Peemhito da yoolokafana momukokomoko woukalele waye, Jesus okwa divilika nghee elininipiko la fimana. (Lukas 14:8-11) Okwa li a halelela okumona ovanhu ovo va hala okulongela Kalunga nelininipiko. Otashi dulika vamwe vomuvo va li natango hava nyono sha kwata moiti.

Ovafarisai novanongo vomishangwa ova li va didilika kutya oohandimwe, ovo va li va talika ko vongaho, ova nanenwa kuJesus nosho yo ketumwalaka laye. Ova li va ngongota va ti: “Omulumenhu ou okaume kovalunde noha li pamwe navo.” (Lukas 15:2) Ovafarisai novanongo vomishangwa ova li ve litala ko ve dule ovanhu vakwao nova li hava ungaunga nai navo. Opo va ulike kutya ova dina ovanhu va tya ngaho, ovawiliki ova longifa oshitya shOshiheberi amhaarets, osho tashi ti “ovakwadu.”

Mepingafano novawiliki ovo, Jesus oha ungaunga novanhu aveshe nefimaneko, nonghenda nosho yo nolukeno. Vahapu vomovalininipiki, mwa kwatelwa ovo va shiivikila oulunde, ova li va halelela okupwilikina kuJesus. Ndele mbela Jesus okwa li e udite ngahelipi nokwa li e linyenga ngahelipi eshi a li ta tokolwa omolwokukwafela ovanhu va tya ngaho?

Enyamukulo olo ola ka yela mo nawa eshi a yandja efaneko la faafana naalo a li a yandja muKapernaum. (Mateus 18:12-14) Jesus okwa li a fa ta ti Ovafarisai ovayuki nove li meameno laKalunga, ndele paulelalela okwa li ashike ta ningile mo. Mepingafano naasho, ovalininipiki ova li va talika ko va kana. Jesus okwa ti:

“Mbela olyelye womunye e na eedi 100, ngeenge pa kana imwe, ita fiye eedi 99 mombuwa ndele ta i a ka konge oyo ya kana fiyo ote i mono? Ndele ngeenge okwe i mono, ota kala a hafa note i humbata komapepe aye. Shimha e uya keumbo, ota ifana ookaume novashiinda shaye, ndele ta ti kuvo, ‘Tu hafeleni pamwe, osheshi odi yange oyo ya li ya kana onde i mona.’” — Lukas 15:4-6.

Jesus okwa li a honga oshilihongomwa shilipi? Okwa yelifa a ti: “Ohandi mu lombwele, ngeenge omulunde umwe e lidilulula, meulu namo ohamu kala ehafo linene li dule olo lokuhafela ovayuki 99 ovo inava pumbwa okulidilulula.” — Lukas 15:7.

Ovafarisai ova li va kumwa eshi Jesus a popya shi na sha nelidilululo. Ova li ve litala ko ve li ovayuki nova li tava diladila kutya inava pumbwa okulidilulula. Eshi vamwe va li va tokola Jesus oule womido da ya eshi a li ta li novafendelifi nosho yo novalunde, okwa li e va lombwela a  ti: “Ame inandi endela ovayuki, ndele ovalunde.” (Markus 2:15-17) Ovafarisai ovo va li ve lishii ouyuki ova li va dopa okumona kutya ova pumbwa okulidilulula, nokungaho kava li va hafifa Jehova nosho yo ovaengeli. Ashike meulu ohamu kala ehafo ngeenge omulunde e lidilulula.

Jesus okwa divilika oshitwa shaye kutya ngeenge omulunde e lidilulula meulu ohamu kala ehafo, eshi a yandja efaneko limwe vali, a ti: “Omukainhu olyelye oo e na oimaliwa oisilveri 10, ngeenge a kanifa po shimwe, ita tema olamba ndele ta kombo meumbo laye noku shi konga lelalela fiyo ote shi mono? Shimha e shi mono, ota ifana ookahewa novashiinda shaye, ndele ta ti, ‘Tu hafeleni pamwe, osheshi oshimaliwa shange osho sha li sha kana onde shi mona.’” — Lukas 15:8, 9.

Oshilihongomwa osho Jesus a honga osha faafana naasho shi li mefaneko lodi ya kana. Okwa ti: “Onghee ohandi mu lombwele, ovaengeli vaKalunga navo ohava kala va hafa ngeenge omulunde umwe e lidilulula.” — Lukas 15:10.

Ovaengeli vaKalunga ohava kala va hafa ngeenge ovalunde ve lidilulula. Osho oshinima shididilikwedi molwaashi ovalunde ovo ve lidilulula otava ka fyuulula Ouhamba waKalunga womeulu, notava ka kala ve na ondodo i dule yovaengeli. (1 Ovakorinto 6:2, 3) Ashike ovaengeli kave na ondubo noshinima osho. Ndele fye otu na okukala tu udite ngahelipi ngeenge omulunde okwe lidilulula nokwa alukila kuKalunga?