ជំពូកទី៨៤
តើអ្នកកាន់តាមគ្រិស្តមានភារកិច្ចអ្វី?
-
ការលះបង់ដើម្បីក្លាយទៅជាអ្នកកាន់តាមលោកយេស៊ូ
លោកយេស៊ូបានបង្រៀនមេរៀនដ៏សំខាន់ជាច្រើន ពេលលោកកំពុងពិសាអាហារនៅផ្ទះរបស់អ្នកដឹកនាំផារិស៊ីម្នាក់។ ឥឡូវកាលដែលលោកយេស៊ូបន្តដំណើរឆ្ពោះទៅក្រុងយេរូសាឡិម បណ្ដាជនយ៉ាងច្រើនក៏ធ្វើដំណើរទៅជាមួយនឹងលោកដែរ។ ហេតុអ្វីពួកគេធ្វើដូច្នេះ? តើពួកគេពិតជាចាប់អារម្មណ៍ចង់ធ្វើជាអ្នកកាន់តាមពិតរបស់លោក ទោះជាលោកតម្រូវឲ្យពួកគេធ្វើអ្វីក៏ដោយឬ?
កាលដែលពួកគាត់កំពុងធ្វើដំណើរ អ្នកខ្លះប្រហែលជាភ្ញាក់ផ្អើល ពេលឮលោកយេស៊ូមានប្រសាសន៍ថា៖ «បើអ្នកណាមកឯខ្ញុំ ហើយមិនស្អប់ ឪពុក ម្ដាយ ប្រពន្ធ កូន បងប្អូនប្រុសស្រី និងជីវិតខ្លួន អ្នកនោះមិនអាចធ្វើជាអ្នកកាន់តាមខ្ញុំទេ»។ (លូកា ១៤:២៦) ប៉ុន្តែ តើលោកចង់មានន័យអ្វី?
លោកយេស៊ូមិនបានមានប្រសាសន៍ថាមនុស្សទាំងអស់ដែលក្លាយទៅជាអ្នកកាន់តាមលោក ត្រូវស្អប់ញាតិសន្ដានរបស់ពួកគេនោះទេ។ ផ្ទុយទៅវិញ លោកយេស៊ូចង់មានន័យថាពួកគេត្រូវស្រឡាញ់លោកខ្លាំងជាងស្រឡាញ់ញាតិសន្ដាន។ បើមិនដូច្នោះទេ ពួកគេអាចដូចបុរសក្នុងឧទាហរណ៍របស់លោកដែលបានទទួលការអញ្ជើញឲ្យចូលរួមពិសាអាហារ តែបានបោះបង់ចោលការអញ្ជើញដ៏សំខាន់នោះ ដោយសារគាត់បានដោះសាថាទើបតែរៀបការរួច។ (លូកា ១៤:២០) យ៉ាកុបដែលជាបុព្វបុរសរបស់ជនជាតិយូដា បាន«ស្អប់»លេអា តែស្រឡាញ់រ៉ាជែល ក្នុងន័យថាគាត់ស្រឡាញ់លេអាតិចជាងស្រឡាញ់រ៉ាជែលដែលជាប្អូនស្រីរបស់នាង។—លោកុប្បត្តិ ២៩:៣១
សូមកត់សម្គាល់នូវប្រសាសន៍របស់លោកយេស៊ូថាអ្នកកាន់តាមលោកគួរស្អប់‹សូម្បីតែជីវិតឬព្រលឹងខ្លួន›។ នេះមានន័យថាអ្នកកាន់តាមពិតរបស់លោកយេស៊ូត្រូវស្រឡាញ់លោកខ្លាំងជាងស្រឡាញ់ជីវិតរបស់គាត់ រហូតដល់សុខចិត្តលះបង់ជីវិតខ្លួន បើនោះជាការចាំបាច់។ នេះបញ្ជាក់យ៉ាងច្បាស់ថា ការធ្វើជាអ្នកកាន់តាមគ្រិស្តគឺជាភារកិច្ចដ៏ធ្ងន់ធ្ងរមួយ តែមុននឹងធ្វើដូច្នេះ ពួកគេគួរគិតពិចារណាឲ្យបានហ្មត់ចត់។
