Ovikando ovinyingi mokueenda kuovilinga viae viokuivisa, Sesusi wapopile unene esilivilo liokuliola omutima. (Luka 14:8-11) Ankho uhanda okuvasa ovalume novakai vahanda okuumbila Huku nomutima weliola. Alo pomuvo opo, tyafuile vamwe puvo nkhele ankho valinga ononkhali ononene.

Ova Faliseu novahoneki vovitumino avamono vana ankho vatala okuti vetupu esilivilo, vekahi nokutavela Sesusi, nonondaka mbae. Avati: “Omulume ou utambula nawa vokulinga ononkhali nokulia navo.” (Luka 15:2) Ova Faliseu novahoneki vovitumino ankho velitala okuti ovanene vali ku vakuavo iya ankho vatala ovanthu vahankhimanene ngatyina ombuma yo konomphai mbavo. Mokonda ankho vatomba ovanthu ovo, ononkhalamutwe mbonongeleya tyina vapopia konthele yavo vati ‘am ha·’aʹrets ondaka yo Hebeleu, ilekesa okuti “ovanthu veheke [lyo pohi]”.

Mahi Sesusi ankho una onthilo navo, nohole nokankhenda. Povanthu ovanyingi vahankhimanene, vamwe ankho ovokuiwe okuti valinga ononkhali, mahi vahanda okutehelela Sesusi. Oñgeni otyo tyakalesile Sesusi iya oityi alingile etyi vemupopia omapita mokonda yokukuatesako ovanthu ovo veliola omutima?

Ekumbululo limoneka nawa mongeleka imwe ihika komutima apopia, yelifwa na ina apopile mo Kafalanau. (Mateusi 18:12-14) Sesusi wapopia ova Faliseu ngatyina ovaviuki vekahi tyapama motyunda tya Huku. Iya ovanthu vokueliola omutima vapopiwa ngatyina vayapuka-mo, avavombo.

Sesusi wati: “Inkha umwe pu onwe una onongi 100, apavombo ike, kasi-po 99 moluhandya, akaovola ike yavomba alo eivasa? Iya tyina ameivasi uhambukwa, eipake potyipepe. Tyina ehika meumbo, wiihana omapanga ae, no vomunthele yae evepopila okuti: ‘Hambukwei na ame, mokonda ongi yange ankho yokuavomba neivasa.’” — Luka 15:4-6.

Oñgeni Sesusi ahangununa ongeleka oyo? Wati: “Ame ndyimupopila okuti, tyelifwa notyo, keulu makukala vali ehambu enene mokonda yomunthu wike wokulinga ononkhali welivela, tyipona ovaviuki 99 vehesukisa okulivela.” — Luka 15:7.

Etyi Sesusi apopia konthele yokulivela, tyafuile tyanumanesile ova Faliseu. Mokonda ankho velitala ngatyina ovaviuki iya vasoka okuti kavesukisile okulivela. Ankho palambale omanima evali, etyi vamwe puvo vapopile omapita Sesusi mokonda ankho ukahi nokulia novatanthi velilimu no vokulinga ononkhali. Sesusi wevekumbululile okuti: “Ame heilile ovaviuki, mahi naendela ovakuankhali.” (Maluku 2:15-17) Ova Faliseu ankho vasoka okuti kavesukisa okulivela mokonda ovaviuki-ale iya avahahambukiswa onoandyu keulu. Otyo tyelikalela na tyina ovanthu vokulinga ononkhali velivela nomutima auho.

Opo atoneke vali okuti tyina omunthu amalingi ononkhali elivele tyieta ehambu enene keulu, Sesusi apopi ongeleka onkhuavo konthele yetyi tyihole okumoneka momaumbo, ati: “Okuti pena omukai una onombongo ekwi mbovivela, tyina pamavombo ike, ahatemesa okandiyelo akombo mondyuo yae, aovola nawa alo eivasa? Iya tyina ameivasi, wihana omapanga ae, no vomunthele yae, ati: ‘Hambukwei na ame, mokonda ombongo yange ankho yavomba neivasa.’” — Luka 15:8, 9.

Onkhalelo Sesusi ahangununa yelifwa nonkhalelo apopia mongeleka yongi yavombele. Wati: “Tyelifwa notyo, ame ndyimupopila okuti, onoandyu mba Huku mbuhambukwa unene tyina omunthu umwe ulinga ononkhali amelivele.” — Luka 15:10.

Soka vala, onoandyu mba Huku mbuhanda unene ovanthu valinga ononkhali vakondoke ku Huku! Otyo tyihuvisa unene mokonda ovanthu vamwe velivela, vakala nekevelelo liokukatumina Mouhamba wa Huku keulu, avakala notyilinga otyinene vali tyipona tyo noandyu! (1 Ova Kolindu 6:2, 3) No ngotyo, onoandyu mbutupu onkhi. Ngotyo, oñgeni tuna okulitehelela tyina omunthu wokualinga ononkhali amelivele, akondoka ku Huku?