E vakabibitaka vakalevu o Jisu ena nona cakacaka vakaitalatala na yalomalumalumu. (Luke 14:8-11) E gu na lomana me vukei ira na yalomalumalumu era via qarava na Kalou. De dua eso vei ira qori era se caka ca tiko ga.

Era dau beci ira qori na Farisi kei na vunivola, ia qo era raica nira sa taleitaki Jisu tiko kei na nona itukutuku. Era kudruvaka: “O ka qo e taleitaki ira ga na ivalavala ca, e kanavata kei ira.” (Luke 15:2) Era vakabauta na Farisi kei na vunivola nira uasivi ira eso tale ra qai vaka na soso na tauvanua. Na levu ni nodra veibeci na iliuliu, era vakatokai ira kina na tauvanua ena ivosavosa vakaIperiu na ʽam ha·ʼaʹrets, se “kawa ni qele.”

Ia o Jisu e dau veidokai, yalovinaka, e yalololoma tale ga. Era via rogoci koya kina e levu era yalomalumalumu, wili kina o ira era kilai nira ivalavala ca. Na cava e cakava o Jisu nira vakalewa eso nona dau vukei ira qori?

E vakamacalataka sara e dua na vosa vakatautauvata vakaciriloloma me vaka ga na kena a cavuta mai Kapenaumi. (Maciu 18:12-14) E nanumi ena ka e tukuna o Jisu nira yalododonu na Farisi qai taqomaki ira na Kalou, ia o ira na tauvanua e tukuni nira lakosese, era sa yali. E kaya o Jisu:

“O cei vei kemuni e 100 nona sipi, ke yali e dua, ena sega ni biuta tu mada mai veikau na 99 me vaqara na dua e yali me yacova ni kunea? Ia ni sa kunea, ena vakataqara i tabana ena levu ni nona marau. Ni yaco i vale, e kacivi ira vata mai na nona itokani kei ira na tiko voleka qai kaya vei ira, ‘Meda mai marau vata, niu sa kunea noqu sipi a yali.’”—Luke 15:4-6.

Sa qai tukuna o Jisu na ibalebale ni nona vosa vakatautauvata: “Au tukuna vei kemuni, ena va tale ga qori na levu ni marau mai lomalagi ni veivutuni e dua na ivalavala ca, ni vakatauvatani kei na 99 na yalododonu e sega ni gadrevi mera veivutuni.”—Luke 15:7.

Era rairai kurabuitaka na Farisi ni cavuta o Jisu na veivutuni, baleta era vakabauta nira yalododonu qai sega ni gadrevi mera veivutuni. Nira vakalewai Jisu eso na Farisi ena vica na yabaki yani e liu ni kanavata kei ira na daukumuni ivakacavacava kei na ivalavala ca, a tukuna: “Au sega ni lako mai meu kacivi ira na yalododonu, meu kacivi ira ga na valavala ca.” (Marika 2:15-17) E sega ni marautaki mai lomalagi na nodra sega ni vakadinata na Farisi viavia yalododonu ni dodonu mera veivutuni. Ia  e marautaki na nodra veivutuni dina na ivalavala ca.

Me vakabibitaka ni vakavu marau dina mai lomalagi nodra lesu mai na ivalavala ca era yali tu, e tukuna tale o Jisu e dua na vosa vakatautauvata me baleta na ituvaki e dau yaco e vale: “Se yalewa cava e tini nona drakema, ke yali e dua na drakema, ena sega ni waqaca nona cina qai taviraka nona vale me vaqara vinaka yacova ni sa kunea? Ia ni kunea, e kacivi ira vata mai nona itokani kei ira na tiko voleka, e kaya, ‘Meda mai marau vata, niu sa kunea na drakema au vakayalia.’”—Luke 15:8, 9.

Na kena ibalebale qori e tautauvata ga kei na ibalebale ni vosa vakatautauvata i Jisu me baleta na sipi e yali. E tukuna sara: “Au kaya vei kemuni, era na marau tale ga va qori na agilosi ni Kalou ni veivutuni e dua na tamata ivalavala ca.”—Luke 15:10.

Era kauai dina na agilosi ni Kalou ena nodra lesu mai na ivalavala ca era yali tu! E vakasakiti qori nira na cecere vei ira na agilosi na ivalavala ca era veivutuni ra qai vakadonui mera lewe ni Matanitu vakalomalagi ni Kalou. (1 Korinica 6:2, 3) Ia era sega ni bau vuvu na agilosi. Na cava meda cakava ke kerea na veivosoti ni Kalou e dua sa veivutunitaka dina nona valavala ca?