Han kumaon hi Jesus ha balay han usa nga lider han mga Pariseo, nagtutdo hiya hin importante nga mga leksyon. Samtang nagbibiyahe hiya ngadto ha Jerusalem, damu an umupod ha iya. Kay ano? Interesado gud ba hira nga magin tinuod niya nga mga sumurunod, anoman an pagkinahanglanon ha ira?

Samtang nagbabaktas hira, may ginsiring hi Jesus nga bangin nakahipausa ha pipira: “Bisan hin-o nga nadaop ha akon ngan mas nahigugma ha iya tatay, nanay, asawa, mga anak, kabugtoan, ngan bisan ha iya kalugaringon nga kalag kay ha akon, diri hiya magigin akon disipulo.” (Lucas 14:26) Ano an iya karuyag sidngon?

Diri iginpapasabot ni Jesus nga kinahanglan literal nga kangalasan han ngatanan nga nagigin iya mga disipulo an ira mga paryente. Lugod, iginpapasabot niya nga kinahanglan mas higugmaon nira hiya kay han ira mga paryente, diri pariho han tawo ha ilustrasyon mahitungod han panihapon nga waray karawata an importante nga imbitasyon tungod kay bag-o la hiya nga kasal. (Lucas 14:20) An kaapoy-apoyan han mga Judio nga hi Jacob ‘nangalas’ kan Lea ngan naghigugma kan Raquel, karuyag sidngon nga mas ginhigugma ni Jacob hi Raquel kay ha kan Lea.—Genesis 29:31.

Tigamni nga hi Jesus nagsiring nga sadang kangalasan han usa nga disipulo ‘bisan an iya kalugaringon nga kalag,’ o kinabuhi. Nagpapasabot ini nga an tinuod nga disipulo kinahanglan maghigugma kan Jesus labaw pa kay ha iya paghigugma ha iya kalugaringon nga kinabuhi ngan andam pa ngani magsakripisyo han iya kinabuhi kon kinahanglan. Matin-aw, seryoso nga responsabilidad an pagin disipulo han Kristo. Diri kay basta la nga masulod hito an usa nga tawo nga diri anay ginhuhunahuna hin maopay.

An usa nga disipulo bangin makaeksperyensya hin kakurian ngan pagtimaraot, kay hi Jesus nagsiring: “Bisan hin-o nga diri nagpapas-an han iya pasakitan nga kahoy ngan diri nasunod ha akon, diri magigin akon disipulo.” (Lucas 14:27) Oo, an tinuod nga disipulo kinahanglan andam nga umatubang ha mga pagtamay nga pariho han gin-ilob ni Jesus. Nagsiring hi Jesus nga andam pa ngani hiya mamatay ha mga kamot han mga kaaway.

Salit kinahanglan turotimbangon gud han mga tawo nga nagbiyahe kaupod ni Jesus kon ano an kahulogan han pagin disipulo han Kristo. Ginpabug-atan ini ni Jesus pinaagi hin ilustrasyon. Hiya nagsiring: “Hin-o ha iyo nga naruruyag pagtukod hin torre an diri anay malingkod ngan magkwenta han magagasto basi masiguro kon may ighuhuman hiya hito? Kay kon diri, bangin maglatag hiya han pundasyon pero diri makakahuman hito.” (Lucas 14:28, 29) Salit, antes pa magin mga disipulo ni Jesus, adton mga nagbibiyahe kaupod niya ngadto ha Jerusalem kinahanglan determinado na gud ha pagtuman hin bug-os hito nga responsabilidad. Ginpabug-atan niya ini pinaagi hin usa pa nga ilustrasyon:

“Hin-o nga hadi nga makikig-away ha usa nga hadi an diri anay malingkod ngan mangaro hin sagdon kon hiya ba ngan an iya 10,000 nga kasundalohan makakaatubang ha naabot nga iya kaaway nga may 20,000 nga kasundalohan? Kon diri gud niya maaakos, magsusugo hiya hin mga embahador basi makigmurayaw samtang hirayo pa an kaaway.” Basi pabug-atan an iya punto, hi Jesus nagsiring: “Sugad man, diri magigin akon disipulo an bisan hin-o nga diri naruruyag pagbaya ha ngatanan nga iya panag-iya.”—Lucas 14:31-33.

Syempre, an ginsiring ni Jesus diri la para ha mga nagsisinunod ha iya. An ngatanan nga nahibaro mahitungod han Kristo kinahanglan andam pagbuhat han iya mga ginsiring. Nagpapasabot ini nga kinahanglan andam hira nga isakripisyo an ngatanan nga may-ada hira—an ira panag-iya, bisan pa ngani an ira kinabuhi—kon karuyag nira magin iya disipulo. Kinahanglan ini hunahunaon ngan ig-ampo.

Yana ginhisgotan ni Jesus an topiko nga iya gin-unabi didto ha iya Sermon ha Bukid han nagsiring hiya nga an iya mga disipulo amo an “asin han tuna.” (Mateo 5:13) Posible nga an iya karuyag sidngon, sugad la nga an literal nga asin nakakapreserba, an iya mga disipulo nakakapreserba liwat hin mga tawo pinaagi ha pagpanalipod ha ira tikang ha kadaot ha espirituwal ngan moral. Yana nga hirani na matapos an iya ministeryo, hiya nagsiring: “Ha pagkamatuod, an asin maopay. Pero kon magtab-ang ito, paonan-o maibabalik an kaasin hito?” (Lucas 14:34) Maaram an iya mga mamarati nga may mga asin hadto nga diri puro, may halo nga baras, ngan kon magtab-ang na ito diri na ito magagamit.

Iginpakita ni Jesus nga kinahanglan diri pasagdan bisan hadton maiha na nga mga disipulo nga magluya an ira determinasyon. Kon mahitabo ito, magigin waray hira pulos pariho hin asin nga nagtab-ang. Salit bangin tamayon hira han mga tawo. Labot la hito, mawawad-an hira han pag-uyon han Dios, ngan magpapakaalo pa ngani hira ha iya ngaran. Ginpabug-atan ni Jesus nga importante nga likyan ito, hiya nagsiring: “An may mga talinga ha pagpamati, mamati.”—Lucas 14:35.