Benɛ Yesu ya ye ní ngɛ Farisi no ko we mi ɔ, e ngɔ he blɔ ɔ kɛ tsɔɔ nihi nɛ a ngɛ lejɛ ɔ níhi fuu nɛ he hia. Benɛ Yesu je lejɛ ɔ nɛ e yaa Yerusalem ɔ, nihi babauu piɛɛ e he kɛ ho. Mɛni he je? Anɛ a fia a pɛɛ si kaa a maa nyɛɛ Yesu se ngɛ haomihi nɛ a kɛ maa kpe ɔ tsuo se lo?

Benɛ a ngɛ blɔ nɔ kɛ yaa a, Yesu de nɔ́ ko nɛ pee mɛ nyakpɛ. E de ke: “Nɔ tsuaa nɔ nɛ maa ba ye ngɔ ɔ, loko e ma nyɛ maa pee ye kaselɔ ɔ, ja e suɔ mi kulaa pe e tsɛ, kɛ e nyɛ, kɛ e yo, kɛ e bimɛ, kɛ e nyɛminyumuhi, kɛ e nyɛmiyihi, kɛ lɛ nitsɛ e he tete.” (Luka 14:26) Mɛni Yesu ngɛ hlae maa tsɔɔ?

Pi nɛ Yesu ngɛ tsɔɔe kaa e se nyɛɛli nɛ a nyɛ a weku li. Mohu ɔ, e ngɛ tsɔɔe kaa e sa nɛ a suɔ lɛ pe a weku li, konɛ a kó pee kaa nyumu ɔ nɛ a fɔ lɛ nine kɛ ya okplɔɔ ngmɛmi ko sisi nɛ e kua ke e be yae akɛnɛ e ngɔ yo he je ɔ. (Luka 14:20) Baiblo ɔ po tsɔɔ kaa Yakob nɛ e ji Yuda bi tsuo a nɛ ɔ hu ‘suɔ Rahel pe’ Lea, lɔ ɔ he ɔ, ke nɔ ko suɔ Yesu pe e weku li ɔ, e tɔ̃ we.​​—1 Mose 29:31.

Jehanɛ hu ɔ, Yesu de kaa ke nɔ ko suɔ nɛ e pee e kaselɔ ɔ, e sɛ nɛ e suɔ “lɛ nitsɛ e he tete.” Enɛ ɔ hu tsɔɔ kaa e sa nɛ Yesu se nyɛɛli nɛ a suɔ Yesu pe mɛ nitsɛmɛ a he, nɛ ke e ma bi nɛ a ngɔ a wami kɛ sa afɔle ngɛ Yesu he po ɔ, e sa nɛ a pee jã. E ngɛ heii kaa, Yesu kaselɔ nɛ nɔ ko maa pee ɔ ji nɔ́ ko nɛ hɛdɔ ngɛ he. Pi nɔ́ ko nɛ e sa nɛ a kɛ fiɛ ji nɛ ɔ. Enɛ ɔ he ɔ, a ti si gu nɛ a nyɛɛɔ Yesu se.

Ke nɔ ko nyɛɛ Yesu se ɔ, e kɛ yi mi wami loo si temi kɛ womi maa kpe. Enɛ ɔ he ɔ, Yesu de ke: “Nɔ tsuaa nɔ nɛ ngɔɛ lɛ nitsɛ e sɛumi tso ngɔ fɔɛ e konɔ kɛ ba nyɛɛ ye se ɔ, e be nyɛe maa pee ye kaselɔ.” (Luka 14:27) Ngɛ anɔkuale mi ɔ, loko nɔ ko ma nyɛ maa pee anɔkuale Kristofo no ɔ, e sa nɛ e kplɛɛ nɔ kaa a ma pue e hɛ mi si kaa bɔ nɛ a pee Yesu ɔ. Yesu de po ke e he nyɛli a dɛ mi e ma gbo ngɛ.

Enɛ ɔ he ɔ, e sa kaa nihi babauu nɛ a ngɛ Yesu se nyɛɛe kɛ yaa Yerusalem ɔ nɛ a susu nɔ́ nɛ Yesu se nyɛɛmi tsɔɔ tutuutu ɔ he. Yesu ngɔ nɔ́ hetomi nɔ́ ko kɛ tsɔɔ mi. E de ke: ‘Ke nɔ ko ngɛ hlae nɛ e ma mɔ ɔ, kekleekle ɔ, e hii si nɛ e buu nya, nɛ e hyɛɛ kaa e ngɛ sika nɛ maa su nya gbemi lo. Ke e ya pee we jã, nɛ e je mɔ ɔ mami sisi ɔ, e be nyɛe maa gbe nya.’ (Luka 14:28, 29) Enɛ ɔ tsɔɔ kaa loko nihi nɛ a ngɛ Yesu se nyɛɛe kɛ yaa Yerusalem ɔ ma nyɛ maa ma a juɛmi nya si kaa a maa pee e kaseli ɔ, e sa nɛ a kplɛɛ nɔ kaa a maa pee nɔ́ tsuaa nɔ́ nɛ Yesu ma de mɛ ɔ. Yesu ngɔ nɔ́ hetomi nɔ́ kpa ko kɛ tsɔɔ e munyu ɔ mi. E de ke:

“Ke matsɛ ko, kɛ e ta buli akpe nyɔngma yaa nɛ e kɛ matsɛ kpa, kɛ lɛ hu e ta buli akpe nyingmi enyɔ ya hwu ta a, bɔ nɛ e maa pee ji nɛ ɔ nɛ. Kekleekle ɔ, e maa hi si, nɛ e maa susu e yi mi nɛ e hyɛ kaa e ma nyɛ nɛ e kɛ matsɛ kpa a nɛ hwu lo. Ke e na kaa e be nyɛe ɔ, be mi nɛ matsɛ kake ɔ ngɛ tsitsaa lokoo kɛ ma a, e maa tsɔ  nihi kɛ ya kpee lɛ. A kɛ lɛ maa tu, konɛ tue mi jɔmi nɛ ba.” Yesu ha nɛ oti ɔ je kpo heii. E de ke: “Jã kɛ̃, ke nɔ ko suɔ kaa e pee ye kaselɔ ɔ, ja e si níhi tsuo nɛ e ngɛ ɔ.”​​—Luka 14:31-33.

Ngɛ anɔkuale mi ɔ, munyu nɛ ɔ kɔ we nihi nɛ a nyɛɛ Yesu se kɛ ya Yerusalem ɔ pɛ a he. E sa nɛ nihi tsuo nɛ a suɔ kaa a maa nyɛɛ Yesu se ɔ nɛ a kplɛɛ nɔ kaa a maa pee níhi nɛ e de ɔ tsuo. Enɛ ɔ tsɔɔ kaa, e sa nɛ nɔ tsuaa nɔ nɛ e suɔ kaa e maa nyɛɛ Yesu se ɔ nɛ e pee klaalo kaa e kɛ nɔ́ tsuaa nɔ́ nɛ e ngɛ ɔ, kɛ e wami po maa sã afɔle. Enɛ ɔ ji nɔ́ ko nɛ e sa kaa wɔ tsuo wa susu he saminya, nɛ waa sɔle ngɛ he.

Enɛ ɔ se ɔ, Yesu kpale de nɔ́ ko nɛ e tu he munyu momo ngɛ e Yoku ɔ Nɔ Fiɛɛmi ɔ mi ɔ. E de e kaseli ɔmɛ ke: ‘Nyɛ ji ngo kɛ ha je ɔ.’ (Mateo 5:13) Eko ɔ, Yesu ngɛ tsɔɔe kaa, kaa bɔ nɛ ngo baa nɔ́ yi nɛ e puɛ we ɔ, jã a kɛ̃ nɛ e kaseli ɔmɛ ma nyɛ maa ye bua nihi, konɛ a je mi bami ko puɛ, nɛ a kɛ Mawu nɛ ná huɛ bɔmi kpakpa. Enɛ ɔ he ɔ, akɛnɛ e piɛ bɔɔ nɛ Yesu maa gbe e sɔmɔmi ní tsumi ɔ nya he je ɔ, e bɔ e kaseli ɔmɛ kɔkɔ ke: “Ngo hi, se ke ngo nya nyu gbo ɔ, nɔ́ ko be nɛ a maa pee nɛ e doo ekohu.” (Luka 14:34) Nihi nɛ a ngɛ lɛ tue bue ɔ le kaa pi ngo tsuaa ngo nɛ hi, ejakaa ekomɛ ngɛ nɛ níhi tsaka mi, nɛ e hí kɛ nɔ́ ko peemi.

Lɔ ɔ he ɔ, Yesu ngɛ tsɔɔe kaa e sa nɛ e kaseli ɔmɛ nɛ a kɛ lɛ ngɛ nyɛɛe momo ɔ nɛ a ha nɛ kã nɛ a ngɛ ɔ mi nɛ wa. Ke pi jã a, a maa pee kaa ngo nɛ e nya nyu gbo nɛ se nami ko be he, nɛ je ɔ tsuo maa ye a he fɛu. Nɔ́ nɛ pa hí kulaa ji kaa, a maa wo Mawu biɛ ɔ he mu, nɛ a be e hɛ mi sae. Akɛnɛ Yesu sume nɛ e ba jã ngɛ a blɔ fa mi he je ɔ, e de mɛ ke: ‘Nɔ nɛ ngɛ tue nɛ nuɔ nɔ ɔ, e nu.’​​—Luka 14:35.