Nyaka Yesu ne chak tije ne Nyasaye e piny, osebedo kopuonjo ji gimomiyo dwarore ni gibed joma obolore. (Luka 14:8-11) Doher yudo chwo gi mon ma gombo tiyo ne Nyasaye gi chuny mobolore. Nyaka chop sani, nyalo bedo ni moko kuomgi pod gin joricho sidang’.

Jo-Farisai gi jondiko fwenyo ni joma gikawo ka joma nono kamago, e ma puonj mag Yesu moro kendo e ma dhi ire. Omiyo, ging’ur niya: “Ng’atni rwako joricho kendo ochiemo kodgi.” (Luka 15:2) Jo-Farisai gi jondiko gin joma ng’awore kendo gikawo jomamoko kaka joma onge tich. Nikech jotend din-go ochayo joma kamago, giluongogi gi dho Hibrania ni ‛am ha·’aʹrets, tiende ni “jopiny.”

Yesu to en ng’at ma miyo ji duto luor, ong’won gi ji, kendo okechogi. Nikech mano, thoth joma ocha ma moko kuomgi ong’ere kaka joricho, gombo winjo puonj mag Yesu. Kata kamano, Yesu timo nade sama jomoko kwede nikech osebedo ka okonyo joma ocha kamano, to okawo okang’ mane?

Gima Yesu timo kod okang’ mokawo nenore maler sama otiyo gi ranyisi ma chalo gi ranyisi ma ne osetiyogo kane en Kapernaum. (Mathayo 18:12-14) E ranyisino, Yesu wuoyo kuom Jo-Farisai ka gima gin joma kare ma pod nie kund rombe Nyasaye. To joma ocha e ranyisino, iwuoyo kuomgi ka gima gin joma osebayo yo kendo moselal.

Yesu wacho kama: “En ng’a kuomu ma ka nigi rombe 100 to olalo achiel kuomgi, ok obi weyo 99 chien e thim, kae to odhi manyo achiel molalno nyaka chop oyude? To bang’ yude, okete e goke kendo obedo mamor. Eka bang’ chopo pacho, ochoko osiepene gi joma odak machiegni kode, kowachonegi niya: ‘Moruru koda, nimar aseyudo rombona ma nolal.’”​—Luka 15:4-6.

Yesu lero nade tiend puonj manie ranyisino? Olere kama: “Awachonu ni, kamano bende e kaka mor nomedre e polo kuom jaricho achiel moloko chunye a e richo, moloyo kuom joma kare 99 ma ok dwarre ni olok chunygi a e richo.”​—Luka 15:7.

Nyaka bed ni Jo-Farisai bwok ka Yesu mulo wach loko chuny a e richo. Nyalo bedo ni gibwok nikech pile gikawore kaka joma kare ma ok gine gimomiyo onego gilok chunygi gia e richo. Higni ma dirom ariyo motelo, moko kuomgi nokwedo Yesu nikech ne oyudo ochiemo gi josol osuru kod joricho. Nikech mano, Yesu nodwokogi kama: “Ne abiro luongo joricho, to ok  joma kare.” (Mariko 2:15-17) Jo-Farisai ma kawore ni gin joma kare e wang’gi giwegigo, ok ne gimomiyo dwarore ni gilok chunygi, kendo mano miyo mor ok bed e polo. Kata kamano, sama joricho oloko chunygi gadier mi giweyo richogi, mor mogundho bet e polo.

Yesu jiwo gimomiyo mor maduong’ betga e polo sama jaricho ma ne olal oduogo. Otiyo gi ranyisi machielo ma nyiso gima nyalo timore ne ng’ato e ode. Owacho kama: “Ere dhako ma ka nigi pes drakma apar to olalo achiel kuom drakmago, ok obi moko taya kendo yweyo ode ka omanye adimba nyaka chop oyude? Kendo bang’ yude, oluongo osiepene kod joma odak machiegni kode kowachonegi ni, ‘Moruru koda, nimar aseyudo pes drakma ma nolalna.’”​—Luka 15:8, 9.

Yo ma Yesu lerogo tiend ranyisino chiwo puonj ma chal gi manie ranyisi mar rombo ma ne olal. Koro owacho kama: “Kamano bende, awachonu ni, malaike mag Nyasaye bedo mamor kuom jaricho achiel moloko chunye oa e richo.”​—Luka 15:10.

Donge en gima iwuoro ni malaike mag Nyasaye bende mor ahinya sama jaricho molal oduogo? Ng’eyo mano ber sidang’ nikech joricho moloko chunygi gadier biro yudo pok e Pinyruodh Nyasaye e polo, kendo ginibed gi migawo maduong’ moloyo kata mana ma malaike nigo! (1 Jo-Korintho 6:2, 3) To e ma malaike ok bed gi nyiego. To kare mano nyiso ni onego wabed gi paro mane jaricho oloko chunye gadier mobiro ir Nyasaye?