Kɛ Zezi dí Ɲanmiɛn junman’n, blɛ sunman’n, ɔ kleli kɛ be wun ase kanlɛ’n ti cinnjin kpa. (Liki 14:8-11) Ɔ maan ɔ tuli i klun kunndɛli be nga be ti wun ase kanfuɛ’n mɔ be kunndɛ kɛ bé sú Ɲanmiɛn’n. Sanngɛ i sɔfuɛ’m be nun sunman be ti sa tɛ yofuɛ dan.

Farizifuɛ mun nin mmla klɛfuɛ’m be kpɔ sa tɛ yofuɛ sɔ mun. Kusu nn be yɛ be ba Zezi sin kɛ bé tíe i ndɛ’n niɔn. Kɛ Farizifuɛ mun nin mmla klɛfuɛ’m be wunnin i sɔ’n, ɔ yoli be tɛ naan b’a se kɛ: “Bian nga sɔ sa tɛ yofuɛ’m be nun, kpɛkun ɔ nin be di like.” (Liki 15:2) Farizifuɛ mun nin mmla klɛfuɛ’m be yo be wun dandan. Be waan be ja bo ndutre bɔbɔ’n ti kpa tra nvlefuɛ mun. I sɔ’n ti’n, be flɛ nvlefuɛ’m be kɛ amarɛti. I bo’n yɛle kɛ “asiɛ’n sufuɛ.” I sɔ’n kle kɛ nvlefuɛ’m be wun yo be tɛ.

Zezi liɛ’n, ɔ buli sran kwlakwla sran, ɔ sili sran’m be aunnvuɛ, kpɛkun ɔ yoli be ye. I sɔ’n ti yɛ be nga Zuifu’m be buman be sran’n, be sieli be su Zezi i nuan bo’n niɔn. Sran sɔ’m be nun wie’m be ti sa tɛ yofuɛ dan, sanngɛ Zezi ukali be. Kɛ Farizifuɛ mun nin mmla klɛfuɛ’m be wunnin i sɔ’n, ɔ yoli be ya. ?Sanngɛ ngue yɛ Zezi yoli-ɔ?

Zezi kannin ndɛ kun ɲanndra nun kleli Farizifuɛ nin mmla klɛfuɛ mun. W’a kan ndɛ sɔ’n le Kapɛɛnaɔmun lɔ. (Matie 18:12-14) Ndɛ sɔ’n nun’n, Zezi fali Farizifuɛ mun sunnzunnin bua mɔ be o Ɲanmiɛn i bua fa’n nun’n. Sa fi tɔman be su afin Ɲanmiɛn sasa be. Kpɛkun Zezi fali nvlefuɛ onga mun sunnzunnin bua mɔ b’a mlin’n. Ɔ seli kɛ:

“?Amun nun onin yɛ sɛ ɔ le bua ya (100) naan be nun kun mlin’n, ɔ su yaciman bua ablangwlan-nin-ngwlan (99) onga mun aawlɛ flɛnnɛn’n nun lɔ, ɔ su ko kunndɛman kun ng’ɔ mlinnin’n niɔn? Kɛ ɔ ko wun i’n, ɔ fɛ i bo i wati, kpɛkun ɔ di aklunjuɛ. Kɛ ɔ ju i awlo lɔ’n, ɔ flɛ i janvuɛ nin i tranfuɛ mun. Yɛ ɔ se be kɛ: ‘Amun nin min di aklunjuɛ. Afin n wunnin min bua ng’ɔ mlinnin’n.’”​—Liki 15:4-6.

?Zezi i ndɛ sɔ’n i bo’n yɛle benin? I bɔbɔ yiyili nun. Ɔ seli kɛ: “Ń kán klé amun kɛ i wafa kunngba’n, kɛ sa tɛ yofuɛ kun kaci i akunndan’n, be di aklunjuɛ ɲanmiɛn su lɔ. Aklunjuɛ sɔ’n i dan tra aklunjuɛ nga be di i sran kpa ablangwlan-nin-ngwlan (99) m’ɔ nunman nun kɛ be kaci be akunndan’n, be ti’n.”​—Liki 15:7.

Kɛ Zezi kannin akunndan kacilɛ’n i ndɛ’n, ɔ yoli Farizifuɛ’m be ya. Afin be se be wun kɛ be ti kpa tra sran onga mun. Ɔ maan ɔ nunman nun kɛ be kaci be akunndan nin be nzuɛn’n. Ndɛ nga be kan kleli Zezi i afuɛ kɔe nɲɔn yɛ’n, ɔ kle sɔ weiin. Blɛ sɔ nun’n, kɛ Zezi nin lapo defuɛ nin sa tɛ yofuɛ’m  be dili like’n, ɔ yoli Farizifuɛ’m be ya. Sanngɛ ɔ seli be kɛ: “M’an baman sɛsɛfuɛ’m be flɛlɛ. Sanngɛ sa tɛ yofuɛ mun yɛ n bali be flɛlɛ-ɔ.” (Marki 2:15-17) Farizifuɛ’m be buli be wun sɛsɛfuɛ. I sɔ’n ti’n, b’a bumɛn i kɛ ɔ ti cinnjin kɛ be kaci be nzuɛn’n. I sɔ’n ti’n, ɲanmiɛn su lɔfuɛ’m be klun w’a jɔman. Sa tɛ yofuɛ’m be liɛ’n, kɛ be kaci be nzuɛn’n, ɲanmiɛn su lɔfuɛ’m be di aklunjuɛ.

Zezi kannin ndɛ kun ekun ɲanndra nun. Ndɛ sɔ’n nun’n ɔ kleli ekun kɛ, kɛ sa tɛ yofuɛ’m be kaci be nzuɛn’n, ɲanmiɛn su lɔfuɛ’m be klun jɔ dan. Ɔ seli kɛ: “Sɛ bla kun le draki blu naan kun mlin’n, ɔ́ sɔ́ kannin, ɔ́ kúɛnkúɛn i sua’n nun kpɛkun ɔ́ kúnndɛ i kpa lele saan ɔ́ wún i. ?Nɛ́n i-ɔ? Yɛ kɛ ɔ ko wun i’n, ɔ flɛ i janvuɛ nin i tranfuɛ mun. Ɔ se be kɛ: ‘Amun nin min di aklunjuɛ. Afin n wunnin min draki ng’ɔ mlinnin’n.’”​—Liki 15:8, 9.

Ndɛ nga Zezi kɛnnin i icra’n lɛ’n ɔ nin bua ng’ɔ mlinnin’n i su ndɛ’n, be ti kun. I waan: “Ń kán klé amun kɛ i wafa kunngba’n, sa tɛ yofuɛ kunngba m’ɔ kaci i akunndan’n ti’n, Ɲanmiɛn i anzi’m be di aklunjuɛ.”​—Liki 15:10.

Ndɛ sɔ’n yo fɛ dan! Ɔ kle kɛ, kɛ sa tɛ yofuɛ’m be kaci be akunndan nin be nzuɛn’n, ɔ yo anzi’m be fɛ kpa. I sɔ’n yo ɲɛnmɛn dan. Afin sa tɛ yofuɛ nga be kaci sɔ’n, bé dí famiɛn ɲanmiɛn su lɔ. Yɛ bé ɲán ɲrun trá anzi mun bɔbɔ! (1 Korɛntifuɛ Mun 6:2, 3) Sanngɛ i sɔ’n yoman anzi’m be ya. ?Yɛ e li? ?Kɛ sa tɛ yofuɛ kun fɛ i wun man Ɲanmiɛn’n, ɔ fata kɛ i sɔ’n yo e sɛ?