Yesũ nĩwamanyĩisye maũndũ ma vata yĩla wathoketw’e nĩ mũtongoi wa Avalisi maĩsanĩe. Ĩtina wa ũu nĩwaendeeie na savalĩ yake ya kũthi Yelusaleme, na ve andũ aingĩ waendanĩtye namo. Nĩkĩ waendanĩtye namo? Kwa w’o mo nĩmendaa kũtw’ĩka aatĩĩi make ma w’o, o na ethĩwa mendekaa meke ata?

O maendeee na savalĩ, Yesũ nĩwaneenie ũndũ ũtonya kwĩthĩwa watelemilye amwe ma andũ asu. Aisye: “Mũndũ o na wĩva ũla ũngatĩĩaa na ailea kũmena ĩthe wake na inyia wake na mũka wake na syana syake na ana-a-inyia na eĩtu-a-inyia, ĩĩ, o na thayũ wake mwene, ndatonya kwĩthĩwa mũmanyĩw’a wakwa.” (Luka 14:26) We Yesũ oonanasya ata yĩla wawetie ndeto isu?

Yesũ ndoonanasya kana mũndũ atw’ĩka mũatĩĩi wake aĩle kũmena andũ make ma mũsyĩ. Ĩndĩ, oonanasya kana mũndũ aĩle kwenda Yesũ mũnango kwĩ mo, ĩndĩ ti ta ũla mũndũũme Yesũ wawetie ngelekany’onĩ ya lĩu wa wĩoo ũla waleile kũka mbokanĩ aĩ nũndũ nũtwaanie. (Luka 14:20) Kwa ngelekany’o, Maandĩko maĩtye kana ũmae wa Ayuti ũla weetawa Yakovo, ‘nĩwamenete’ Lea na akamwenda Lakeli, na ũu woonanasya kana ndamwendete Lea mũno ta mwĩĩtu-a-inyia Lakeli.—Mwambĩlĩlyo 29:31.

O na ĩngĩ nĩtwaĩle kũlilikana kana Yesũ aisye mũndũ atw’ĩka mũmanyĩw’a wake aĩle kũmena “o na thayũ wake mwene.” Kwoou Yesũ oonanasya kana mũmanyĩw’a wake wa w’o aĩle kũmwenda mũnango kwĩ ũndũ wendete thayũ wake, o na aĩle kwĩthĩwa eyumbanĩtye kwasya thayũ wake ethĩwa nĩvatonyeka. Kwa w’o kũtw’ĩka mũmanyĩw’a wa Klĩsto nĩ kĩanda kĩito. Ti ũndũ twaĩle kũwosa laisi tũte kũsũanĩa mũno ĩũlũ wa ĩtambya yĩu twoosa.

Mũndũ atw’ĩka mũmanyĩw’a wa Yesũ nũtonya kũkwatwa nĩ mawũmũ na akathĩnw’a, nĩkwĩthĩwa Yesũ aisye: “Mũndũ o na wĩva ũla ũtakuaa mũtĩ wake wa mathĩna na aingatĩĩa, ndatonya kwĩthĩwa mũmanyĩw’a wakwa.” (Luka 14:27) Kwa w’o, mũmanyĩw’a wa w’o wa Yesũ aĩle kwĩthĩwa eyũmbanĩtye kũkwatwa nĩ mathĩna o ta ala mamũkwatie Yesũ. O na Yesũ aisye kana aĩ oawe nĩ amaitha make.

Kwoou andũ ala maendanĩtye na Yesũ nĩmaaĩle kũmanya nesa kĩla kyendekaa nĩ kana mũndũ atw’ĩke mũmanyĩw’a wa Klĩsto. Yesũ nĩwatũmĩie ngelekany’o nĩ kana akindĩlĩĩle ũndũ ũsu. Aisye atĩĩ: “Kwa ngelekany’o, nũũ katĩ wenyu ayenda kwaka mwako mũtũlu ũtambaa kwĩkala nthĩ akeka masavu nĩ kana amanye kana e na mbesa ianĩtye sya kũũmina? Alea kwĩka ũu, nũtonya kwambĩĩsya mũsingi na ayĩemwa nĩ kũũmina.” (Luka 14:28, 29) Kwoou, ala maendete na Yesũ Yelusaleme, maaĩle kwĩthĩwa matw’ĩte vyũ kwĩanĩsya kĩanda kĩu matanamba kũtw’ĩka amanyĩw’a make. Yesũ nĩwatũmĩie ngelekany’o ĩngĩ nĩ kana amatetheesye maelewe nesa ũndũ ũsu. Aisye atĩĩ:

