A Zeezi goma sik-m-mengã yell naoor wʋsg a koe-moonegã sasa. (Luk 14:8-11) A rata ne a sũur fãa tɩ neb buud faa, pagb la rap sik b mens n tũ Wẽnnaam. La hal n tãag masã, tõe n tɩ sẽn tũud-b yẽ wã kẽer ra ket n yaa yel-wẽn-maandb meng-menga.

Fariizẽ-rãmbã ne tõog karen-saam-dãmbã ra nee yel-wẽn-maandb sẽn wat a Zeezi nengẽ, la b kelgd a koɛɛgã. B yaool n da pa nand nin-kãensa, n get-b wa neb sẽn ka barka. Rẽ n so tɩ b yẽgme, n yeele: “Rao-kãngã reegda yel-wẽn maandba la b rɩt ne-ba.” (Luk 15:2) Fariizẽ-rãmbã ne tõog karen-saam-dãmbã ra tagsdame tɩ bãmb yɩɩda b taabã, n da get neb a taabã wala tomã bãmb sẽn tabdã. B pʋd n boonda nin-kãens ne ebre buud-gomdã tɩ ‛am ha·’aʹrets sẽn dat n yeel tɩ “tẽng tom neba,” tɩ wilgdẽ tɩ b sɩd ra pa nand-b baa bilfu.

La a Zeezi yẽ ra nanda nebã fãa, n zoet-b nimbãaneg la a sõngd-ba. Naong rãmb wʋsgo, n paas neb kẽer sẽn da maand yel-wẽn-kãsems ra rata ne b sũy fãa n kelg a Zeezi. Nebã sẽn da sãbsd a Zeezi a sẽn sõngd nin-kãensã wã yĩngã, a leokame tɩ bõe?

A Zeezi wẽ-b-la yel-bũndi. A ra wẽe yel-bũnd a to sẽn wõnd yel-bũn-kãng a sẽn wa n be Kapɛrnawomã. (Matye 18:12-14) Yel-bũn a yiibã pʋgẽ, a maka Fariizẽ-rãmbã wa nin-tɩrs sẽn be Wẽnnaam bãgrã pʋgẽ tɩ bũmb pa tõe n maan-ba, tɩ neb nins b sẽn pa nandã yaa wa piis sẽn zãag ne bãgrã n meneme.

A Zeezi yeela woto: “Nin-bʋg n be yãmb sʋkã n na n tar piis koabga, t’a yembr meneme, t’a ka bas pis-wɛ la a wɛ wã weoogẽ wã n kẽng n tɩ gẽes peosg ning sẽn menem-a wã hal t’a yãnd-a? La yẽnda sã n yãnd-a, a na n palg-a-la a bagdẽ ne sũ-noogo. La yẽnda sã n lebg n ta yiri, a boonda a zo-rãmbã ne a yagsã a yir n yeel-b yaa: ‘Naag-y maam n maan sũ-noogo, bala, mam yãnda m peosgã sẽn dag n menemã.’”—Luk 15:4-6.

A Zeezi wilga yel-bũndã võore, n yeele: “Mam yeta yãmb tɩ sũ-noog na n zĩnda arzãn [“saasẽ,” MN] pʋgẽ, yel-wẽn maand a yembr sẽn tek yam n kos sugr yĩnga, n yɩɩd nin-tɩrs pis-wɛ la a wɛ sẽn ka baood sugr kosgã yĩnga.”—Luk 15:7.

A Zeezi sẽn gom tek yam n kos sugr yellã tog n sãama Fariizẽ-rãmbã sũyã. Bala b geta b mens wa nin-tɩrse, n tagsdẽ tɩ pa tɩlɛ tɩ b tek yam n kos sugr ye. Sẽn zems yʋʋmd woto, b kẽer da ninga a Zeezi taale, a sẽn da rɩt ne yaood dɛɛgdb la yel-wẽn-maandbã, t’a yeel-b woto: “Mam ka wa n na n bool nin-tɩrs ye, la yaa yel-wẽn maandbã.” (Mark 2:15-17) Fariizẽ-rãmbã ra pa ne tɩ b segd n teka yam ye. Dẽnd b ra pa kõt saasẽ dãmbã sũ-noog ye. La sũ-noog bee saasẽ, yel-wẽn-maand sã n sɩd tek yam n kos sugri.

Sẽn na yɩl n maneg n wilg tɩ yel-wẽn-maand sã n lebg n paam Wẽnnaam zoodo, sũ-no-kãseng sɩd bee saasẽ, a Zeezi leb n wẽe yel-bũnd a to. A yeelame: “Pʋg bʋg n na n tar ligd piiga, t’a yembr menem t’a ka yõgen fɩtla, n pɩɩs roogã la a gẽes-a neer hal n yãnd-a? La a sã n yãnd-a, a boonda a zo-rãmbã ne a yagsã a yir n yeel-b yaa: ‘Naag-y maam n maan sũ-noogo, bala, mam yãnda m lagfã sẽn dag n menemã.’”—Luk 15:8, 9.

A Zeezi wilga yel-bũn-kãngã me võore. A võorã ne pesg sẽn menemã yel-bũndã yaa a ye. A yeelame: “Woto me, mam yeta yãmb tɩ yel-wẽn maand a yembr sã n tek yam n kos sugri, sũ-noog na n zĩnda Wẽnnaam malegsã sʋka.”—Luk 15:10.

Tags-y n ges-y! Yel-wẽn-maand sã n lebg n paam Wẽnnaam zoodo, malɛgsã kɩdemda sũ-noogo. B getame tɩ sɩd yaa bõn-kãsenga, bala yel-wẽn-maand sã n tek yam, la a paam n na n naag Kirisã n dɩ naam saasẽ, a ziirã na n yɩɩga malɛgsã. (1 Korẽnt-rãmbã 6:2, 3) Baa ne rẽ, malɛgsã pa maand sũ-kiir ye. Tõnd me segd n kɩdma sũ-noogo, yel-wẽn-maand sã n tek yam n kos sugri.