Jesu usali mwa ndu ya Mufalisi, hamulaho wakufolisa muuna yomuñwi yanaakula butuku bwa kululuha mubili. Jesu ulemuha kuli baenyi babañwi babatile kwa sico baketa lipula zekutekeha, mi uitusisa muinelo wo kwa kuluta batu tuto ya buikokobezo.

Jesu uli: “Haumemiwa ki mutu kwa mukiti wa linyalo, usike wayo ina mwa sibaka sesikutekeha hahulu. Kakuli mwendi kunani yomuñwi yakutekeha hahulu kukufita yamemilwe. Cwale yamimemile mwa bubeli bwamina ukataha ni kuto li ku wena: ‘Hakusiyele yo sibaka.’ Mi cwale wena ukaya inze uswabile kuyo ina mwa sibaka sa kwatasi hahulu.”—Luka 14:8, 9.

Jesu hape uli: “Haumemilwe, uyo ina mwa sibaka sa kwatasi hahulu, kuli cwale yena yakumemile hakafita, ato li ku wena: ‘Mulikani, hakuye mwa sibaka sesipahami sani.’ Mi wena ukakutekiwa fapilaa beumemilwe ni bona kaufela.” Bo ki buikokobezo luli. Jesu ubulela kuli: “Kakuli mutu kaufela yaipahamisa ukakokobezwa, mi mutu kaufela yaikokobeza ukapahamiswa.” (Luka 14:10, 11) Kaniti, ususueza bateelezi bahae kuba ni buikokobezo.

Jesu hape uluta Mufalisi yanaa mumemile mwaswanela kulukiseza sico sa mulalelo ka nzila yetabisa Mulimu. Uli: “Haulukisa sico sa musihali kamba mulalelo, usike wabiza balikani bahao, banyani kamba bahulwani bahao, bahabo wena, kamba bafumi beuyahile ni bona. Kakuli mwendi bakasuhana bakumema ni bona, mi yeo ifetuhe tifo ku wena. Kono haulukisa mukiti, umeme babotana, liyanga za mahutu, lihole, ni libofu; mi ukataba, kabakala kuli habana sebaka kukutiseza.”—Luka 14:12-14.

Batu bamemanga kwa sico balikani babona, bahabo bona, kamba babayahile ni bona, mi Jesu habuleli kuli kufosahalile kueza cwalo. Kono ubonisa kuli kufa sico kubaba mwa butokwi, babacwale ka babotana, liyanga za mahutu, kamba libofu, kutahisa limbuyoti zetuna. Jesu ubulelela yamumemile kwa sico kuli: “Wena ukakutisezwa ka nako ya zuho ya babalukile.” Yomuñwi wa babamemilwe ulumela zabulela Jesu, mi uli: “Unani tabo mutu yaca mwa Mubuso wa Mulimu.” (Luka 14:15) Ulemuha kuli yeo ki tohonolo yetuna. Nihakulicwalo, haki batu kaufela babaitebuha tohonolo yeo, sina moiboniseza swanisezo ya Jesu.

Jesu uli: “Mutu yomuñwi naalukisa mulalelo omutuna, mi amema batu babañata. Aluma mutangaa hae . . . kuli ayo taluseza babamemilwe, ali: ‘Hamutahe, kakuli lika kaufela cwale lilukile.’ Kono kaufelaa bona bakala kuitatula ka nzila yeswana. Wapili ali ku yena: ‘Nilekile simu mi nitokwa kuyo ibona; uniswalele, nipalezwi kutaha.’ Mi yomuñwi ali: ‘Nilekile mapulu a licoko zeketalizoho mi nisayo alika; uniswalele, nipalezwi kutaha.’ Mi yomuñwi hape ali: ‘Kihona nisazo nyala, mi ka libaka leo hanikoni kutaha.’”—Luka 14:16-20.

Ao haki mabaka autwahala! Hañata mutu utatubanga simu kamba limunanu pili asika lileka kale, ka mukwa ocwalo, mutu hatokwi kumatela kuyo libona hasa lilekile. Muuna wabulaalu haitukisezi kunyala. Unyezi kale, ka mukwa ocwalo, taba yeo haimupalelwisi kuamuhela memo ya butokwa. Mulenaa hae hautwa mabaka ao, ubulelela mutangaa hae ka bunyemi kuli:

“Hakuye kapili mwa makululu ni mwa linzila za muleneñi, mi uyo tisa babotana ni liyanga za mahutu ni libofu ni lihole.” Mutanga hasaatisize batu bao kaufela, kusanani sibaka mwa muzuzu. Mulenaa hae hape umubulelela kuli: “Hakuye mwa mikwakwa ni mwa tunzilanyana, mi uyo susueza batu kutaha, kuli ndu yaka itale. Kakuli  namibulelela nili: Hakuna nihaiba alimuñwi kwa baana bane bamemilwe yakaca kwa mulalelo waka.”—Luka 14:21-24.

Zasazo bulela Jesu mwa swanisezo yahae, libonisa kuli Jehova naafile Jesu Kreste buikalabelo bwa kumema batu kuli babe ni kolo ya kukena mwa Mubuso wa mahalimu. Majuda, sihulu babahulu ba bulapeli, neli bona bapili kumemiwa. Buñata bwabona nebahanile memo yeo ka nako kaufela ya bukombwa bwa Jesu. Kono babañwi ni bona bakamemiwa. Jesu ubonisa kuli kwapili Majuda babañwi bamayemo a kwatasi ni maproselite ni bona bakamemiwa. Kutuha fo, batu babangiwa ki Majuda kuli haki babutokwa fapilaa Mulimu ni bona bakamemiwa.—Likezo 10:28-48.

Ki cwalo, zabulela Jesu libonisa buniti bwa manzwi ayomuñwi yanaamemezwi kwa sico, yanaaize: “Unani tabo mutu yaca mwa Mubuso wa Mulimu.”