Lebuh Jesus nginjil, iya udah beberapa kali madahka pemaruh ati nya amat penting. (Luke 14:8-11) Jesus keran ngiga orang ke nyembah Petara enggau baruh ati tang sekeda ari sida agi idup dalam dosa.

Orang ke bedosa rindu ngagai Jesus sereta ninga ajar iya. Tang orang Parisi enggau bala penulis Adat ngumbai sida nya enda layak. Ku sida mutap: “Orang tu nyambut orang ke bedosa lalu makai enggau sida.” (Luke 15:2) Orang Parisi enggau bala penulis Adat nya sumbung sereta ngumbai orang biasa nya baka debu di baruh kaki sida. Nya kebuah sida ngena rambai jaku Hebrew ʽam ha·ʼaʹrets ngemaruhka orang biasa. Tu nunjukka bala ketuai ngumbai sida enda nemu utai.

Enda baka sida, Jesus bebasa, manah ati sereta siru ngagai semua orang. Mayuh ari sida ke enda dikeibuhka, nyengkaum sida ke idup dalam dosa keran deka ninga Jesus. Nama asai ati sereta reaksi Jesus lebuh orang Parisi enggau bala penulis Adat bejaika iya, ketegal iya deka nulung orang ke baka nya?

Jesus madahka siti jaku sempama ti negu ati baka ke kala dipadah iya ba Kapernaum. (Matthew 18:12-14) Dalam jaku sempama nya, orang Parisi dikumbai orang ke lurus sereta bedus ti dijaga Petara. Tang orang ke enda dikeibuhka baka bedus ke tesat sereta lenyau.

Ku Jesus madah: “Enti sema siku ari bala kita bisi 100 iku bedus lalu siku bedus nya lenyau, endaka iya deka ninggalka 99 iku bedus ti bukai ba menua puang, lalu ngiga bedus ti lenyau nya nyentukka iya tetemuka bedus nya? Lebuh iya tetemuka bedus nya, iya amat gaga ati lalu ngesan bedus nya ba bau iya. Lebuh iya datai ba rumah, iya ngangauka bala kaban enggau orang ke diau beserimbai enggau iya lalu madah ngagai sida, ‘Aram sama gaga ati enggau aku laban aku udah tetemuka bedus aku ke lenyau.’”—Luke 15:4-6.

Jesus lalu nerangka reti sempama nya: “Aku madah ngagai kita: Baka nya mega, lebuh siku orang ke bedosa nesal ati, nya deka ngasuh semua ke ba serega lebih agi gaga ati enti dibandingka enggau pengaga ati sida ke 99 iku orang ke lurus ke enda ibuh nesal ati.”—Luke 15:7.

Orang Parisi tentu tekenyit ninga jaku Jesus pasal nesal ati. Sida ngumbai diri orang ke udah ngereja utai ti manah, nya kebuah sida enda ibuh nesal ati. Beberapa taun sebedau tu, sekeda ari sida kala ngutuk Jesus laban iya makai begulai enggau bala pengumpul chukai sereta  orang ke bedosa. Maya nya Jesus madah: “Aku datai ukai ketegal orang ke lurus, tang ketegal orang ke bedosa.” (Mark 2:15-17) Jehovah enggau bala melikat ba serega enda gaga ati meda orang Parisi enggai nesal ati. Tang sida gaga ati lebuh orang ke bedosa nesal ati.

Jesus madahka siti da agi jaku sempama ngambika ulih nerangka, baka ni orang ke nesal ati deka mai pengaga ati ba serega. Ku Jesus madah: “Enti sema siku indu bisi 10 singkap duit pirak lalu sesingkap ari duit nya lenyau, endaka iya deka nungkun lampu kelita, nyapu rumah iya lalu bebendar ngiga duit pirak nya nyentukka iya tetemuka duit nya? Lebuh iya tetemuka duit pirak nya, iya ngangauka bala kaban enggau orang ke diau beserimbai enggau iya lalu madah ngagai sida, ‘Aram gaga ati enggau aku laban aku udah tetemuka duit pirak aku ke lenyau.’”—Luke 15:8, 9.

Dua iti jaku sempama tu ngajar utai ti sama. Ku Jesus madah ba ujung jaku sempama nya: “Baka nya mega, aku madah ngagai kita: Bala melikat Petara deka balat gaga ati lebuh siku orang ke bedosa nesal ati.”—Luke 15:10.

Bala melikat amat gaga ati sereta ibuhka sesiku orang ke amat nesal ati! Iya ke amat, orang ke nesal ati ba jeman nya bisi peluang merintah ba Perintah serega, lalu deka bisi penuduk ti tinggi agi ari bala melikat! (1 Korint 6:2, 3) Taja pia, bala melikat enda kepapaska sida. Nya alai, nama runding ke patut dikembuan kitai lebuh orang ke bedosa nesal ati?