Thutha wa kũhonia mũndũ uma na mũrimũ watũmĩte aimbe mwĩrĩ nyũmba-inĩ ya Mũfarisai, Jesu agaikara o kũu. Akerorera ageni angĩ magĩthuura handũ harĩa hatĩĩku makĩria iruga-inĩ, na akahũthĩra mweke ũcio kũrutana igũrũ rĩgiĩ wĩnyihia.

Akoiga: “Rĩrĩa wetwo nĩ mũndũ iruga-inĩ rĩa ũhiki-rĩ, ndũgaikarage thĩ handũ harĩa ha gĩtĩo mũno. Hihi ahota gũkorũo etĩte mũndũ ũngĩ mũtĩĩku gũgũkĩra. Nake mũndũ ũrĩa ũmwĩtĩte inyuerĩ oke akwĩre, ‘Reke mũndũ ũyũ aikare hau ũrĩ.’ Nawe hĩndĩ ĩyo ũthiĩ ũconokete ũgaikare handũ harĩa hatarĩ ha gĩtĩo.”​—Luka 14:​8, 9.

Jesu agacoka akoiga: “No rĩrĩa wetwo-rĩ, thiaga ũgaikara handũ harĩa hatarĩ ha gĩtĩo mũno, nĩguo mũndũ ũrĩa ũgwĩtĩte oka, akwĩre atĩrĩ, ‘Mũrata, thiĩ harĩa ha gĩtĩo.’ Nawe nĩ ũgũtĩĩka harĩ ageni acio angĩ othe.” Ũndũ ũcio to kuonania wonanagia mĩtugo mĩega. Jesu agathiĩ na mbere kuuga: “Nĩ gũkorũo mũndũ o wothe wĩtũũgagĩria nĩ akaanyihio, na ũrĩa wothe wĩnyihagia nĩ agaatũgĩrio.” (Luka 14:​10, 11) Arageria kuonia arĩa maramũthikĩrĩria atĩ nĩ magĩrĩirũo gũkũria wĩnyihia.

Jesu agacoka akagweta ũndũ ũngĩ Mũfarisai ũcio ũmũnyitĩte ũgeni angĩĩruta naguo, wĩgiĩ njĩra ya gwĩtana iruga ĩrĩa ĩngĩkenia Ngai. Akoiga: “Rĩrĩa ũkũhaarĩria iruga rĩa mũthenya kana rĩa hwaĩ-inĩ-rĩ, ndũgetage o arata aku kana ariũ a thoguo kana andũ a mbarĩ cianyu kana itonga cia itũũra. O nao hihi mahota gũgaagwĩta iruga-inĩ, naguo ũndũ ũcio ũtuĩke irĩhi harĩ wee. No rĩrĩa wahaarĩria iruga, ĩtaga arĩa athĩni, arĩa mathuaga, cionje, na atumumu; na nĩ ũrĩgĩaga na gĩkeno, tondũ acio matirĩ kĩndũ gĩa gũkũrĩha nakĩo.”​—Luka 14:​12-14.

Kaingĩ mũndũ arĩ na iruga etaga arata, andũ a mbarĩ ciao, kana andũ a itũũra, na Jesu ndaroiga atĩ nĩ ũũru. No aratĩtĩrithia atĩ gwĩta andũ ta athĩni, cionje kana atumumu no gũtũme mũndũ arathimwo makĩria. Jesu agathiĩ na mbere kwĩra Mũfarisai ũcio: “Nĩ ũkaarĩhwo hĩndĩ ĩrĩa andũ arĩa athingu makaariũkio.” Ũmwe wa arĩa metĩtwo agetĩkania nake akoiga: “Gũkena nĩ mũndũ ũrĩa ũkaarĩagĩra Ũthamaki-inĩ wa Ngai.” (Luka 14:15) Arona ũndũ ũcio ũgaakorũo ũrĩ gĩtĩo kĩnene. Ĩndĩ, o ta ũrĩa Jesu arathiĩ na mbere gũtaarĩria, ti andũ othe marona ũguo.

