Ngandak ngélé mu nson wé, Yésu a bi unda nseñ i bana suhulnyuu. (Lukas 14:8-11) A yé yéñ bôlôm ni bôda ba ba gwé ngôñ i gwélél Djob ni suhulnyuu. Ndi ipam nano, bebek bahogi ikété yap ba nyiba kiki baboñbéba bakeñi.

Farisai ni bayimbén ba nyimbe le bôt bo ba nyan, bon ba noñ Yésu, ba gwéhék ki biniigana gwé. Jon ba ntjelel ba kalak le: “I mut nunu a nleege baboñbéba, a jek lôñni bo.” (Lukas 15:2) Farisai ni bayimbén ba nhoñol le ba nloo bôt bape, inyu yap, bana bôt ba yé kiki biték i si makôô map. Inyu unda diyana ba gwé inyu mintén mi bôt mi, baéga bibase ba ngwélél ini buk ni hop Lôk Héber le ‛am ha·’aʹrets, hala wee “bôt ba nkoñ” inyu pôdôl bo.

Maselna ni bo, Yésu a nti bôt bobasôna lipém, a ñunda ki bo loñgeñem ni konangoo. Jon ngandak bôt i i mboñ bibéba bi mam i yé bebee i emble Yésu ni suhulnyuu. Ndi kii Yésu a nôgda, lelaa a ntimbhe mu kiki ba ôm nye nsohi inyule a nhôla i nya bôt i?

Inyu timbhe, Yésu a nti hihéga hi hi mpôôna hi a bi ti ndék ngéda bisu i Kapernaum. (Matéô 18:12-14) Yésu a mpot i pôn-ga wee Farisai i yé bôt ba téé sép, bôt Djob a ntat mu bémba yé. Maselna ni hala, Yésu a mpôdôl bôt ba suhulnyuu kiki minimlak mi mintômba. A nkal le:

“Njee ikété nan, ibale a gwé mbôgôl mintômba ndi a nimis wada, a’ yék bé mini môm bôô ni bôô i ñoñ, a ke yéñ u u nimil letee a léba wo? I ngéda a nléba wo, a mbegee wo i bituu gwé, a konok maséé. I ngéda a mpam i ndap, a nsébél mawanda mé ni bôt bé ba libôk, a kal bo le: ‘Kona maséé lôñni me inyule me nléba ntômba wem u u bi nimil.’”​—Lukas 15:4-6.

Bimbe biniigana Yésu a mpémés? A ntoñol le: “Me nkal bé le hala nyen maséé m’a ba i ngii inyu mboñbéba wada nu a ntam bibéba gwé iloo inyu môm bôô ma bôt ni bôô ba ba téé sép, ba ban-ga bé le ba tam bibéba gwap.”​—Lukas 15:7.

Hihéga hi Yésu inyu hielñem hi nlama tihba Farisai. Ba nhoñol le ba téé sép ni le ba gwé bé ngôñ i hiel ñem. Ngéda bahogi ba bi ôm Yésu nsohi hala a yé ndék nwii bisu inyule a bé je ni bakottas ni baboñbéba, Yésu a bi timbhe bo le: “Me bi lo bé me i sébél bôt ba téé sép, ndi baboñbéba.” (Markô 2:15-17) Kiki ba  ntehe bé nseñ i hiel miñem inyule ba téé sép, Farisai i nkôhna bé Yéhôva maséé. Maselna mon ma yé ngéda béba mut yon i nhiel toi ñem.

Inyu yigye le maséé ma yé i ngii i ngéda mboñbéba a nhiel ñem, Yésu a nti hihéga hipe hi hi mpôdôl ndap lihaa, a nkal le: “Numbe muda, ibale a gwé jôm li drakma ndi a nimis drakma yada mu, a nkwiye bé lambe, a hiol ndap yé, a tibil yaga yéñ letee a léba yo? I ngéda a nléba yo, a nsébél mawanda mé ni bôt bé ba libôk, a kal le: ‘Kona maséé lôñni me inyule me nléba drakma yem me bi nimis.’”​—Lukas 15:8, 9.

Biniigana Yésu a mpémés bi yé nlélém ni bi a bi bôk a pémés mu hihéga hi nimlak ntômba. A nkal nano le: “Me nkal bé le hala nyen maséé ma yé ipôla biañgel bi Nyambe inyu mboñbéba wada nu a ntam bibéba gwé.”​—Lukas 15:10.

Hégda le jam lini: Biañgel bi Djob bi yé maséé ngéda baboñbéba ba ntémbna mbôô wap i pes i mbuu! Jam li nlôôha mahee li yé le, baboñbéba ba ba nhiel miñem nwap ba ga kôhna tel i Ane Djob i i nloo tel biañgel bi ngii! (1 Korintô 6:2, 3) Ndi to hala, biañgel bi nkil bé bo njôñ. Jon kii di nlama nôgda ngéda mboñbéba a nhiel ñem, a ntémb ni mbus i gwélél Djob?