Muna salu kiandi kia umbangi, Yesu nkumbu miayingi kalonganga vo lulembamu mfunu lwina. (Luka 14:8-11) Ozolele mona akala ye akento bena yo luzolo lwa sadila Nzambi yo lulembamu. Yamu wau, akaka muna yau bazayakene vo asumuki.

Afarisi ye asoneki wau bamwene vo o nkangu, i sia vo o wantu ana oyau bebadikilanga vo bakondwa o mfunu, bayantikidi landa Yesu yo yangalela malongi mandi, bayidimini, oku vo: “Muntu ndioyu otambulanga asumuki yo dia yau.” (Luka 15:2) Afarisi ye asoneki beyindulanga vo basundidi akaka, bediatidilanga nkangu yo kubabadikila nze mvindu a nsi a tambi yau. Muna toma kubaveza, basadilanga mvovo wa Kiyibere ‛am ha’arets, una ye nsasa vo, “wantu a mavata [ntoto].”

Nswaswani ye Afarisi, Yesu osonganga ngemba, zola ye nkenda kwa wantu awonso. Alembami ayingi ye awana bazayakene mu kuma kia mavangu mau ma sumu, bazolele wá malongi ma Yesu. Adieyi o Yesu kavangidi vava kavezelo kwa Ayuda wau kasadisi Alembami?

Yesu ubavene e mvutu muna sadila kingana kimosi kina e mfwanani ye kina katela nkangu kuna Kafanau. (Matai 18:12-14) Muna kingana kiaki, Yesu ovovele vo Afarisi bena nze wantu ansongi ye bakondwa tumbu vana ndose a Nzambi. Vo i wantu ana bevezuangwa, Yesu ubatezanese ye wantu bavididi e nzila ye bakondwa vuvu. Yesu ovovele vo:

“Nkia muntu vovo nwina, una ye 100 mameme, kavidis’e dimosi, kalembi sisa 99 vana nzanza, kenda vavi dina divididi yavana kesolola dio? Vava kasolwele dio, osidi dio vana vembo ye kiese kiawonso. Una kalueke kuna nzo, obokele akundi andi, y’esi belo kiandi, ubavovese vo, ‘Nunkembesa, kadi e meme diame diavila, nsolwele dio.’”—Luka 15:4-6.

Kia diambu o Yesu kalongele muna kingana kiaki? Yandi kibeni osasidi vo: “Inusamunwini vo, kiese kiayingi mpe kikala kuna zulu muna diambu dia nsumuki mosi ovilukidi o ntima, ke mu 99 lwa wantu ansongi ko ana ke bena yo mfunu a luviluku lwa ntima ko.”—Luka 15:7.

O Yesu wau kavovele luviluku lwa ntima, Afarisi bafungidi o makasi. Kadi bekwibadikilanga vo oyau wantu alunga, ke bafwana viluka ntima ko. Vava akaka muna yau baveza Yesu mu mvu miavioka wau kadila kumosi ye avakulwisi a mpaku ye asumuki, Yesu wabavutula vo: “Kizidi bokela ansongi ko, kansi asumuki.” (Maku 2:15-17) Wau vo Afarisi ana bena yo lulendo ke bazolele viluka ntima ko, ke betwasanga kiese kuna zulu ko. Kansi tu, kiese kikalanga kuna zulu avo nsumuki ovilukidi o ntima.

Yesu otele kingana kiankaka muna songa vo vava o nsumuki ke vilukanga o ntima kiese ditwasanga kuna zulu. Yesu ovovele dina divangamanga muna nzo, ovovele vo: “Nkia nkento una ye drakima kumi, avo ovidisi drakima imosi, kalembi kwika mini, kakomba nzo andi, katoma vava yavana kesolola yo? Vava kasolwele yo, obokele akundi andi, y’esi belo kiandi, oku vo, ‘Nunkembesa, kadi e drakima ina mvidisi, nsolwele yo.’”—Luka 15:8, 9.

Muna kingana kiaki Yesu ovene e longi dau adimosi ye dina kavana vava kata kingana kia meme diavila. Yesu ovovele vo: “Inusamunwini vo, kiese kia mpila yayi kikala vana vena mbasi za Nzambi, muna diambu dia nsumuki mosi ovilukidi o ntima.”—Luka 15:10.

Ekwe kiese mu zaya vo mbasi za Nzambi beyangalalanga vava o nsumuki kevilukanga o ntima! Ediadi diamfunu, kadi asumuki bevilukanga o ntima yo tambula e fulu muna Kintinu kia Nzambi kuna zulu. Ambasi ke bena ye lau diadi diampwena ko. (1 Korinto 6:2, 3) Kansi ke bemonanga kimpala ko. Oyeto mpe tufwete yangalalanga vava nsumuki kevilukanga o ntima yo vutuka kwa Nzambi.