Yesu anangwile vatu chishina chachilemu omu apwile nakulya kuzuvo yatwamina wavaFwaliseu. Omu Yesu apwile nakuya kuYelusalema, mayongomena amukavilenga. Mwomwo ika? Kutala vasakile chikupu kupwa vaka-kumukavangiza chamokomoko navyuma vyasakiwile kuli vakiko tahi?

Omu vapwile nakuya mujila, Yesu ahanjikile vyuma vize vyakomwesele vatu vamwe, ambile ngwenyi: “Kachi nge mutu mweza kuli ami, oloze keshi kuhunga ise, nanaye, napuwenyi, navana venyi navandumbwenyi vamalunga navava vamapwevoko, numba vene kuhunga mwono wenyi, keshi kuhasa kupwa kambaji kamiko.” (Luka 14:26) Uno mazu awa ahanjikile Yesu atalikishile mulihi?

Yesu kapwile nakulumbununa nge vatu vaze vapwile vaka-kumukavangiza vatelele kuhunga vausoko wavoko. Oloze apwile nakulumbununa nge kavatelele kuzanga chikuma vausoko wavo kuhambakana ikiyeko. Kavatelele kupwa ngana mwauze lunga wamuchifwanyisa ahanjikile Yesu uze akanyine kuya kukulya chachingoloshi mwomwo ngwenyi nambate pwevo kalinwomu. (Luka 14:20) Mbimbiliya yamba ngwavo kakuluka yavaYuleya Yakova ‘ahungile’ Leya nakuzanga Lakele, kulumbununa nge azangile chikuma Lakele kuhambakana Leya.—Kuputuka 29:31; kwinyikila chamwishi.

Nyingililenu ngwenu Yesu ambile ngwenyi kambaji wamwenemwene atela “kuhunga [na]mwono wenyi,” kulumbununa nge atela kuzanga chikuma Yesu kuhambakana mwono wenyi, kaha nawa nahase kulisuula kufwila hamilimo yaYesu, nge chinahase. Chikupu vene, kupwa kambaji kaKulishitu himulimo waulemu chikuma uze mutu katela kulelesako. Mutu atela kushinganyekaho kanawa shimbu kanda asakule kupwa kambaji.

Kupwa kambaji chinahase kuneha luyanjisa chipwe ukalu, mwomwo Yesu ambile ngwenyi: “Weshowo mwahona kumbata chitondo chenyi chakuyanjishila nakungukavangiza, keshi kuhasa kupwa kambaji kamiko.” (Luka 14:27) Eyo, kambaji kaYesu wamwenemwene atela kulisuula kuhita muluyanjisa, ngana luze amwene Yesu. Kaha Yesu nawa ambile ngwenyi mwetavila vamujihe kuli vaka-kole jenyi.

Ngocho mayongomena aze apwile nakukava Yesu atelele kutachikiza kanawa omu chalumbunukila kupwa kambaji kaKulishitu. Yesu ashindakanyine chishina kanechi hakuzachisa chakutalilaho. Ambile ngwenyi: “Chakutalilaho, iya hali enu mwasaka kutunga kaposhi, mwazeneka chatete kutwama hamavu nakulava jimbongo jakutungisa, amone numba nge ali najimbongo jakukamanyisa? Mokomoko nahase kwala kaha chihela, oloze mwahona kukamanyisa.” (Luka 14:28, 29) Shikaho, vatu vaze vapwile nakuya naYesu kuYelusalema vatelele kutachikiza nge shimbu kanda mutu apwenga kambaji kaYesu, atela kushinganyeka nakwitavila numba nge nahase kuzata mulimo kana nakuutesamo chikupu. Ashindakanyine chishina kanechi hakuzachisa chifwanyisa chikwavo. Ambile ngwenyi:

“Mwangana muka mwaya nakwasa jita namwangana mukwavo, mwazeneka chatete kutwama hamavu  nakutwama punga, amone numba nge ikiye namaswalale jenyi 10,000 mwahasa kulwa nayauze mweza kuli ikiye namaswalale 20,000? Kachi nge namono ngwenyi keshi kuhasa kulinga ngochoko, kaha mwatuma valuwa jenyi vakashimutwile vatwame mukuunda shimbu uze achili kwakusuku.” Hakusaka kushindakanya chishina kana, Yesu ambile ngwenyi: “Chochimwe nawa, weshowo hali enu mwahona kuseza vyuma vyenyi vyosena, keshi kuhasa kupwa kambaji kamiko.”—Luka 14:31-33.

Yesu kapwile nakuhanjika mazu awa kumayongomena aze apwile nakumukava kahako. Vatu vosena vaze anangwile Kulishitu vatelele kulisuula nakulinga vyuma ahanjikile. Echi chalumbununa nge hakusaka vapwenga tumbaji twenyi, vatelele kupwa vakulizanga nakusuula vyuma vyavo vyosena kuhakilako vene nakuyoya chavo. Chuma kana chasakiwa kushinganyekaho chikuma nakulomba.

Yesu jino akatwile chihande chize ahanjikile muChihande chenyi ChahaPili nakwamba ngwenyi tumbaji twenyi vapwa “mungwa wahamavu.” (Mateu 5:13) Mazu kana alumbununa nge ngana muze mungwa uvene weji kulingisanga vyuma vihone kupola washi, natumbaji twenyi veji kukafwanga vatu vapwenga vakukingiwa kushipilitu namuvishinganyeka. Omu apwile kwakamwihi nakukumisa mulimo wenyi wakwambulula, ambile ngwenyi: “Mungwa wapwa vene wamwenemwene. Oloze kachi nge mungwa nausamuka, kaha ngolo jawo navajikindulwisa cheka naka?” (Luka 14:34) Vaka-kumwivwilila vatachikijile ngwavo mungwa umwe uze wapwileko halwola luze kawapwile wamwazako mwomwo walifutwilenga navyuma vyeka, shikaho, vatu kavauzachishilenga chikumako.

Ngocho Yesu apwile nakusolola nge numba vene vatu vaze vapwile tumbaji twenyi hamyaka yayivulu kavatelele kuzeyako. Nge navazeya kaha navapwa vamokomoko ngana mwamungwa uze unasamuka lyehi, ngocho vatu mukaye navavatoleka. Kutwala muze, navasaula lijina lyaKalunga, kaha keshi kuvevwila kuwahako. Yesu ahanjikile vyuma vatela kulinga tumbaji twenyi mangana vyuma kana vihone kuvasolokela, ambile ngwenyi: “Ou ali namatwitwi akwivwa evwilile.”—Luka 14:35.