“Nĩ mũsumbĩ wĩva aithi kũkita na mũsumbĩ ũngĩ ũtambaa kwĩkala nthĩ na kũsũanĩa kana we, e na asikalĩ 10,000, nũtonya kũkĩlya vinya ũla ũngĩ wũkĩte kũkita nake e na asikalĩ 20,000? Ĩndĩ ethĩwa kwa w’o ndatonya kwĩka ũu, nũtũmaa kĩkundi kya andũ kĩkaneene na mũsumbĩ ũla ũngĩ e o kũasa, na aimantha mũuo.” Na nĩ kana atetheesye andũ asu mamanye ũndũ ngelekany’o ĩsu ĩmakonetye aisye atĩĩ: “O ta ũu, manyai nesa kana vaiĩ ũmwe wenyu ũtonya kũtw’ĩka mũmanyĩw’a wakwa atambĩte kũtia malĩ yake na syĩndũ syake.”—Luka 14:31-33.

Kwa w’o Yesũ ndaneenaa na andũ ala waendanĩtye namo me oka. Ĩndĩ Yesũ atavasya andũ onthe ala mekwenda kwĩmanyĩsya ĩũlũ wa Klĩsto kana nĩmaĩle kwĩka maũndũ ala waweta. Kwĩka ũu kwoonanasya kana nĩmeyũmbanĩtye vyũ kũtia kyonthe kĩla me nakyo ta malĩ yoo. O na maaĩle kwĩthĩwa meyũmbanĩtye kumya mathayũ moo ethĩwa nĩmekwenda kũtw’ĩka amanyĩw’a make. Ũsu nĩ ũndũ maaĩle kũsũanĩa na kũvoya mũno kwondũ wa w’o.

Yesũ nĩwasyokie aweta ĩũlũ wa ũndũ waĩ anaweta nthĩnĩ wa Ũtavany’a wa Kĩĩmanĩ yĩla waisye kana amanyĩw’a make nĩ “mũnyũ wa nthĩ.” (Mathayo 5:13) Yesũ nũtonya kwĩthĩwa oonanasya kana o tondũ mũnyũ ũtũmĩawa kũsũvĩa syĩndũ iikathũke, amanyĩw’a make maĩ na ũtonyi wa kũtetheesya andũ methĩwe na ngwatanĩo nzeo na Ngai na mayĩthĩwa na mwĩkalĩle mũseo. Yesũ aiminĩĩa ũtavany’a wake aisye atĩĩ: “Vate nzika, mũnyũ nĩ mũseo. Ĩndĩ mũnyũ waasya mũsamo, ũtonya kũtũngĩĩwa mũsamo waw’o ata?” (Luka 14:34) Ala mamwĩthukĩĩsye nĩmeesĩ kana mavinda amwe mũnyũ wavulana na syĩndũ ingĩ kuma mũthanganĩ ndweethĩawa wĩ mũtheu, na ũu watumaa wasya mũsamo na ũyĩthĩwa ũtatethya.

Kwoou Yesũ oonanasya kana o na ala meethĩĩtwe me amanyĩw’a make kwa ĩvinda ĩasa mayaaĩle kũleela o na vanini. Maleela mesaa kwĩthĩwa mate vata, o ta mũnyũ waĩtye mũsamo. Na kwoou nĩmesaa kũthekeewa nĩ andũ ala angĩ. O na nĩmesaa kwĩthĩwa mate ma vata methonĩ ma Ngai, na maituma ĩsyĩtwa ya Ngai yĩneenewa naĩ. Yesũ nĩwakindĩlĩĩle vata wa kwĩvathana na maũndũ asu, yĩla waisye atĩĩ: “Ũla wĩ na matũ ma kwĩw’a, nĩew’e.”—Luka 14:35.