KAPITE 83
Te ʼu Faifakaafe Ki He Kaitahi: Ko Ai ʼAe Neʼe Fakaafe e Te ʼAtua?
-
HE AKO ʼO ʼUHIGA MO TE FIA MALALO
-
ʼE KUMI TAKUʼAKI TE KAU FAKAAFE
Hili te fakamalolo e Sesu te tagata ʼae neʼe fufula ʼona nima mo ʼona vaʼe, neʼe haga nofo pe ʼi te ʼapi ʼo te Faliseo. Neʼe tokagaʼi e Sesu te filifili e te kau fakaafe te ʼu nofoʼaga maʼuhiga ʼi te kaitahi, pea neʼe ina fakaʼaogaʼi te faigamalie ʼaia moʼo akoʼi age kia natou te fia malalo.
Neʼe ui fenei e Sesu: “Ka fakaafe koe e he tahi ki he kaitahi ʼo he faiʼohoana, ʼaua naʼa ke filifili te nofoʼaga ʼae ʼe maʼuhiga age. He neʼe lagi fakaafe he tahi ʼe maʼuhiga age ia koe. Pea ʼe alu atu anai ia ia ʼae neʼe ina fakaafe koulua ʼo ui atu kia koe: ‘Tuku tou nofoʼaga ki te tagata ʼaeni.’ Pea ʼe ke alu ufiufi anai ki te nofoʼaga ʼae ʼi muli.”—Luka 14:8, 9.
Neʼe hoko atu fenei e Sesu: “Ka fakaafe koe, alu ki te nofoʼaga ʼae ʼi muli, feia la ka alu atu anai te tagata faifakaafe kia koe, ʼe ina ui fenei atu anai: ‘Kaumeʼa, alu ki muʼa.’ Pea ʼe fakamaʼuhigaʼi anai koe ia muʼa o te kau fakaafe fuli.” Neʼe mole talanoa ia Sesu ki te aga fakaʼapaʼapa ʼae ʼe tonu ke fai. Neʼe fakamahino fenei e Sesu: “Ko ʼae ʼe ina hikihiki ia ia ʼe fakamalaloʼi anai ia, pea ko ʼae ʼe fia malalo ʼe hikihiki anai ia.” (Luka 14:10, 11) ʼEi, neʼe ina fakalotomalohiʼi ia natou ʼae neʼe fagono kia te ia ke natou fia malalo.
Neʼe fakaha leva e Sesu he tahi age ako neʼe feala ke taʼofi e te tagata Faliseo ʼae neʼe ina fakaafe ia ia. Neʼe ina fakamahino age pe ko ai ʼae ʼe tonu ke ina fakaafe ki he kai, ke leleiʼia e te ʼAtua. Neʼe ina ui fenei: “Ka ke fai he kai hoʼata peʼe ko he kai afiafi, ʼaua naʼa ke pauʼi ʼou kaumeʼa, peʼe ko ʼou tehina, peʼe ko ʼou kaiga, peʼe ko ʼou vahaʼa fale maʼu koloa. He ʼe lagi natou liufaki atu anai te fakaafe, pea ʼe liliu leva anai ko hou fakapale. Kaʼe ka ke fai he kaitahi, fakaafe te kau masisiva, mo te kau maʼimoa, mo te ʼu ketu pea mo te kau kivi. Pea ʼe ke fiafia ai anai, koteʼuhi ʼe mole feala ke natou liufaki atu.”—Luka 14:12-14.
