Bang’ chango ng’at ma ne nigi tuo ma miyo del kuodo pi, Yesu pod ni e od Ja-Farisaicha. Ka en e odno, oneno ka welo mamoko yiero mana kuonde moyiedh ahinya. Omiyo, Yesu tiyo gi thuolono mondo ochiw puonj e wi bolruok.

Yesu wacho kama: “Ka ng’ato ogweli e nyasi mar kend, kik idhi ibed e kama oyiedh ahinya. Dipo ka ng’atno osegwelo jal machielo bende, modhial moloyi. Eka ng’at ma ogwelouno nobi kendo wachoni ni, ‘We mondo jali e ma obed kanyo.’ Eka iniwuog kanyo gi wich-kuot kidhi bet kama ni piny mogik.”​—Luka 14:8, 9.

Kae to Yesu medo wacho niya: “Ka ogweli kamoro, dhi ibed kama ni piny mogik mondo ka ng’at mogweli obiro, enowachni ni, ‘Osiepa, dhi ane malo kacha.’ Eka iniyud duong’ e nyim welo weteni duto.” Gima Yesu puonjo kae ok en mana bedo gi timbe mabeyo kende. Yesu lero kama: “Nimar ng’ato ka ng’ato ma ng’awore malo, noduoke piny, to ng’at ma duokore owuon piny, nong’awe malo.” (Luka 14:10, 11) Ee, Yesu jiwo joma winje mondo gibed gi kido mar bolruok.

Kae to Yesu chiwo puonj machielo ne Ja-Farisai ma ogweleno. Puonjno nyiso kaka ng’ato onego ogwel ji ne nyasi mar chiemo ma biro miyo Nyasaye oyie kode gadier. Yesu wacho kama: “Ka iloso chiemb odiechieng’ kata modhiambo, kik iluong osiepeni, kata oweteni, kata wedeni, kata joweteni momew. Dipo ka kinde moro gin bende gigweli, kae to mano bedo ka gima gichuli. To ka iloso nyasi, gwel joma odhier, gi joma ong’ol, gi pudhe, kod muofni; kendo inibed mamor nimar gionge gima ginyalo chuligo.”​—Luka 14:12-14.

Pile ka ji oloso nyasi moro, gijogwelo osiepegi, wedegi, kata jirendegi. To Yesu ok tem wacho ni timo kamano rach. Kata kamano, Yesu jiwo ni gwelo joma chandore, kaka jodhier, joma ong’ol, kata muofni e nyasi, nyalo kelo gueth mogundho. Yesu lero ne Ja-Farisai mogweleno niya: “Ibiro chuli e kinde chier mar joma kare.” Wendo ma bende nigi Yesu e nyasino yie gi wachneno. Wendono wacho kama: “Ng’at mamor en ng’atno ma chiemo e nyasi mar Pinyruodh Nyasaye.” (Luka 14:15) Ng’atno neno ni mano en gueth makende. Kata kamano, thoth ji ok nigi paro ma kamano mana kaka Yesu medo lero e ranyisine.

Yesu wacho niya: “Ng’at moro noloso nyasi maduong’ mar chiemo modhiambo, mi nogwelo ji mang’eny. Nooro misumbane . . . mondo odhi owach ne joma nogwel ni, ‘Biuru, nikech koro gik moko duto oseikore.’ To giduto ne gitiyo gi weche mag rendruok. Ng’at mokwongo nowachone ni, ‘Eka aa ng’iewo puodho moro, to adwaro ni adhi anene; akwayi, ng’wonna.’ Machielo nowacho ni, ‘Eka aa mana ng’iewo dhok moromo tiyo gi jok abich, kendo adwaro ni adhi ang’igi ane; akwayi, ng’wonna.’ To pod machielo nowacho ni, ‘Eka aa mana kendo, to nikech mano ok anyal biro.’”​—Luka 14:16-20.

Mago gin mana rendruok lilo! Pile ng’ato nonoga puodho kata jamni ka pok ong’iewogi. Omiyo, ok en gima ochuno ahinya ni ng’ato odog onon gigo bang’e. To ng’at ma wacho ni koro eka oa kendo bende rendore. Omiyo, mano ok onego omone dhi e nyasi mogwelgieno. Ka jal mogwelo ji e nyasino osewinjo kaka joma ogwelogo rendore, obedo gi mirima.

Owacho ne misumbane kama: “Wuog idhi mapiyo e wang’ yore madongo kaachiel gi ndeche mag taon, kendo ikel kae joma odhier, gi joma ong’ol, gi muofni, kod pudhe.” Ka misumbano osegwelo jogo, thuolo malach ne pod odong’. Kae to wuon nyasino wacho ne misumbane kendo niya: “Wuog idhi e nderni gi yore mag tielo, kendo ichun-gi gibi eka mondo oda opong’. Nimar awachonu ni, onge ng’ato kuom  joma ne ogwel ma biro bilo chiemba modhiambo.”​—Luka 14:21-24.

Ranyisi ma Yesu oa chiwono nyiso maler kaka Jehova Nyasaye osetiyo gi Yesu Kristo mondo ogwel ng’ato ka ng’ato obi e yo ma tero ji e Pinyruodh polo. Joma ne okwong gwel ne gin Jo-Yahudi, to moloyo jotendgi mag din. Kinde duto ma Yesu ne yalonegi ka ogwelogi ne Pinyruodh polo, thothgi ne otamore. To ok ni gin kendgi e joma ne igwelo. Yesu temo nyiso maler ni nitie kinde ma biro ma ne idhi gwelie jomamoko mopogore kodgi, kaka Jo-Yahudi mocha kod joma ne olokore modonjo e din mar Jo-Yahudi. Bang’e, nitie joma ne idhi gwel e okang’ mar adek. Ne idhi gwel joma Jo-Yahudi ne kawo kaka joma ok long’o e wang’ Nyasaye.​—Tich Joote 10:28-48.

Ee, weche Yesu nyiso ni oriwo lwedo weche ma wendo ma gin-go e nyasino oa wacho. Wendono nowacho kama: “Ng’at mamor en ng’atno ma chiemo e nyasi mar Pinyruodh Nyasaye.”