Jesu nĩ athomithania maũndũ ma bata arĩ kwa mũtongoria ũmwe wa Afarisai kũrĩa ekũnyitĩtwo ũgeni. Arĩ o rũgendo-inĩ rwake erekeire Jerusalemu, andũ aingĩ magathiĩ hamwe nake. Nĩkĩ? Hihi nĩ mehaarĩirie gũtuĩka arũmĩrĩri ake a ma, gũtekũmakania maũndũ marĩa megũbatarũo meke?

O marĩ rũgendo-inĩ, Jesu akameera ũndũ hihi ũkũmakia amwe ao, akoiga: “Mũndũ o wothe angĩũka kũrĩ niĩ na ndathũire ithe na nyina na mũtumia wake na ciana ciake na ariũ na aarĩ a nyina, o hamwe na muoyo wake mwene, ndangĩtuĩka mũrutwo wakwa.” (Luka 14:26) No arenda kuuga atĩa akĩgweta ciugo icio?

Jesu ndaroiga atĩ arĩa othe matuĩkaga arũmĩrĩri ake magĩrĩirũo gũthũũra andũ ao. Handũ ha ũguo, aroiga magĩrĩirũo kũmathũũra na njĩra ya atĩ wendo wao kũmerekera ũkorũo ũrĩ mũnini gũkĩra ũrĩa mendete Jesu, no matigatuĩke ta mũndũ ũrĩa ngerekano-inĩ ya irio cia hwaĩ-inĩ waregire rĩĩtana rĩa kũnyitwo ũgeni tondũ tu aakoretwo ahikania. (Luka 14:20) Gũtuĩkaga atĩ Jakubu nĩ ‘aathũire’ Lea akenda Rakeli, kuonania atĩ eendete Rakeli makĩria ma ũrĩa eendete mwarĩ wa nyina Lea.​—Kĩambĩrĩria 29:31.

Rora wone atĩ Jesu aroiga mũrutwo wake abatiĩ gũthũũra nginya “muoyo wake mwene.” Ũguo nĩ kuuga atĩ mũrutwo wa ma abatiĩ kwenda Jesu makĩria ma ũrĩa endete muoyo wake, nginya agakorũo ehaarĩirie kũũrũo nĩguo kũngĩbatarania. Hatarĩ nganja, gũtuĩka mũrutwo wa Kristo nĩ ũndũ ũbatiĩ kuoywo na ũritũ, no ti kũhũthio.

Gũkorũo mũndũ arĩ mũrutwo no kũrehe moritũ na mĩnyamaro, tondũ Jesu aroiga: “Ũrĩa wothe ũtekuoya mũtĩ wake wa kũnyarirĩrũo na anũmĩrĩre ndangĩtuĩka mũrutwo wakwa.” (Luka 14:27) Mũrutwo wa ma wa Jesu abatiĩ gũkorũo ehaarĩirie kũnyarirũo o ta Jesu. Jesu o na nĩ oigĩte atĩ nĩ akooragwo nĩ thũ ciake.

Kwoguo andũ acio maratwarana na Jesu nĩ mabatiĩ gwĩcũrania na kinyi gũtuĩka mũrutwo wa Kristo nĩ kuuga atĩa. Jesu agatĩtĩrithia ũndũ ũcio na ngerekano. Akoiga: “Ta rĩu-rĩ, nũ gatagatĩ-inĩ kanyu akĩenda gwaka nyũmba ndaya na igũrũ ũtambaga gũikara thĩ agatara kĩrĩa arabatara nĩguo one kana kĩrĩa arĩ nakĩo nĩ gĩkũigana kũmĩrĩkia? Angĩaga gwĩka ũguo, ahota gwaka mũthingi no aremwo nĩ kũmĩrĩkia.” (Luka 14:​28, 29) Kwoguo, mbere ya gũtuĩka arutwo a Jesu, acio maratwarana nake Jerusalemu mekũbatiĩ kwamba gwĩciria kana nĩ mekũhingia biũ maũndũ marĩa mangĩbatarania. Akaheana ngerekano ĩngĩ kuonania bata wa gwĩka ũguo, akoiga:

“Nĩ mũthamaki ũrĩkũ arĩ na thigari ngiri ikũmi agĩthiĩ mbaara-inĩ kũrũa na mũthamaki ũngĩ ũtambaga gũikara thĩ agacokania ndundu na andũ ake amenye kana no ahote gwĩtiria ũcio  ũroka kũrũa nake arĩ na thigari ngiri mĩrongo ĩĩrĩ? Angĩkorũo kũna ndangĩmwĩtiria-rĩ, atũmaga gĩkundi kĩa mabarũthi, ũcio ũngĩ arĩ o kũraya, agacarie thayũ.” Nĩguo atĩtĩrithie ũrĩa ararutana, Jesu akoiga: “Na njĩra o ta ĩyo, gũtirĩ o na ũmwe wanyu ũtatigĩte indo ciake ciothe ũngĩtuĩka mũrutwo wakwa.”​—Luka 14:​31-33.

Ũrutani ũcio wa Jesu ndwerekeirio o andũ acio maratwarana nake barabara-inĩ. Arĩa othe mareruta ũhoro wa Kristo no mũhaka makorũo mehaarĩirie kũrũmĩrĩra maũndũ macio ararutana. Ũguo nĩ kuuga mabatiĩ gũkorũo mehaarĩirie kwĩima kĩrĩa gĩothe marĩ nakĩo ta indo ciao, o na mĩoyo yao, nĩguo matuĩke arutwo ake. Ũcio nĩ ũndũ mũndũ arabatara gwĩciria na kũhoya igũrũ rĩaguo.

Rĩu Jesu akarĩrĩria ũndũ aagwetete Mahunjio-inĩ make ma Kĩrĩma-inĩ rĩrĩa oigire atĩ arutwo ake nĩ “cumbĩ wa thĩ.” (Mathayo 5:13) Kwahoteka eendaga kuuga atĩ o ta ũrĩa cumbĩ ũgitagĩra kĩndũ gĩtigathũke, noguo arutwo ake magitagĩra andũ matigathũke kĩĩroho na kĩĩmĩtugo. Rĩu, mũthia-inĩ wa ũtungata wake, akoiga: “Cumbĩ nĩ mwega. No ũngĩte mũcamo waguo-rĩ, ũngĩcokio mũcamo na kĩĩ?” (Luka 14:34) Athikĩrĩria ake nĩ moĩ atĩ cumbĩ ũmwe wa hĩndĩ ĩyo ndwakoragwo ũrĩ mwega, nĩ ũndũ wa gũtukana na indo ingĩ, na kwoguo ũkaaga bata.

Kwoguo Jesu aronania atĩ nginya arĩa makoretwo marĩ arutwo ake ihinda inene, matiagĩrĩirũo nĩ kũreka kĩyo kĩao kĩnyihe. Mangĩreka kĩnyihe, no mage bata o ta cumbĩ ũtete mũcamo. Naguo ũndũ ũcio ũtũme andũ mamanyũrũrie. Makĩria ma ũguo, no mage gwĩtĩkĩrĩka nĩ Ngai, o na macambithie rĩĩtwa rĩake. Jesu agatĩtĩrithia bata wa gwĩthema moimĩrĩro macio, akoiga: “Ũrĩa ũrĩ na matũ ma kũigua nĩ aigue.”​—Luka 14:35.