Jesu wayiisya ziiyo ziyandika kapati ciindi naali kulya kuŋanda yamusololi umwi waba Farisi. Lino Jesu nazumanana kweenda mulweendo lwakwe lwakuya ku Jerusalemu, makamu mapati aabantu ayaabweenda anguwe. Nkaambo nzi? Sena ncobeni baliyandide kuba basikumutobela beni-beni, kunyina makani azintu nzyobayandika kucita?

Nobayaabweenda munzila, Jesu waamba cintu cimwi ambweni icabagambya bamwi akati kabo, wati: “Ikuti umwi waboola kulindime pele kabayanda kapati [naa, katasulaiki] bausyi, banyina, mukaintu wakwe, bana, abanabokwabo basankwa abasimbi, inzya, alimwi mane abuumi bwakwe bwini, takonzyi kuba sikwiiya wangu.” (Luka 14:26) Pele ino upandulula nzi mukwaamba boobu?

Aawa Jesu taambi kuti boonse aabo ibaba basikumutobela beelede kusulaika naa kutabayanda babbululu babo pe. Pele, upandulula kuti tabeelede kubayanda kapati kwiinda mbobayanda Jesu, tabeelede kuba mbuli muntu uulya wamucikozyanyo cakwe cacilalilo iwakakaka bwiite ibuyandika akaambo kakuti wakazwide aakukwata. (Luka 14:20) Sikale waba Juda Jakobo waambwa kuti ‘wakalimusulide’ Leya pele wakali kuyanda Rakele, calo caamba kuti Rakele wakali kumuyanda kapati kwiinda mwanookwabo Leya.—Matalikilo 29:31; bupanduluzi buyungizyidwe.

Amubone kuti Jesu waamba kuti sikwiiya weelede kubusulaika nobuba “buumi bwakwe mwini.” Eeci caamba kuti sikwiiya mwini-mwini weelede kumuyanda kapati Jesu kwiinda mbwayanda buumi bwakwe mwini, inzya ikuti kakuyandika weelede kulisungula kusweekelwa nobuba buumi bwakwe. Cakutadooneka, kuba sikwiiya wa Kristo mukuli mupati. Taweelede kubonwa kuti makani maniini, naa kubwezyegwa kakunyina kuyeeya cakulomya.

Ikuba sikwiiya kulakonzya kuleta buyumuyumu alimwi akupenzyegwa, nkaambo Jesu waamba kuti: “Kufwumbwa uutanyamuni cisamu cakwe cakupenzyezya akunditobela takonzyi kuba sikwiiya wangu.” (Luka 14:27) Ncobeni, sikwiiya mwini-mwini wa Jesu weelede kulisungula kusampaulwa mbubonya mbwaakasampaulwa Jesu. Mane Jesu waamba kuti uyakujaigwa abasinkondonyina.

Aboobo makamu aabantu aabo ibeenda a Jesu beelede kubikkila maano kapati kulanga-langa ncocaamba kuba sikwiiya wa Kristo. Jesu wakankaizya makani aaya kwiinda mukupa cikozyanyo. Waamba kuti: “Mucikozyanyo, nguni akati kanu uuyanda kuyaka ngazi uutasaanguni kukkala ansi akubona mali aayandika, kutegwa azyibe naa ulijisi mali aakkwana kuyasya alimwi akumanizya ngazi eeyo? Buyo-buyo, ulakonzya kuyaka ntalisyo ilikke akukakilwa kwiimanizya.” (Luka 14:28, 29) Aboobo, kabatanaba basikwiiya bakwe, aabo beenda anguwe kuya ku Jerusalemu beelede kuti kabakanzide camoyo woonse kunyamuna mukuli woonse wakuba sikwiiya. Wakankaizya kaambo aaka kwiinda mukupa cikozyanyo acimbi, ulaamba:

“Ino mwami nzi uujisi basikalumamba bali 10,000 uuya kukulwana nkondo amwami umbi, uutasaanguni kukkala ansi kuyeeya akulomba lulayo kuli bamwi kubona naa inga wacikonzya  kulwana mwami uujisi basikalumamba bali 20,000? Ikuti wabona kuti inga tacikonzyi, ulatuma baiminizi bakwe kuyoobandika makani aaluumuno amwaminyina ooyo kacili kule.” Kutegwa akankaizye kaambo aaka, Jesu wati: “Mbubonya buyo, kamuzyi kuti kunyina muntu akati kanu uutasiyi lubono lwakwe loonse uukonzya kuba sikwiiya wangu.”—Luka 14:31-33.

Mubwini, makani aaya Jesu taambili buyo makamu aabantu aabo ibayaabumutobela munzila. Boonse aabo ibaiya makani aajatikizya Kristo beelede kuti kabalisungude kucita ncaamba aawa. Eeci caamba kuti beelede kulibambila kusweekelwa zintu zyoonse nzyobajisi—lubono lwabo, nobuba buumi bwabo—ikuti kabayanda kuba basikwiiya bakwe. Aaya makani aayandika kukkalilwa ansi kuyeeya alimwi akwaapailila.

Mpoonya Jesu waamba makani amwi ngaakaambide mubufwaafwi mu Mulumbe wakwe Waacilundu naakaamba kuti basikwiiya bakwe “munyo wanyika.” (Matayo 5:13) Kulibonya kuti wakali kupandulula kuti mbubonya munyo wini mboupa kuti cakulya citafwambaani kubola, basikwiiya bakwe bapa kuti bantu batanyonyooki, ikubakwabilila kuti batasofwaali kumuuya alimwi amukulilemeka. Lino mulimo wakwe mbouli afwaafwi kumana, waamba kuti: “Mubwini munyo mubotu. Pele ikuti munyo wasampuka, ino inga wacitwa buti kuti utalike kulula alimwi?” (Luka 14:34) Baswiilizi bakwe balizyi kuti munyo umwi uuliko aciindi eeci tuuli munyo walo-walo, ulivwelene abulongo, aboobo tuukwe mulimo kapati.

Aboobo Jesu utondezya kuti nobaba baabo ibali basikwiiya bakwe kwaciindi cilamfwu tabeelede kujoka munsi naa kulengaana akaambo kazintu zimwi. Ikuti bacita boobo, balakonzya kubula mulimo, mbuli munyo wasampuka. Aboobo, nyika ilakonzya kubaseka. Kuyungizya waawo, inga tiibeelela kuli Leza, mane akuleta masampu kuzina lyakwe. Jesu wakankaizya mbociyandika kweeleba cintu eeci, ulaamba: “Ooyo ujisi matwi aamvwa, aamvwe.”—Luka 14:35.