Pa bimye byavula bingi kimye kyo aingijilenga mwingilo wanji, Yesu waambile pa buneme bwa kwipelula. (Luka 14:8-11) Wakebele bingi kwisamba na banabalume ne banabakazhi bakebelenga kwingijila Lesa saka bepelula. Pano bino, bamo bo esambanga nabo baubanga bintu byatama bingi.

Bafaliseo ne banembeshi byo bamwene bano bantu bo balengulwile bingi baiya kwi Yesu na kuteleka ku byambo byo asapwijilenga, banyinyichilenga’mba: “Uno muntu utambwila bandengamambo ne kuja nabo.” (Luka 15:2) Bafaliseo ne banembeshi bemonanga’mba banema kukila bantu bakwabo kabiji bamonanga bano bantu nobe biko bya ku maulu abo. Kabiji baingijishanga kyambo kya Kihebelu kya ‛am ha·’aʹrets, ko kuba’mba “bantutu ba mu ntanda,” kumwesha’mba balengulwile bingi bantu ba uno mutundu.

Bino Yesu aye wibanemekele bingi, ne kwibobila lusa ne kifyele. Na mambo a kuba bino, bantu bavula bepelwile kuvwangakotu ne boba bayukanyikilwe’mba baubanga byatama, bakebeshe bingi kuteleka kwi Yesu. Pano Yesu waubilepo byepi pa byo bamulengulwilenga ku Bafaliseo na mambo a kukwasha bantu bo bamonanga’mba kechi banemene ne?

Yesu wibakumbwile kupichila mu kwibela kishimpi byonka byo aubile mu Kapenama. (Mateo 18:12-14) Waambile pa mulanguluko wa Bafaliseo, wa kwimona’mba baoloka ne kuba’mba bajinga mu kipaka kya Lesa. Bino waambile pa bantu bo balengulwile’mba basendukile kabiji balubijilemo. Yesu waambile’mba:

“Ñanyi mwi anweba uji na mikooko 100, umvwe umo waeleka ubula kusha yoya 99 mungye ne kuya na kukeba yewa waeleka kanatu wamutaana? Kabiji inge wamutaana, umusenda pa bipuzhi byanji ne kusangalala. Pa kufika ku nzubo, wita balunda nanji ne bakwabo mo bekela kinkalankulo ne kwibambila’mba, ‘Iyai tusangalele pamo, mambo nataana mukooko wami waelekele.’”—Luka 15:4-6.

Ñanyi kishinka Yesu kyo aambilengapo? Walumbulwile’mba: “Nemwambila namba, mukekala lusekelo lukatampe mwiulu pa mambo a ndengamambo umo walapila kukila bantu 99 baoloka babula kukebewa lulapilo.”—Luka 15:7.

Byambo Yesu byo aambijile Bafaliseo bya kuba’mba bafwainwe kulapila bibafichishe bingi ku muchima. Mambo bemonanga’mba baoloka ne kuba’mba kechi bakebewenga kulapila ne. Bamo byo balengulwile Yesu pa myaka ibiji yapichilepo na mambo a kuja na basonkeshi ne bandengamambo, wibambijile’mba: “Naishile na kwita bandengamambo kechi bantu baoloka ne.” (Mako 2:15-17) Bafaliseo bemonanga bene amba baoloka, kechi bakebanga kulapila  ne, kabiji kechi baletele lusekelo mwiulu ne. Bino aba bandengamambo balapijile baletele lusekelo mwiulu.

Pa kukosesha jibiji kishinka kya kuba’mba kubwezha bandengamambo balubijilemo kuleta lusekelo lukatampe, Yesu wibelele kishimpi kikwabo kyaambile pa bimweka pa nzubo amba: “Ñanyi mwanamukazhi uji na mali a muwayawaya jikumi a madilakima, umvwe waelapo jimo ubula kwambula lampi ne kupyanga mu nzubo yanji ne kukebesha kanatu wijitaana? Kabiji umvwe wijitaana, wita balunda nanji ne bakwabo mo bekela kinkalankulo ne kwamba’mba, ‘Iyai tusangalele pamo, mambo nataana jali ja muwayawaya ja dilakima jo naelele.’”—Luka 15:8, 9.

Yesu byo alumbulwile mwatajile kino kishimpi bipashishe na byo alumbulwile kishimpi kya mukooko walubijilemo. Waambile’mba: “Byonkabyo, nemwambila namba, bamalaika ba Lesa basekela bingi pa ndengamambo umo walapila.”—Luka 15:10.

Akifwanyikizhaitu, bamalaika ba Lesa batako bingi muchima ku kubwezha bandengamambo balubilamo! Kino kyanema bingi, mambo bandengamambo balapila bekala na lubiji mu Bufumu bwa Lesa mwiulu kabiji batambula bifulo bikatampe kukila bamalaika. (1 Kolinda 6:2, 3) Bino, bamalaika kechi boba kichima nangwa kuzhingila ne. Nga atweba twafwainwa kumvwa byepi inge ndengamambo walapila ne kubwela kwi Lesa?