Despues di a kura e hòmber ku tabata sufri di dewater, Hesus a keda un ratu mas na kas di e fariseo. Anto Hesus tabata opservá e invitadonan i a mira kon nan tabata skohe e mihó lugánan pa sinta, p’esei el a siña esnan presente un lès importante tokante humildat.

El a bisa nan: “Ora un hende invitá bo na un fiesta di kasamentu, no bai sinta na e lugá di mas prominente. Podisé e anfitrion a invitá tambe un hende mas distinguí ku bo, i lo e bin bisa bo: ‘Lanta i duna e hòmber akí e lugá.’ E ora ei yen di bèrgwensa lo bo tin ku lanta bai sinta te patras.”—Lukas 14:8, 9.

Hesus a sigui bisa: “Ora nan invitá bo, bai sinta te patras, pa ora esun ku a invitá bo yega, e bisa bo: ‘Mi amigu, hala bini mas dilanti.’ E ora ei lo bo haña onor dilanti di tur otro invitado.” Hesus no tabata djis siñando su oyentenan bon manera. El a splika nan: “Tur hende ku halsa nan mes lo keda humiá, i esun ku humiá su mes lo keda halsá.” (Lukas 14:10, 11) Sí, Hesus tabata animando su oyentenan pa nan ta humilde.

Despues, Hesus a siña e fariseo ku a invit’é un lès diferente: kon pa organisá un komementu ku ta un berdadero akto di bondat den bista di Dios. Hesus a bis’é: “Ora bo pone un komementu, sea mèrdia òf anochi, no kombidá bo amigunan, rumannan, famianan òf bisiñanan riku. Kisas un otro biaha, nan, na nan turno, lo invitá bo, i asina lo bo haña bo pago. Ma ora bo pone un bankete, invitá hende pober, mankaron, koho i siegu; i lo bo ta felis, pasobra nan no tin nada pa paga bo bèk.”—Lukas 14:12-14.

Ta masha normal ku un hende ta invitá su amigu-, famia- òf bisiñanan bin kome serka dje. I Hesus no a bisa ku esei ta algu malu. Mas bien, el a enfatisá e goso ku un persona por haña ora e invitá hende den nesesidat bin kome serka dje, por ehèmpel, hende pober, desabilitá òf siegu. Anto dirigiendo su mes atrobe na su anfitrion, Hesus a bisa: “Lo bo haña bo pago den resurekshon di e hustunan.” Un di e invitadonan, kende tabata di akuerdo ku Hesus, a bisa: “Felis ta esun ku lo kome pan den e Reino di Dios.” (Lukas 14:15) E hòmber akí sigur a komprondé ku esei lo tabata un gran privilegio. Pero manera Hesus a mustra den su siguiente ilustrashon, no ta tur hende tabatin e punto di bista ei.

El a bisa: “Un hende a pone un bankete grandi, i el a invitá hopi hende. . . . El a manda su esklabo bai bisa e invitadonan: ‘Bini, pasobra tur kos ta kla.’ Ma nan tur a kuminsá bini ku èksküs. E promé a bis’é: ‘Mi a kumpra un kunuku, i mi tin ku bai wak e; despensá mi ku mi no por bini.’ Anto un otro a bisa: ‘Mi a kumpra dies baka, i mi ta bai saminá nan; despensá mi ku mi no por bini.’ I un otro a bisa: ‘Mi a kaba di kasa i p’esei mi no por bini.’”—Lukas 14:16-20.

Tur e èksküsnan akí tabata flou. Por lo general, un hende ta inspekshoná loke ku e ta bai kumpra promé ku e kumpr’é. Pues, no tabata urgente pa bai wak e kunuku òf e tou di bestia despues. Pa loke ta trata e di tres hòmber, e no tabata hasiendo preparashon pa kasa; e tabata kasá kaba. Pues, esei no mester a strob’é di aseptá un invitashon asina importante. Ora e doño a tende tur e èksküsnan akí, el a rabia mashá i a bisa su esklabo:

“Sali bai lihé den e kayanan prinsipal i den e hanchinan di e stat, i trese e hendenan pober, mankaron, siegu i koho aki den.” Despues ku e esklabo a hasi esei, ainda tabatin mas lugá. Pues, e doño a bisa su esklabo: “Sali bai den e kamindanan i den e lugánan será ku tranké, i obligá e hendenan drenta, pa mi kas por yena.  Pasobra mi ta bisa boso: Ningun di e hòmbernan ei ku tabata invitá lo no purba e bankete ku mi a prepará.”—Lukas 14:21-24.

E ilustrashon akí di Hesus ta deskribí Yehova Dios i Hesukristu kende Yehova a duna e enkargo pa invitá hende pa bini na remarke pa forma parti di e Reino selestial. E promé hendenan ku lo a haña invitashon tabata spesialmente e lidernan religioso hudiu. Pero mayoria di nan a rechasá e invitashon ku Hesus tabata ekstendé durante su sirbishi riba tera. Pero tabatin otro hende ku tambe lo a haña invitashon. Hesus a mustra bon kla ku lo tabatin un di dos invitashon den futuro ku lo a bai pa e hudiunan humilde di kurason i e prosélitonan. Despues, lo a ekstendé un di tres i último invitashon na hende ku segun e hudiunan tabata impuru òf indigno den bista di Dios.—Echonan 10:28-48.

Sí, loke Hesus a kaba di bisa sigur a konfirmá e palabranan di e invitado ku a bisa: “Felis ta esun ku lo kome pan den e Reino di Dios.”