tha angatr asë kö la ka mekune tun. Matre Iesu a hamëne jë la ketre ceitun, öni nyidrë:

“Hnene la ketre atr hna kuci xeni atruny koi hej, me könëne la ka ala nyim. Matre, nyidrëti a upe pi la ketre hlue i nyidrë hmekune la hawa ne xen, matre troa qaja kowe la itre hna könën ka hape: ‘Traqa pi, ke ase hë hnëkën asë.’ Ngo, hnei angatr hna nyiqaane qeje jole koi nyën. Önine la hnapan, ‘Hnenge hna itö hlapa, nge nyipiewekë tro ni a pane tro troa wang. Matre menu hë ni, ngo tha ijijinge kö troa traqa.’ Nge önine fe la ketre ka hape, ‘Hnenge hna itöne la treene lao kau, nge eni hë la a tro troa wai nyudren. Matre menu hë ni, ngo tha ijijinge kö troa traqa.’ Nge önine hmaca kö la ketre ka hape, ‘Eni petre hi la a ase faipoipo, matre tha ijijinge kö troa traqa.’ ”—Luka 14:16-20.

Tha itre nyipi jole kö! Eje hi, qëmekene tro la ketre a itö hlapa maine kau, tro angeic lai a pane goeëne hnyawa, matre nyine u la troa goeën hmaca e thupen? Nge ame lo hnaakönin, tha angeice kö a hnëkë faipoipo ke ka ikötresai hë angeic, matre pëkö ka sewe angeic troa kapa la ihë ka tru celë. Matre ame ju hi la kola drenge lai hnei maseta, elëhni jë hi angeic, matre öni angeic kowe la hlu:

 “Canga tro jë kowe la itre gojenyi ka tru, me ngöne la itre neköi gojeny, nge ce bëeke jë memine la itre ka pë ewekë, me itre sinatr, me itre timek, me itre ka peje ca.’ Ame hë e thupen, önine la hlue kowe la maseta i angeic ka hape, ‘Maseta, ase hë kuca la hnei nyipëti hna amekötin, ngo hetre göhnë pala kö.’ Önine hmaca jë hi la maseta kowe la hlue ka hape, ‘Tro hmaca jë kowe la gojenyi me kowe la itre hmene gojeny, nge iele angatre jë troa lö hnin la umang, matre tiqa pi ej.’ Ke eni a qaja hnyawa koi nyipunie laka, pëkö ala casi qaathene lo itre hna könën ka troa lö, me xeni heji theng.”—Luka 14:21-24.

Itre trengewekë i Iesu a amamane laka, jëne nyidrë, Iehova a aijijëne la itre atr troa hane sine la Baselaia e hnengödrai. Angetre Iudra me itre hene ne hmi la itre hna pane könën. Ngo ala nyimu thei angatr ka thipëne la ihë, ene lo maca hna cainöjën hnei Iesu. Ngo tha tro kö a hmaca e celë. Ke thenge la hna qaja hnei Iesu, hetre hnaaluene ihë, ngo tro hi a hëne la angetre Iudra ka ipië, me itre ka sine la hmi angatr. Nge tro fe a hetre hnaakönine ihë, ihë kowe la itre atr laka, tha ijiji Akötresieti kö angatr, tune lo aqane mekune i angetre Iudra.—Itre Huliwa 10:28-48.

Eje hi, itre trengewekë i Iesu a anyipicine lo hna qaja hnene lo hna könën ka hape: “Manathithi la atre xeni ngöne la Baselaia i Akötresie.”