Akoiga: “Mũndũ ũmwe nĩ aahaarĩirie iruga inene rĩa hwaĩ-inĩ, na agĩta andũ aingĩ. . . . Agĩtũma ngombo yake ĩkeere arĩa metĩtwo atĩrĩ, ‘Ũkai, tondũ maũndũ mothe rĩu nĩ mahaarĩrie.’ Ĩndĩ othe makĩambĩrĩria kũruta ciĩgwatio. Mũndũ wa mbere akĩmwĩra, ‘Nĩ ndĩragũrire mũgũnda na nĩ ndĩrabatara gũthiĩ kũũrora; thiĩ ũmwĩre andekere.’ Ũngĩ akiuga, ‘Nĩ ndĩragũrire ndegwa ikũmi na ndĩrenda gũthiĩ gũcigeria; thiĩ ũmwĩre andekere.’ Nake ũngĩ akiuga, ‘No hĩndĩ ndĩrahikanirie, kwoguo ndikũhota gũka.’”​—Luka 14:​16-20.

Icio no ciĩgwatio itarĩ na mũthingi! Mũndũ ambaga kũrora mũgũnda atanaũgũra kana akageria ndegwa atanacigũra, kwoguo ũcio ti ũndũ ũrabatara mĩtũkĩ. Mũndũ wa gatatũ nake ndarehaarĩria kũhikania. Nĩ arĩkĩtie kũhikania kwoguo ũndũ ũcio ndwagĩrĩirũo kũgiria etĩkĩre rĩĩtana rĩu rĩa bata. Ũrĩa ũhaarĩirie iruga aigua ũguo, akeera ngombo yake:

“Thiĩ narua njĩra-inĩ iria nene o na tũcĩra-inĩ twa itũũra, ũrehe andũ arĩa athĩni na arĩa cionje na atumumu na arĩa mathuaga.” Thutha wa ngombo ĩyo gwĩka ũguo, gũkabatarania andũ makĩria. Mwathi wayo agacoka akamĩĩra: “Thiĩ barabara-inĩ na nja ya itũũra ũmeere moke, nĩguo nyũmba yakwa ĩiyũre. Nĩ gũkorũo ngũmwĩra atĩ, gũtirĩ mũndũ o na ũmwe wa acio maretĩtwo ũgũcama iruga rĩakwa.”​—Luka 14:​21-24.

 Ngerekano ĩyo Jesu arĩkia gũtaarĩria ĩronania wega ũrĩa Jehova Ngai aatũmire Jesu Kristo ete andũ nĩguo makagaya Ũthamaki wa igũrũ. Ayahudi, na makĩria atongoria a ndini, nĩo maarĩ a mbere gwĩtwo. No aingĩ ao makĩrega rĩĩtana rĩu, ihinda-inĩ rĩothe rĩa ũtungata wa Jesu. O na kũrĩ ũguo, kũrĩ andũ angĩ mangĩetirũo. Ngerekano ĩyo ya Jesu ĩronania atĩ nĩ kũngĩkagĩa rĩĩtana rĩa kerĩ kũrĩ Ayahudi arĩa monagwo matarĩ kĩene, na andũ arĩa maagarũrĩte wĩtĩkio magatuĩka Ayahudi. Thutha ũcio, nĩ kũngĩkagĩa rĩĩtana rĩa gatatũ na rĩa mũico kũrĩ andũ arĩa Ayahudi monaga matarĩ etĩkĩrĩku harĩ Ngai.​—Atũmwo 10:​28-48.

Hatarĩ nganja, ciugo icio cia Jesu nĩ iranyita mbaru ũndũ ũrĩa ũkũgwetetwo nĩ ũmwe wa arĩa metĩtwo ũrĩa ugire: “Gũkena nĩ mũndũ ũrĩa ũkaarĩagĩra Ũthamaki-inĩ wa Ngai.”