E kamataataa Iesu kakawakin te nanorinano n taai aika kakaokoro n ana tai ni mwakuri ni minita. (Ruka 14:8-11) E ingainga n ukeriia mwaane ma aine aika kan toro iroun te Atua ma te nanorinano. Mangkekei ni karokoa ngkai ao bon iai tabeman mai buakoia aika a bon ataaki bwa taani bure.

A noria Baritaio ma taani koroboki bwa aeka n aomata aikai, ake a iangoiia bwa a mangori, a boni katikaki nakon Iesu ao ana rongorongo. A ngurengure naakai ni kangai: “E butimwaeiia taani bure te aomata aei ma n amwamwarake ma ngaiia.” (Ruka 15:2) A kan rietata Baritaio ma taani koroboki ao a iangoiia aomata aika mangori bwa kaanga baareka i aani waeia. N iaiangoan aia riribai nakoia aeka n aomata aikai, a kabongana te taetae n Ebera ae ‛am ha·’aʹrets ae nanona, “kaain te aba [aonnaba]” taani kairiri aikai n arania iai.

Ni kaitaraan anne, e akoiia aomata ni kabane Iesu ao e nanoangaiia. A a bati aika mangori n ikotaki ma tabeman ake a ataaki bwa a kakaraoa ae bure ake a ingainga ni kan ongora iroun Iesu. Ma tera ngkanne ana namakin Iesu ao arona nakoni kabuakakaana ni buokaia aika mangori?

E rikirake ni mataata te kaeka ngke e taekina te kaikonaki ae ringa te nano n aron are e taekinna i Kaberenaum. (Mataio 18:12-14) E taekini bwaai Iesu n aron ae kaanga a raoiroi Baritaio ao ni mano raoi i buakon ana nanai te Atua. Ni kaitaraan anne, a taekinaki aomata aika mangori bwa kaanga te koraki ake a a tia n tiotionako ao ni bua. E taku Iesu:

“Antai i buakomi ae 100 ana tiibu, ao ngkana e bua temanna mai iai, ao tiaki e na kitania ake 99 n te rereua ao n nako ni kakaaea are e bua ni karokoa rekena? Ao ngke e a kunea, ao e aonnangaia ma te kimwareirei. Ao ngke e a roko ni mwengana ao e weteiia raoraona ma kaain rarikina, ao e kangai nakoia, ‘Kam na kimwareirei ma ngai, bwa I a kunea au tiibu are bua.’”​—Ruka 15:4-6.

Tera te reirei ae anga Iesu? E kabwarabwaraa ni kangai: “I tuangingkami bwa n aron naba anne, e na bati riki te kimwareirei i karawa ibukin te tia bure ae tii temanna ae raira nanona, nakon te kimwareirei ibukia ake 99 ake a raoiroi ake a aki kainnanoa te rairannano.”​—Ruka 15:7.

A bae n teke rarikia Baritaio ni mwanewean te rairannano iroun Iesu. A iangoiia i bon irouia bwa a raoiroi ao a iangoia bwa a aki riai n rairi nanoia. Ngke a kabuakakaa Iesu tabeman Baritaio tabeua te ririki n nako ibukina bwa e amwarake ma taan rikoa te taekiti ao taani bure, ao e kaekaia Iesu ni kangai: “I roko bwa N na weteiia taani bure ao tiaki akana raoiroi.” (Mareko 2:15-17) A kabwaka Baritaio aika baka n raoiroi n nora ae a riai n rairi nanoia ngaia are a aikoa kakimwareireiia kaaini karawa. Ma a kimwareirei kaaini karawa ngkana a rairi raoi nanoia taani bure.

Ibukini kamataataan reken te kimwareirei ae korakora i karawa n okia taani bure aika rairi nanoia, e a taekina ngkanne te kaikonaki teuana Iesu ae riki n te mwenga: “Tera aron te aine ae iai ana mwane ae tebwina te turakemwa, ae ngkana e bua teuana ana turakemwa, ao tiaki e na kauraa te taura ma n iaakina ana auti ao ni kakaaea raoi ni karokoa rekena? Ao ngke e a kunea, ao e weteiia raoraona ma kaain rarikina ao e kangai, ‘Kam na kimwareirei ma ngai, bwa I a kunea te turakemwa are I kabuaa.’”​—Ruka 15:8, 9.

Titeboo te reirei ae e kabwarabwaraa Iesu ma are e taekinna imwin ana kaikonaki ibukin te tiibu ae bua. E taku: “I tuangingkami bwa n aron naba anne, e na ueke te kimwareirei irouia ana anera te Atua ibukin te tia bure ae tii temanna ae raira nanona.”​—Ruka 15:10.

Iangoia bwa a boni kaota rotakia ana anera te Atua n okia taani bure ake a bua! E kakawaki anne ibukina bwa taani bure aika rairi nanoia ao n reke nneia n ana Tautaeka n Uea te Atua i karawa, a na bon reke nakoaia aika rietata riki nakoia anera! (1 I-Korinto 6:2, 3) Ao a bon aki bakantang iai anera. Tera ngkanne ae ti riai n namakinna ngkana e a okira te Atua te tia bure ao n raira nanona ni koaua?