ក្នុងនាមជាអ្នកកាន់តាមលោក ពួកគេប្រហែលជាជួបនឹងការលំបាកនិងការបៀតបៀន ដូចប្រសាសន៍របស់លោកយេស៊ូថា៖ «អ្នកណាដែលមិនលីបង្គោលទារុណកម្មរបស់ខ្លួនហើយមកតាមខ្ញុំ មិនអាចធ្វើជាអ្នកកាន់តាមខ្ញុំទេ»។ (លូកា ១៤:២៧) ពិតមែន អ្នកកាន់តាមពិតរបស់លោកយេស៊ូត្រូវសុខចិត្តទទួលរងនូវការជេរប្រមាថដូចលោកយេស៊ូដែរ។ លោកយេស៊ូថែមទាំងបានមានប្រសាសន៍ថា លោកនឹងត្រូវស្លាប់ក្នុងកណ្ដាប់ដៃរបស់សត្រូវលោកទៀតផង។
ដូច្នេះ បណ្ដាជនដែលធ្វើដំណើរជាមួយនឹងលោកយេស៊ូ ត្រូវពិចារណាឲ្យបានវែងឆ្ងាយអំពីភារកិច្ចក្នុងការធ្វើជាអ្នកកាន់តាមគ្រិស្ត។ លោកយេស៊ូបានបញ្ជាក់រឿងនេះដោយលើកឧទាហរណ៍មួយថា៖ «ជាឧទាហរណ៍ ក្នុងចំណោមអ្នករាល់គ្នា បើចង់សង់ប៉មមួយ តើមានអ្នកណាមិនអង្គុយគិតគូរជាមុនសិនឲ្យដឹងថា ខ្លួនមានប្រាក់គ្រប់គ្រាន់ដើម្បីសង់ឲ្យបានរួចរាល់ឬទេ? បើមិនដូច្នេះ អ្នកនោះប្រហែលជាចាក់គ្រឹះ តែមិនអាចបង្ហើយសំណង់បានទេ»។ (លូកា ១៤:២៨, ២៩) ហេតុនេះ មុននឹងសម្រេចចិត្តធ្វើជាអ្នកកាន់តាមលោកយេស៊ូ បណ្ដាជនទាំងនោះគួរគិតពិចារណាយ៉ាងច្បាស់លាស់ដើម្បីបំពេញភារកិច្ចរបស់ខ្លួនឲ្យបានពេញលេញ។ លោកយេស៊ូបានបញ្ជាក់ចំណុចនោះដោយលើកឧទាហរណ៍មួយទៀត។
លោកមានប្រសាសន៍ថា៖ «បើស្តេចណាចេញទៅធ្វើសង្គ្រាមនឹងស្តេចមួយទៀត ស្តេចនោះនឹងអង្គុយប្រឹក្សាជាមុនសិនឲ្យដឹងថា បើខ្លួនមានទាហានមួយម៉ឺននាក់ តើអាចតទល់នឹងអ្នកដែលមកច្បាំងដោយមានទាហានពីរម៉ឺននាក់ឬទេ? បើពិតជាតទល់មិនបាន ស្តេចនោះចាត់ទូតមួយចំនួនឲ្យទៅសុំចរចារកសន្ដិភាព កាលដែលស្តេចមួយទៀតនៅឆ្ងាយនៅឡើយ»។ លោកយេស៊ូបញ្ជាក់គោលចំណុច ដោយមានប្រសាសន៍ថា៖ «ដូច្នេះ កុំច្រឡំឡើយ ក្នុងចំណោមអ្នករាល់គ្នា គ្មានអ្នកណាម្នាក់ដែលមិនលះបង់របស់ទាំងអស់ដែលខ្លួនមាន អាចធ្វើជាអ្នកកាន់តាមខ្ញុំបានទេ»។—លូកា ១៤:៣១-៣៣
