Kanandi wachichita uteŵeti waki, Yesu walongonga kukhumbika kwakuja akujiyuyuwa. (Luka 14:8-11) Iyu wakhumbisiskanga kusaniya ŵanthu wo akhumbanga kuteŵete Chiuta mwakujiyuyuwa. Kweni kuzifika pa nyengu iyi, ŵanthu anyaki ŵenga ŵeche kuchita vinthu viheni.

Afarisi ndi alembi anguwona kuti ŵanthu akujiyuyuwa wo yiwu aŵawonanga kuti mbambula kukhumbika avwisiyanga uthenga waku Yesu. Mwaviyo, yiwu angukamba kuti: “Munthu uyu walonde ŵanthu akubuda kweniso waturya nawu.” (Luka 15:2) Afarisi ndi alembi ajiwonanga kuti mbapachanya ukongwa ndipu ŵanthu wo yiwu aŵawonanga kuti mbambula kuzirwa aŵawonanga nge fuvu la kumaphazi ngawu. Pakudana ŵanthu wo aŵawonanga kuti mbambula kuzirwa, alongozgi ŵenaŵa agwiriskiyanga ntchitu mazu nga Chiheberi ngakuti ‛am ha·’aʹrets ngo ngang’anamuwa kuti “ŵanthu acharu.” Yiwu achitanga ivi kuti alongo kuti awonanga ŵanthu ŵenaŵa kuti mbambula ntchitu.

Mwakupambana ndi alongozgi ŵenaŵa, Yesu wachitanga nawu vinthu mwalisungu kweniso wayanjanga ŵanthu wosi. Ŵanthu anandi wo aŵawonanga kuti mbambula kuzirwa kusazgapu wo ŵanthu aŵaziŵanga kuti achitanga maubudi akhumbisiskanga kuvwisiya vo Yesu wasambizanga. Kumbi Yesu wavwanga wuli asani ŵanthu anyaki atimunyoza chifukwa chakuti wawovyanga ŵanthu ŵenaŵa wo aŵawonanga kuti mbambula kuzirwa?

Kwamuka kwa fumbu lenili kusanirika muntharika yo iyu wangukamba yakuyanana ndi yo wangukambapu we ku Kaperenao. (Mateyu 18:12-14) Mu ntharika zosi ziŵi zo Yesu wangukamba, wanguyeruzgiya kuti Afarisi mbarunji ndipu mbakuvikilirika mukhola laku Chiuta. Kweni ŵanthu wo aŵawonanga kuti mbambula kuzirwa, wanguŵayeruzgiya ndi mbereri zo zalanda ndipu ze kwakuzija kumalu ngambula kuvikilirika. Yesu wangukamba kuti:

“Kumbi ndiyani waku yimwi yo asani wangaŵa ndi mbereri 100 ndipu yimoza yingasoŵa, wangatondeka kusiya zinyaki 99 muchipululu ndi kuchipenja yo yasoŵa mpaka po wayisaniriya? Asani wayisaniya, watiyinyamuwa pamaphewa ngaki ndipu wasekere. Ndipu asani wafika kunyumba, wadana abwezi ŵaki ndi anyaki ndipu watiŵakambiya kuti, ‘Tiyeni tikondwe limoza, chifukwa mbereri yangu yo yingusoŵa ndayisaniya.’”—Luka 15:4-6.

Kumbi Yesu wang’anamuwanganji pakukamba ntharika yeniyi? Iyu wangukamba kuti: “Mwakuyanana ŵaka, nditikukambiyani kuti kuchanya kwazamukuŵa likondwa likulu chifukwa cha munthu yumoza wakubuda yo walapa, kuluska ŵanthu arunji akujumpha 99 wo akhumbika kulapa cha.”—Luka 15:7.

Afarisi anguzizwa ukongwa Yesu wati wakamba nkhani ya kulapa. Yiwu ajiwonanga kuti mbarunji ndipu akhumbikanga cha kulapa. Vyaka vajumpha kuvuli, Afarisi anyaki angususka Yesu chifukwa chakuti waryanga limoza ndi ŵanthu akubuda kweniso wo asonkhesanga  msonkhu. Kweni Yesu wanguŵamuka kuti: “Ini ndikuza kuzidana arunji cha, kweni akubuda.” (Mariko 2:15-17) Afarisi ŵenaŵa wo ajiwonanga kuti mbarunji, angutondeka kuwona kuti nawu akhumbikanga kulapa ndipu venivi vinguzisa likondwa lelosi cha kuchanya. Kweni asani munthu yo wangubuda walapa, angelu akondwa ukongwa kuchanya.

Kuti wasimikiziyi fundu yakuti angelu akondwa ukongwa kuchanya asani munthu yo wangubuda walapa, Yesu wangukamba so ntharika yinyaki. Iyu wangukamba kuti: “Ndi munthukazi nuyu yo asani wangaŵa ndi madirakima, ndipu dirakima yimoza yingasoŵa, wangaleka kumbulika nyali, kupeyapeya munyumba mosi ndi kupenjesesa mpaka po wayisaniriya? Asani wayisaniya, wadana abwezi ŵaki ndi anyaki ndipu watiŵakambiya kuti, ‘Tiyeni tikondwe limoza, chifukwa dirakima yangu yo yingusoŵa ndayisaniya.’”—Luka 15:8, 9.

Vo Yesu wang’anamuwanga pa ntharika yeniyi, venga vakuyanana ndi vo wangukamba muntharika ya mbereri yo yingusoŵa. Iyu wangukamba kuti: “Mwakuyanana ŵaka, nditikukambiyani kuti angelu aku Chiuta akondwa ukongwa asani munthu yumoza wakubuda walapa.”—Luka 15:10.

Ŵanaŵaniyani fundu yakuti angelu aku Chiuta akondwa ukongwa asani ŵanthu wo angubuda alapa. Fundu yeniyi njakukondweska ukongwa chifukwa ŵanthu wo alapa ndi kusaniya mwaŵi wakusere mu Ufumu waku Chiuta, azamuja ndi udindu wapachanya kuluska wo angelu ŵenawu. (1 Akorinto 6:2, 3) Chinanga kuti ve viyo, angelu achita sanji cha. Kumbi isi titenere kuvwa wuli asani munthu yo wangubuda walapa ndi mtima wosi ndipu wawere kwaku Chiuta?