Misango ibungi mu mudimo waye, Yesu badi ashimika kasele pabitale muulo wa kwikala na kwiyisha. (Luka 14:8-11) Badi akumina kupeta balume na bakashi abakumiina kufubila Efile Mukulu na kwiyisha. Mpaa na binobino, bangi ba ku banka bakii bankitshishya’bubi.

Bafadisee na bafundji abamwene baba bantu bababadi abamono bu bebubi abefubwila peepi na Yesu bwa kumuteemesha. Abadi bedile shi: “Awa muntu apokyeela ba-sha milwisho, dingi adi nabo.” (Luka 15:2) Bafadisee na bafundji abadi abepusha bu be kunundu kwa bangi na kwibamona bu bantu bashi na muulo p’abo kwibamona bu nsenga ya muushy’angwa yaabo. Bwa kulesha dyadya eyikashi dyabo dya kumona bantu ku bisumanga abadi abafubisha kishima kya mu kiina Ebelu ‛am ha’a’rets, akileesha “bantu ba ku musoko [beena nsenga]” bwa kwibatundula.

Mu kwilekeena na byabya, Yesu badi aata bantu booso na kineemo na kwibakitshina myanda na kalolo na lusa. Bebungi ba ku bantu bashadile na bangi bababadi abauku bu bankitshishi ba bubi, nyi abadi abasangeela kuteemesha Yesu. Byabya, Yesu badya kupusha naminyi bwa bibabadi abamwipula shi kwete kukwasha baba bantu bashadile?

Lwaluulo alumweneka kalolo mu kileshesho akikumu ku mashimba ki mumune na kibadi mutushe kumpala mu Kapernaume. (Mateo 18:12-14) Mu kyakya kileshesho, Yesu abanga mwisambo nka bu akaanyisha Bafadisee shi mbalulame na bashii na mwanda kwi Efile Mukulu. Bantu bashadile nyi babalesha bu bashimine bashii na lukulupilo. Yesu bakwile shi:

“Naanyi aa kwanudi, aye e na mikooko lukama, su ashimisha umune, teekuleka ingi makumi kitema na kitema mu kabaka bwa kwenda mu kukimba ushimine, nyaa naa pakeumwena su? Aye mupwe kwiumona eeuteenteka pa mapampa aaye, aalukye kwaye, abungye bakuuku baye naa badi mwikungisheene nabo na kwibalungula shi: ‘Sangalaayi pamune naami mwanda naamono mukooko wande ubadi ushimine.’”—Luka 15:4-6.

Yesu batushishe dilongyesha kinyi? Apatuula shi: “Neenulungula’shi byabya nyi abikeekala muloo mwiyilu, bwa shaa-milwisho umune eelanga, bikile bwa balulame makumi kitema na kitema bashii na lukalo lwa kwaluluka.”—Luka 15:7.

Kwakula kwa Yesu pabitale kwilanga kubadi kufiitshishe Bafadisee munda. Abadi abeemono bu balulame bashii balombene kwikala na lukalo lwa kwilanga. Pabadi bangi ba kwabadi beepule Yesu takudi bipwa bibidi kunyima pa mwanda wa kudya pamune na bafutshishi ba bitadi na bankitshishi ba bubi, Yesu bebalungwile shi:  “Ntshi mufikye mu kwitamina beebuwa, anka ba-sha milwisho.” (Maako 2:15-17) Bafadisee abekimbila penda buwa bwabo abakutshilwe kumona lukalo lwabo lwa kwilanga, na takubadi muloo mwiyilu nya. Bibadi bilekene na nkitshishi a bubi beelanga kwishimba.

Bwa kunyingisha bibakwile shi kwilanga kwa sha milwisho akwikalaa muloo ukata mwiyilu, Yesu batushishe kingi kileshesho kitale mwanda ubadi ukitshikye mu nshibo pa kwakula shi: “Mukashi kinyi, paadi na nfwalanga ekumi, su ashimisha lumune, shii mulombeene kuteembesha elampi na kukoomba mu nshibo. Aye mwilusangule, abungu baloole baye na badi mwikungishene nabo, eebalungule shi ‘Sangalaayi pamune naami mwanda naasangula lufwalanga lunaadi mushimishe.’”—Luka 15:8, 9.

Yesu batushishe dilongyesha dii mumune na dibatushishe kunyima kwa kutusha kileshesho kya mukooko ushimine. Bambile shi: “Neenulungula’shi byabya ngi abikeekala muloo kwi mikeeyilu y’Efile Mukulu bwa sha-milwisho umune aaluluka.”—Luka 15:10.

Banda kunangushena muloo awikalaa nao miikeyilu y’Efile Mukulu apelanga sha milwisho umune kwishimba! Bino bi na muulo ukishekishe mwanda sha milwisho eelanga na kupeta mbalo mu Bufumu bw’Efile Mukulu bwa mwiyilu e na kineemo kikata kukila miikeyilu inabeene! (1 Beena-Kodinda 6:2, 3) Anka bamiikeyilu taabapushaa kyutu nya. Binobino, twi balonbeene kupusha naminyi su nkitshishi a bubi balukiila kwi Efile Mukulu pa kwilanga n’eshimba dimune?