ប្រសាសន៍របស់លោកយេស៊ូមិនគ្រាន់តែសំដៅលើបណ្ដាជនដែលកំពុងធ្វើដំណើរជាមួយនឹងលោកប៉ុណ្ណោះទេ តែសម្រាប់មនុស្សទាំងអស់ដែលរៀនអំពីគ្រិស្ត ពួកគេក៏ត្រូវសុខចិត្តធ្វើតាមអ្វីដែលលោកបង្គាប់ដែរ។ នេះមានន័យថាពួកគេត្រូវត្រៀមខ្លួនដើម្បីលះបង់អ្វីទាំងអស់ដែលពួកគេមាន រួមទាំងទ្រព្យសម្បត្ដិ និងជីវិតរបស់ពួកគេ បើពួកគេចង់ធ្វើជាអ្នកកាន់តាមលោក។ ពួកគេត្រូវគិតពិចារណា ហើយអធិដ្ឋានអំពីរឿងនោះ។
ឥឡូវលោកយេស៊ូមានប្រសាសន៍ម្ដងទៀតអំពីរឿងដែលលោកធ្លាប់បង្រៀនបណ្ដាជននៅលើភ្នំ ពេលលោកប្រាប់ថាពួកអ្នកកាន់តាមលោកជា«អំបិលនៃផែនដី»។ (ម៉ាថាយ ៥:១៣) លោកទំនងជាចង់មានន័យថាដូចអំបិលដែលអាចបង្ការអ្វីមួយមិនឲ្យខូច នោះពួកអ្នកកាន់តាមលោកក៏មានឥទ្ធិពលដែលអាចរក្សាការពារមនុស្សពីការបាត់បង់ចំណងមិត្តភាពរបស់ពួកគេជាមួយនឹងព្រះយេហូវ៉ា ព្រមទាំងជួយពួកគេឲ្យរក្សាសីលធម៌ខ្ពង់ខ្ពស់ទៀតផង។ កាលដែលកិច្ចបម្រើរបស់លោកជិតមកដល់ទីបញ្ចប់ហើយ លោកមានប្រសាសន៍ថា៖ «អំបិលគឺល្អពិតមែន ប៉ុន្តែបើអំបិលបាត់បង់ជាតិប្រៃ តើអ្នកអាចដាក់អ្វីលើអំបិលនោះដើម្បីធ្វើឲ្យមានជាតិប្រៃឡើងវិញបាន?»។ (លូកា ១៤:៣៤) នៅសម័យនោះ អ្នកដែលស្ដាប់លោកដឹងថាអំបិលខ្លះគឺមិនសុទ្ធទេ ដោយសារមានលាយសារធាតុផ្សេងៗ។ ក្រោយមកអំបិលនោះបាត់បង់ជាតិប្រៃ ហើយក៏លែងមានប្រយោជន៍ទៀត។
ហេតុនេះ លោកយេស៊ូកំពុងប្រាប់ថាសូម្បីតែអ្នកដែលធ្វើជាអ្នកកាន់តាមលោកយូរហើយ ក៏មិនត្រូវធ្វើឲ្យការតាំងចិត្តរបស់ពួកគេក្នុងការបម្រើព្រះចុះខ្សោយដែរ។ បើពួកគេចុះខ្សោយ នោះពួកគេនឹងទៅជាឥតប្រយោជន៍ ដូចអំបិលដែលបាត់បង់ជាតិប្រៃ។ រួចមក ពិភពលោកនឹងសើចចំអកឲ្យពួកគេ។ លើសនោះទៅទៀត ពួកគេនឹងមិនទទួលការពេញចិត្តពីព្រះឡើយ។ ពួកគេរហូតដល់ធ្វើឲ្យនាមរបស់ព្រះទទួលនូវការអាប់ឱនទៀតផង។ ដើម្បីជៀសវាងពីលទ្ធផលបែបនេះ លោកយេស៊ូមានប្រសាសន៍ថា៖ «អ្នកណាដែលមានត្រចៀកអាចស្ដាប់ឮ ចូរស្ដាប់ចុះ»។—លូកា ១៤:៣៥
