Askha kutipin Jesusqa k’umuykukuq kanamanta rimaran (Lucas 14:8-11). Payqa Diosta k’umuykukuywan serviy munaqkunatan maskharan. Chay runakunamanta wakinmi ichaqa juchasapamanta reqsisqa karanku.

Chhayna runakunawan Jesús juñukusqanraykun fariseokunawan kamachikuy simita yachachiqkunawanqa rimapakuranku: “Kay runaqa sumaqtan chaskin juchasapakunata, paykunawantaqmi mijunpas”, nispa (Lucas 15:2). Chay fariseokunaqa sinchitan pisichaqku chhayna común runakunata, sarusqanku allpata jinaraqmi paykunataqa qhawariqku. Chaymi paykunata hebreo rimaypi ‛am ha·’aʹrets niqku, chayqa “allpa runakuna” ninantan nin.

Jesusmi ichaqa respetowan khuyapayakuywan ima sumaqta chay runakunata qhawariq. Chaymi chay runakunaqa, juchasapamanta reqsisqakunapas allinta Jesusta uyariqku. ¿Imatan Jesús niran chay juchachaqninkunaman?

Juj ejemplotan willaran; chhayna ejemplotan Capernaum llaqtapi kashaspapas willaran (Mateo 18:12-14). Chay ejemplopin Jesusqa fariseokunamanta rimaran Diospa t’aqanpi allin ovejakunapas kankuman jinata. Común runakunamantan ichaqa rimaran chinkasqa ovejakunapas kankuman jinata.

Niranmi: “¿Mayqenniykichistaq pachaj ovejayoq kashaspa jujnin chinkaqtin, isqon chunka isqonniyoqta ch’inneqpi saqeykuspa, mana chay chinkasqa ovejata maskhaq rinmanchu tarimunankama? Tarispaqa much’un patapi apamuspan anchata kusikun. Wasinman chayaspataq amigonkunata wasimasinkunatawan juñuspa nin: ‘Noqawan kuska kusikuychis, chinkasqa ovejaytan tariramuni’”, nispa (Lucas 15:4-6).

Jinaspan Jesusqa niran: “Chhaynallataqmi janaq pachapipas aswan kusikuy kanqa juj juchasapaq pesapakusqanmanta, isqon chunka isqonniyoq allin runakunamantaqa, paykunaqa manañan necesitankuchu juchankumanta pesapakuyta”, nispa (Lucas 15:7).

Fariseokunaqa phiñakurankuchá pesapakuymanta Jesuspa rimasqanwan. Paykunaqa allin kausaq runapaqmi paykuna kikinkuta qhawarikuqku. Chaymi iskay wata ñaupaqta Jesusqa wakin fariseokunata niran: “Noqaqa manan allin kausaq runakunata wajaqchu jamuni, aswanpas juchasapakunata wajaqmi”, nispa (Marcos 2:15-17). Chay fariseokunaqa manataq ima juchankumantapas pesapakuqkuchu chayqa, manan janaq pachapi kaqkunata kusichiqkuchu.  Juchasapakunan ichaqa pesapakusqankuwan janaq pachapi kaqkunata kusichiqku.

Juchasapakunaq pesapakusqanwan ancha kusikuy kasqanta astawan rikuchinanpaqmi Jesusqa nillarantaq: “Pi warmipas chunka dracma qolqenmanta jujninta chinkachispaqa, ¿manachu mecherota jap’ichispa wasinta pichanman, jinaspa allinta maskhanman chay qolqeta tarinankama? Tarispaqa amigankunata wasimasinkunatawan juñuspan nin: ‘Noqawan kuska kusikuychis, chinkachisqay dracma qolqetan tariruni’”, nispa (Lucas 15:8, 9).

Jinaspan Jesusqa chinkasqa ovejamanta willasqanpi jina niran: “Chhaynallataqmi Diospa angelninkunapas anchata kusikunku juj juchasapaq pesapakusqanmanta”, nispa (Lucas 15:10).

Rikusqanchis jina, anchatan angelkunaqa kusikunku pipas Diosman kutirikuqtinqa. Chay kutirikuqkunamanta wakinqa janaq pachaman rispaqa angelkunamantapas aswan atiyniyoqmi kanqaku (1 Corintios 6:2, 3). Chaywanpas angelkunaqa manan paykunamanta envidiakunkuchu. Chhaynaqa, ¿manachu noqanchispas kusikunanchis pipas Diosman kutirikuqtin?