Pa nyengu yo Yesu wenga kunyumba ya mulongozgi wa Afarisi, wangusambiza fundu zakukhumbika ukongwa. Wachilutirizga ulendu waki wakuluta ku Yerusalemu, ŵanthu anandi amulondonga. Ntchifukwa wuli ŵanthu ŵenaŵa amulondonga? Kumbi yiwu akhumbanga nadi kuja akusambira ŵaki chinanga kuti kuchita viyo yenga nkhani yikulu?

Ŵe munthowa, Yesu wangukamba mazu ngo nganguziziswa ŵanthu anyaki wo wenga nawu pa ulendu wenuwu. Iyu wangukamba kuti: “Asani munthu watuza kwaku ini ndipu waleka kutinkha awisi, anyina, muwolu ŵaki, ŵana ŵaki, aku ŵaki ndi avurwa ŵaki, azichi ŵaki kweniso chinanga ndi umoyu waki, wangaja cha wakusambira wangu.” (Luka 14:26) Kumbi Yesu wang’anamuwanganji pakukamba mazu ngenanga?

Yesu wang’anamuwanga kuti ŵanthu wosi wo asankha kuja akusambira ŵaki atinkhengi abali ŵawu cha. Kweni wang’anamuwanga kuti yiwu akhumbika kwanja ukongwa Yesu m’malu mwa kwanja ukongwa abali ŵawu. Akhumbika cha kuchita vo munthu yo wazumbulika mu ntharika ya chakurya cha mazulu wanguchita. Iyu wangukana kuluta ku phwandu lo wangudanika chifukwa pa nyengu iyi ndipu wato ŵaka munthukazi. (Luka 14:20) Bayibolu likamba kuti Yakobe yo wenga wisewu wa Ayuda, ‘wangutinkha’ Leya ndipu wangwanja Rakelu. Ivi ving’anamuwa kuti Yakobe wayanjanga ukongwa Rakelu kuluska Leya.—Chiyambo 29:31; mazu ngamumphata.

Yesu wangukamba kuti wakusambira waki watenere kutinkha “chinanga ndi umoyu waki.” Venivi, ving’anamuwa kuti wakusambira chayiyu waku Yesu wakhumbika kwanja ukongwa Yesu kuphara umoyu waki. Ndipu asani vingachitika, wangataya umoyu waki chifukwa chaku Yesu. Kukamba uneneska, kuja wakusambira waku Khristu mbudindu ukulu. Ndipu munthu wakhumbika kuyiŵanaŵaniya umampha nkhani yeniyi wechendasankhi kuja wakusambira waku Yesu.

Asani munthu waja wakusambira waku Yesu, wangakumana ndi masuzgu kweniso wangatombozgeka. Ve viyo chifukwa Yesu wangukamba kuti: “Weyosi yo waleka kupinga chimiti chaki chakutombozgekiyapu ndi kundilondo, wangaja cha wakusambira wangu.” (Luka 14:27) Mwaviyo, wakusambira chayiyu waku Yesu wakhumbika kuja wakunozgeka kukumana ndi masuzgu nge ngo Yesu wangukumana nangu. Yesu wangukamba kuti iyu wazamubayika ndi arwani ŵaki.

Mwaviyo, gulu la ŵanthu lo layendanga limoza ndi Yesu lakhumbikanga kuŵanaŵaniya mwakuphwere kuti kuja wakusambira waku Khristu kung’anamuwanji. Yesu wangukamba ntharika yo yingulongo kukhumbika kwa fundu yeniyi. Iyu wangukamba kuti: “Mwakuyeruzgiyapu, ndiyani waku yimwi yo asani wakhumba kuzenga nyumba yitali waleka kuja dankha pasi ndi kuŵerengese kuti wawoni asani we ndi ndalama zakukwana kuti wayimalizi? Asani wangaleka kuchita viyo, mbwenu wazengengi ŵaka fawundeshoni pe kwambula kuyimaliza.” (Luka 14:28, 29) Ndichu chifukwa chaki ŵanthu wo ayendanga limoza ndi Yesu pakuluta ku Yerusalemu, ŵechendasankhi kuja akusambira aku Yesu akhumbikanga kusimikiziya kuti afiskengi udindu wenuwu. Yesu wangukamba so ntharika yinyaki yo yingusimikiziya fundu yeniyi.

Iyu wanguti: “Ndi fumu niyi yo yingaluta kuchichita nkhondu ndi fumu yinyaki kwambula kuja dankha  pasi ndi kufumbiya zeru kuti yiwoni asani asilikali ŵaki 10,000, angafiska kulimbana ndi fumu yinyaki yo ye ndi asilikali 20,000? Kukamba uneneska, asani yawona kuti yingafiska cha, fumu yo yingakhumbika kutuma nthumi kuti zikakumani ndi fumu yinyaki yo yeche kutali kuchipempha kuti aje pachimangu.” Kuti wasimikiziyi fundu yeniyi, Yesu wangukamba kuti: “Mwakuyanana ŵaka, ziŵani kuti weyosi waku yimwi yo watondeka kusiya katundu waki yosi, wangaja cha wakusambira wangu.”—Luka 14:31-33.

Yesu wachikamba fundu zenizi, wakambiyanga gulu la ŵanthu wo amulondonga pe cha. Ŵanthu wosi wo asambira vakukwaskana ndi Khristu akhumbika kuchita vo iyu wakamba pa lemba ili. Venivi ving’anamuwa kuti yiwu akhumbika kuja akunozgeka kupereka chechosi cho ŵe nachu, vinthu vo ŵenavu chinanga mbumoyu wawu asani akhumba kuja akusambira ŵaki. Nkhani iyi, njakukhumbika kuyiŵanaŵaniya kweniso kuyipemphere munthu wechendasankhi vakuchita.

Pavuli paki, Yesu wangukamba nkhani yo wangukamba pa upharazgi waki wa pa phiri kuti akusambira ŵaki ŵenga nge “mche wa charu.” (Mateyu 5:13) Yesu wang’anamuwanga kuti mche chayiwu utovya kuti chakurya chilekengi kunangika. Mwakuyana ŵaka, vo akusambira ŵaki atingi achitengi vatingi viwovyengi ŵanthu kuti alekengi kuchita mijalidu yiheni kweniso kuti aje pa ubwezi ndi Chiuta. Pa nyengu iyi, po wenga pafupi kumaliza uteŵeti waki, Yesu wangukamba kuti: “Kukamba uneneska, mche ngwamampha. Kweni asani wasukuluka, ntchinthu wuli cho chiwunowesengi?” (Luka 14:34) Ŵanthu wo amuvwisiyanga aziŵanga kuti penga mche unyaki wakusukuluka wo wenga wakusazgikana ndi vinthu vinyaki ndipu venivi vachitiskanga kuti ulekengi kugwira ntchitu umampha.

Mwaviyo, Yesu wangulongo kuti chinanga mbanthu wo aja akusambira ŵaki kwa nyengu yitali, akhumbika cha kuwere vuli pakuteŵete Chiuta. Asani venivi vingachitika, yiwu angaja ambula ntchitu mwakuyanana ndi mche wakusukuluka wo uleka kugwira ntchitu umampha. Chifukwa cha venivi, ŵanthu angaŵanyoza. Ndipu kuluska vosi, Chiuta wangaleka kuŵayanja ndipuso anganyozesa zina laki. Mwaviyo, Yesu wangukamba vo munthu wakhumbika kuchita kuti venivi vileki kumuchitikiya. Iyu wangukamba kuti: “Yo we ndi makutu kuti wavwi, wavwi.”—Luka 14:35.