Naamana kuponya muntu uuciswa bulwazi bwakuzimba mubili, Jesu ucili kuŋanda yamu Farisi. Jesu wabona beenzunyina bamwi kabasala masena aalemenede kucakulya, eelyo wabelesya ciindi eeci kuyiisya ciiyo cijatikizya kulicesya.

Jesu waamba kuti: “Umwi muntu naakutamba kupobwe lyabwiinga, utakkalili mubusena bulemenede kapati. Nkaambo ambweni muntu umwi uulemenede kwiinda nduwe awalo wakatambwa. Eelyo ooyo wakamutamba nyoonse nyobilo ulaboola akukwaambila kuti, ‘Akukkale yooyu abusena bwako.’ Eelyo yebo uyakunyamuka akweenda kofwide nsoni akuyookkalila kubusena bwaansi kapati.”—Luka 14:8, 9.

Mpoonya Jesu wati: “Nowatambwa, koya ukakkalile kubusena bwakumamanino, kutegwa muntu ooyo wakutamba asika akwaambile kuti, ‘Mweenzuma, koya ukkalile kumbele.’ Eelyo uyooba abulemu kumbele lyabeenzunyoko boonse.” Eeci tacijatikizyi buyo kuba amulemyo pe. Jesu wapandulula kuti: “Nkaambo woonse uulisumpula uyoocesyegwa alimwi woonse uulicesya uyoosumpulwa.” (Luka 14:10, 11) Inzya, ukulwaizya baswiilizi bakwe kuba bantu balicesya.

Kumane Jesu waamba ciiyo acimbi kumu Farisi ooyo iwamwiita—cijatikizya mbokubambwa cakulya ncakkomanina ncobeni Leza. “Wabamba cisusulo naa cilalilo, utaiti beenzinyoko, banabokwanu, basazinyoko, naa basimukobonyoko bavwubide. Buyo-buyo, inga abalo baakukutamba, eelyo ooko inga kwaba kukupilusizya. Pele nowabamba pobwe, tamba bantu bacete, basunkuta, balema, aboofwu; eelyo uyookkomana mbwaanga tabajisi cakukupilusizya.”—Luka 14:12-14.

Ncilengwa buya kwiita balongwe, babbululu, naa basimukoboma kucakulya, alimwi Jesu taambi kuti ncibi kucita boobo. Pele ukankaizya kuti kubapa cakulya bantu bapengede, mbuli bacete, balema, naa boofwu, kulakonzya kuleta zileleko zinji kapati. Jesu wapanduluda simeenzu wakwe kuti: “Uyoolumbulwa mububuke bwabaluleme.” Mweenzunyina ngocili limwi waazuminizya makani aaya, ulaamba: “Ulikkomene ooyo uulya cakulya mu Bwami bwa Leza.” (Luka 14:15) Wabona kuti eeci cilakonzya kuba coolwe cipati. Nokuba boobo tabali boonse ibazibona boobu zintu, mbubonya Jesu mbwaapa cikozyanyo acimbi.

Jesu wati: “Umwi muntu wakali kubamba cilalilo citalikomeneni, mpoonya wakatamba bantu banji. Eelyo wakatuma muzike wakwe . . . kuyakwaambila bakatambidwe kuti, ‘Katuya, nkaambo zintu zyoonse zyabambwa kale.’ Pele boonse bakatalika kulitamizya. Wakusaanguna wakamwaambila kuti, ‘Ndakaula muunda aboobo ndeelede kuunka kuyakuubona; Ndalomba kuti undijatile.’ Aumwi wakati, ‘Ndakaula zipani zyabasune zyosanwe aboobo nduunka kuyoobona mbobabede; Ndalomba kuti undijatile.’ Alimwi umbi wakati, ‘Ndakakwata onoono, aboobo tandikonzyi kuboola.’”—Luka 14:16-20.

Twaambo ootu twakulitamizya tatukwe nkoye! Kanji-kanji muntu naula muunda naa zivwubwa uusaanguna kuzilanga-langa, aboobo makani aakuzilanga-langa amana kuzyuula taabindide pe. Awalo muntu watatu tali mukulimbila kukwata pe. Ulikwete kale, aboobo eeci taceelede kumulesya kuzumina bwiite oobu buyandika kapati. Naamvwa kulitamizya ooku, cabukali simalelo waambila muzike wakwe kuti:

“Fwambaana koya mumigwagwa amunzila zyamumunzi, ukalete bantu bacete abasunkuta aboofwu abalema.” Muzike wakwe naabaita aaba, busena nkobucili muŋanda. Mpoonya simalelo waambila muzike wakwe kuti: “Koya munzila amutuzila twiinda musyokwe, ukabakulwaizye kuti baboole ikutegwa ŋanda yangu izule. Nkaambo ndimwaambila kuti, kunyina naba  omwe akati kabantu aabo bakatambidwe uuyoolabila cilalilo cangu.”—Luka 14:21-24.

Ncaazwa mukwaamba Jesu ncitondezyo icitondezya Jehova Leza mbwaakatuma Jesu Kristo kwiita bantu kuti bakabe mu Bwami bwakujulu. Ba Juda, ikwaambisya basololi babukombi, mbabakasaanguna kwiitwa. Ibunji bwabo tiibabutambula bwiite oobu ciindi Jesu naali kucita mulimo wakwe. Pele bwiite oobu tabugoleli aali mbabo pe. Cakusalazya Jesu utondezya kuti kumbele kuyakuba bwiite abumwi bwabili mbobayakupegwa bantu mbuli baabo balaansi kapati mucisi caba Juda alimwi abasandule. Kuzwa waawo, kuyakuba bwiite bwatatu alimwi bwamamanino kubantu balo iba Juda mbobabona kuti tabeeleli kuli Leza.—Milimo 10:28-48.

Masimpe, ncaamba Jesu citondezya mbwaali aamasimpe majwi ngaamba mweenzunyina umwi iwaamba kuti: “Ulikkomene ooyo uulya cakulya mu Bwami bwa Leza.”