ʼI te agamahani, ʼe tou fakaafe hotatou ʼu kaumeʼa, peʼe ko hotatou ʼu kaiga, peʼe ko he ʼu vahaʼa fale ke tou kakai fakatahi, pea neʼe mole ui e Sesu ʼe ko he meʼa ʼe kovi. Kaʼe neʼe ina fakamaʼuhigaʼi te tapuakina lahi ʼae ʼe feala ke maʼu e he tahi moka ʼe ina fakaafe te hahaʼi ʼae ʼe faigataʼaʼia, ohage ko te kau masisiva, mo te kau maʼimoa pea mo te kau kivi. Kapau neʼe fai e ia ʼae neʼe ina fakaafe ia Sesu te faʼahi ʼaia, neʼe fakapapau fenei age e Sesu: “ ʼE hoki ke maʼu anai tou fakapale ʼi te fakatuʼuake ʼo te kau faitotonu.” Neʼe ui fenei e he tahi ʼi te kau fakaafe: “Manuʼia ia ia ʼae ka kai anai ʼi te Puleʼaga ʼo te ʼAtua.” (Luka 14:15) Neʼe mahino kia ia te toe pilivilesio lahi ʼaia. Kaʼe neʼe mole ko te hahaʼi fuli ʼae neʼe natou maʼu te lotofakafetaʼi, ohage ko tona fakaha e Sesu ʼi te lea fakatata ʼaeni:
“Neʼe fai e he tagata he kaitahi, pea neʼe lahi tana kau fakaafe. Neʼe ina fekauʼi tana kaugana . . . ke alu ʼo ui fenei age ki te kau fakaafe: ‘Kotou ʼomai la, he ʼe kua tokalelei ia meʼa fuli.’ Kaʼe neʼe natou kamata kumi takuʼaki fuli. Neʼe ui fenei age e te ʼuluaki: ‘Neʼe au totogi taku gaueʼaga, pea ʼe tonu ke au alu ʼo vakaʼi. ʼE au kole atu ke ke fakalelei mai.’ Pea neʼe ui fenei age e te tahi: ‘Neʼe au totogi ni hoaʼi pipi ʼe nima, pea ʼe au alu anai ʼo vakaʼi. ʼE au kole atu ke ke fakalelei mai.’ Pea neʼe ui fenei age e te tahi: ‘Neʼe hoki au ʼohoana pe, pea koia ʼe mole feala ke au alu atu ai.’ ”—Luka 14:16-20.
Neʼe mole moʼoni te ʼu takuʼaki ʼaia! ʼI te agamahani, ʼe vakaʼi e he tagata he gaueʼaga peʼe ko he faga manu ʼi muʼa ʼo hana totogi, koia ka neʼe kua ʼosi totogi, neʼe mole kei ʼaoga ke alu fakavilivili ʼo vakaʼi. Ko te tolu tagata neʼe mole teuteu ʼohoana. Neʼe kua ʼosi ʼohoana ia, koia neʼe mole he tupuʼaga ke fakafisi ai ki te fakaafe maʼuhiga ʼae neʼe fai age. ʼI te logo ʼa te pule ki te ʼu takuʼaki ʼaia, neʼe ita ai ʼo ina ui fenei age ki tana kaugana:
“Alu fakavilivili ki te ʼu ala lalahi mo te ʼu kiʼi ala liliki ʼo te kolo, pea ke ʼaumai ki heni te kau masisiva, mo te kau maʼimoa, mo te kau kivi pea mo te ʼu ketu.” ʼI te ʼosi fai e te kaugana te meʼa ʼaia, neʼe kei toe pe te ʼu nofoʼaga. Neʼe ui fenei age leva e te pule ki tana kaugana: “Alu la ki te ʼu ala mo te ʼu ala foufou pea mo fakamaʼua age ki te hahaʼi ke natou ʼomai ki heni, ke fonu ai toku ʼapi. He ʼe au tala atu Luka 14:21-24.
kia koutou, ʼe mole he tahi ʼi te ʼu tagata ʼaia neʼe fakaafe ʼe kai anai ki taku kaitahi.”—Ko te ʼu palalau ʼae neʼe hoki fai age pe e Sesu, neʼe ina fakata lelei te fakatuʼutuʼu ʼa Sehova ʼAtua ke fakaafe e Sesu Kilisito ia te hahaʼi ke natou kau ki te Puleʼaga ʼo selo. Neʼe ʼuluaki fakaafe te kau Sutea, tafito te kau takitaki lotu. Tokolahi neʼe fakafisi ki te fakaafe ʼaia neʼe fai e Sesu lolotoga tona minisitelio. Kaʼe neʼe fakaafe te tahi age ʼu hahaʼi. Neʼe fakaha lelei e Sesu, ʼi he temi ki ʼamuli, neʼe fai he lua fakaafe kia natou ʼae neʼe malalo ʼi te puleʼaga Sutea pea mo te kau poloselite.. Ki muli age, neʼe fai leva he tolu fakaafe pea neʼe gata ai, ki te hahaʼi ʼae neʼe ui e te kau Sutea ʼe natou heʼe maʼa ia muʼa ʼo te ʼAtua.—Gaue 10:28-48.
ʼEi, ko te meʼa ʼae neʼe ui e Sesu neʼe ina fakamoʼoni te ʼu palalau ʼaeni neʼe fai e he tahi tagata neʼe fakaafe: “Manuʼia ia ia ʼae ka kai anai ʼi te Puleʼaga ʼo te ʼAtua.”