85 KAQ WILLAKÏ
Alläpa kushikïpaqmi juk jutsasapa arrepentikuptinqa
-
OQRAKASHQA ÜSHAPAQ Y OQRAKASHQA QELLËPAQ IGUALATSIKÏKUNA
-
CIËLUCHÖ ANGELKUNA KUSHIKUYAN
Sagrädu rurëninchöqa mëtsika kutim Jesusqa humildi këta yachatsikushqa karqan (Lücas 14:8-11). Shonqupita patsë Diosta sirwita munaqkunataqa, alläpam tarita munarqan. Itsachi wakinqa jutsasapa kayanqampita reqishqa kayarqan.
Fariseukunawan Ley qellqaqkunaqa Jesus yachatsikunqanta wiyakoq nunakunataqa mana kaqpaqmi churayaq. Tsëmi Jesuspaq kënö niyaq: “Kë nunaqa kushishqam jutsasapakunata chaskin, y pëkunawanmi mikun” (Lücas 15:2). Fariseukunawan Ley qellqaqkunaqa, precisaq tukurmi waktsa nunakunataqa patsachö jaluyanqan allpatanö rikäyaq. Tsënö despreciarmi ‛am ha’árets niyaq, tsë palabraqa hebreu idiömachömi y “allpa nunakuna” ninanmi.
Peru Jesusqa llapankunatam kuyëpa y respëtuwan trataq. Tsëmi waktsa nunakuna y hasta alläpa jutsasapa kayanqampita reqishqa nunakunapis, Jesustaqa wiyakïta munayaq. ¿Y Jesusqa ima nirqantaq tsënö parlayanqampaq?
Capernaumchö yachatsikur churanqan igualatsikïwannömi imata pensanqanta Jesusqa cläru rikätsikurqan (Mateu 18:12-14). Diospa kanchanchö karnin alli üshakunatawanmi fariseukunata igualatsirqan, y waktsa kaqkunatanam waqtsakashqa y oqrakashqa üshakunatawan igualatsirqan.
Kënömi entienditsikurqan: “¿Qamkunapita mëqan nunataq pachak (100) üshankunapita jukta oqrëkurqa isqun chunka isqun (99) kaqkunata tsunyaqchö jaqirintsu, y oqrakashqa kaqta tarinqanyaq asheq ëwantsu? Y tarïkurqa, matankanmanmi churarkun y alläpam kushikun. Y wayiman chärirqa, amïgunkunata y vecïnunkunatam qayatsin, y kënömi nin: ‘Noqawan alläpa kushikuyë, porqui oqrakashqa üshätam tariramurqö’” (Lücas 15:4-6).
¿Imatataq yachatsikïta munarqan? Kënömi nirqan: “Tsëmi qamkunata niyaq, jina tsënöllam arrepentikïta mana wanaq isqun chunka isqun (99) alli kaqta ruraqkunapaq kushikuyanqampitapis, ciëluchöqa mas kushikuyanqa juk jutsasapa arrepentikuptinqa” (Lücas 15:7).
Fariseukunaqa niyaq jutsannaq karnin arrepentikïta mana wanayanqantam, tsëmi arrepentikïpaq Jesusta parlaqta wiyarqa espantakuyarqan. Impuestu cobrakoqkunawan y jutsasapakunawan mikunqampita qepa watakunachö contran parlayaptinmi, “manam alli kaqta ruraqkunata qayaqtsu shamurqö, sinöqa jutsasapakunata qayaqmi” nishqa karqan (Marcus ). Arrepentikuyänan mana precisanqanta fariseukuna niyaptinmi, pëkunarëkurqa ciëluchö kushikuyantsu. Peru jutsasapakuna arrepentikuyaptinqa alläpam kushikuyan. 2:15-17
Juk jutsasapa arrepentikuptin ciëluchö alläpa kushikuyanqanta rikätsikunampaqmi, kë igualatsikïta churar kënö nirqan: “¿O mëqan warmitaq chunka dracma qellënimpita juk dracma qellëta oqrëkurqa chiwchinta sendirkur tarinqanyaq wayinta pitsar alleq ashintsu? Y tarïkurqa, amïgankunata y vecïnankunatam qayatsin, y kënömi nin: ‘Noqawan alläpa kushikuyë, porqui oqrakashqa dracma qellënïtam tarïkurqö’” (Lücas 15:8, 9).
Tsë igualatsikïpa yachatsikïninqa, oqrakashqa üshapaq parlaq igualatsikïpa yachatsikïninnöllam karqan, kënömi nirqan: “Jina niyaqmi, tsënöllam Diospa angelninkunapis alläpa kushikuyan juk jutsasapa arrepentikuptinqa” (Lücas 15:10).
Awmi, angelkunaqa alläpam munayan jutsasapakuna arrepentikuyänanta. Tsëqa alläpa espantakïpaqmi, porqui arrepentikoqkuna y Diospa Gobiernunta chaskeqkunaqa, angelkunapitapis mas precisaq carguyoqmi kayanqa (1 Corintius 6:2, 3). Tsënö kaptimpis, angelkunaqa manam piñakuyantsu. Tsëqa, ¿imanötaq sientikushwan pipis shonqupita patsë jutsampita arrepentikurnin Diosman kutiptinqa?