Pakumala kuwangisa mamuna wakuti akhali na utenda wa mpfutete, Yezu apitiriza kukhala panyumba ya Nfarisi. Yezu akhaona kuti anthu anango akhasankhula mipando yakupambulika. Natenepa, iye abandza mwai toera kuapfundzisa kufunika kwa kucepeseka.

Yezu alonga: ‘Ungacemerwa toera kugumanika pa phwando yakumanga banja, leka kukhala pa mbuto yadidi kakamwe. Thangwi panango ule adakucemera acemerambo munthu unango wakufunika kakamwe kupiringana iwe. Natenepa, iye anabwera mbakupanga: Buluka penepa toera uyu akhale pa mbuto ineyi. Penepo iwe unadzakhala na manyadzo mbuenda kakhala pa mbuto yakupwazika.’—Luka 14:8, 9.

Buluka penepo, Yezu alonga: ‘Iwe ungacemerwa pa phwando, ndoko kakhale pa mbuto yakupwazika, toera ule adakucemera angabwera akupange kuti: Xamwali, ndoko kakhale pa mbuto yadidi kakamwe. Penepo iwe unadzalemedzwa pamaso pa anthu onsene adacemerwa pa phwando.’ Pyenepi pisaphataniza pizinji kakamwe kupiringana kupangiza makhaliro adidi. Yezu afokotoza: ‘Thangwi munthu onsene anadzikuza anadzacepeswa, mbwenye ule anacepeseka anadzakuzwa.’ (Luka 14:10, 11) Natenepa, Yezu akulumiza anyakubveserace toera kukulisa n’khaliro wakucepeseka.

Buluka penepo, Yezu alonga ntsonga inango kwa Nfarisi adancemera thangwi ya ntundu wa anthu akhafunika iye kucemera toera phwando yace ikhale yakutawirika kwa Mulungu. Iye alonga: ‘Ungacita phwando, leka kucemera axamwali ako, abale ako peno anthu akupfuma anakhala dhuzi na iwe pacisa. Thangwi panango iwo anadzakucemerambo, natenepa pinadzakhala ninga ali kukubwezera pidaacitira iwe. Mbwenye ungacita phwando, cemera anyakutcerenga, anyakulamala, anyampfutete na maboliboli; iwe unadzakhala wakutsandzaya thangwi iwo nkhabe cinthu toera kukubwezera.’—Luka 14:12-14.

Ninga pidalonga Yezu, si pyakuipa tayu kucemera axamwali, abale athu na anyakuendekana pa phwando yathu. Mbwenye Yezu akhalonga kuti ale anapasa cakudya kwa anthu akutcerenga, akulamala na aboliboli asatambira nkhombo zizinji. Yezu afokotoza kwa munthu adancemera: ‘Unadzapaswa nkhombo mu ndzidzi wakulamuswa kwa anthu akulungama.’ M’bodzi wa ale adacemerwa pa phwando abva pyenepi, mbalonga: ‘Wakutsandzaya ndi ule anadya mu Umambo wa Mulungu.’ (Luka 14:15) Iye adzindikira kuti unoyu ndi mwai. Mbwenye si onsene tayu akhalemedza pikhalonga Yezu.

Iye alonga: ‘Mamuna m’bodzi akhafuna kucita phwando ikulu kakamwe, natenepa iye acemera anthu azinji. Iye atuma nyabasace toera kuenda kapanga ale adacemerwa pa phwando kuti: Bwerani, thangwi pinthu pyonsene pyamala kukhunganywa. Mbwenye onsene asaka njira toera kukhonda. Wakutoma alonga: Ndagula munda, natenepa ndisafuna kuenda kauona; munandilekerera, nee ndinakwanisa kuendako. Unango alonga: Ndagula ng’ombe khumi zakulima nazo, natenepa ndiri kuenda kaziona; munandilekerera, nee ndinakwanisa kuendako. Unangombo alonga: Ndamala kwene kumanga banja cincino, na thangwi ineyi nee ndinakwanisa kuenda.’—Luka 14:16-20.

Amuna anewa nee akhali na mathangwi adidi toera kukhonda. Kazinji kene munthu asadinga munda na ng’ombe mbadzati kugula, natenepa nee pisafunika kuenda kaona mwakucimbiza pakumala kugula. Mamuna wacitatu, nee akhakhunganyika toera kumanga banja. Iye amanga kale banja, pontho pyenepi nee mbapidampingiza kutawira ncemerero wakufunika kakamwe. Pakubva mathangwi anewa, mwanaciro phwando aipirwa kakamwe na nyabasace.

Iye alonga: ‘Ndoko mwakucimbiza m’miseu mikulu na munjira za nzinda, bweresa anyakutcerenga, anyakulamala na maboliboli. Pidamala nyabasa kucita pyenepi, ikhalipo mbuto inango toera anthu anango akhale. Mwanaciro apanga pontho nyabasace: Ndoko m’miseu na munjira, akakamize abwere toera  nyumba yanga idzale na anthu. Thangwi ine ndinakupangani kuti nee m’bodzi wa ale adacemerwa pakutoma anadzalawira phwando yanga.’—Luka 14:21-24.

Pidalonga Yezu pisapangiza mwadidi pidacita Yahova Mulungu mukutuma Kristu toera kucemera anthu akuti mbadacita khundu mu Umambo wakudzulu. Makamaka atsogoleri auphemberi Aciyuda akhali akutoma kucemerwa. Azinji a iwo akhonda ncemerero mu ndzidzi wa utumiki wa Yezu. Mbwenye anango mbadacemerwambo. Yezu apangiza pakweca kuti ntsogolo kunadzacitwa ncemerero waciwiri kwa Ayuda akucepeseka na akukhonda khala Ayuda. Pontho mbapadaoneka ncemerero wacitatu na wakumalisa kwa anthu akuti akhaoniwa na Ayuda ninga akukhonda thema kwa Mulungu.—Mabasa 10:28-48.

Mwakukhonda penula, pidalonga Yezu pisabverana na pidalonga m’bodzi mwa ale adacemerwa pa phwando: ‘Wakutsandzaya ndi ule anadya mu Umambo wa Mulungu.’