Lata akxni tsukulh lichuwinan Dios, Jesús makglhuwa masiyanit pi xlakaskinka nataktujukan (Lucas 14:8-11). Lu katekgsputun latamanin tiku taktujukgo chu skujniputunkgo Dios. Max makgapitsi umakgolh latamanin chuntiya kalilakgapaskan pi makglakgalhinanin.

Fariseos chu lakgtsokgkinanin akxilhkgo pi umakgolh latamanin, tiku xlakan lakpuwankgo pi nitu kalakgchan, lakgatikgo tuku Jesús kamasiyani. Wa xlakata wankgo: «Uma chixku xatapaxuwan kamakgamakglhtinankgo makglakgalhinanin, chu katawayan» (Lucas 15:2). Fariseos chu lakgtsokgkinanin tlakg xlakaskinka kamakgkatsikan chu kaliʼakxilhkgo latamanin xtachuna tiyat nema xlakan laktayakgo. Xlakata nalimasiyakgo pi kalakgmakgankgo umakgolh latamanin, xpulalinanin takanajla kalimapakuwikgo ʽam haʼárets, nema wamputun «latamanin xalak katiyatni».

Pero Jesús tlan kalikatsini chu kalakgalhaman umakgolh latamanin. Wa xlakata, lhuwa tiku nitu kgalhikgo, asta tiku kalilakgapaskan xlakata xtalakgalhinkan, kgaxmatniputunkgo Jesús. Pero ¿la kgalhtinan Jesús akxni nitlan lichuwinankan xlakata kamakgtaya?

Jesús liwana masiya tuku lakpuwan akxni wili tlan liʼakxilhtit, nema xtachuna liʼakxilhtit tuku maklakaskilh kCapernaúm (Mateo 18:12-14). Jesús katamalakxtumi fariseos la borregos nema makxtum wilakgo niku Dios kamakinit, chu tiku nitu kaliʼakxilhkan katamalakxtumi borregos nema alakatanu niku ankgonit chu tsankgakgonit.

Jesús wan: «Kalilakpuwantit chatum chixku tiku kgalhi akgtum ciento borregos, akxni makgatsankga tantum, ¿pi ni kamakgxtakga tatipuxamakunajatsa kxakaskakni tiyat chu an putsa asta tekgsa? Chu akxni tekgsa akglhtampixtawaka chu lu lipaxuwa. Chu akxni chan kxchik, kamamakxtumi xʼamigos chu xtalakatsunin, chu kawani: “Kakilatapaxuwaw, xlakata ktekgsli kiborrego nema xtsankganit”» (Lucas 15:4-6).

¿Tuku masiyaputun Jesús? Xla wan: «Kkawaniyan pi nachuna tlakg naʼanan tapaxuwan kʼakgapun akxni chatum tiku xtlawa talakgalhin makgxtakga tuku nitlan xtlawama, nixawa tatipuxamakunajatsa tiku ni tlawamakgolh talakgalhin» (Lucas 15:7).

Tuku Jesús wan xlakata nitlan limakgkatsikan talakgalhin max kaks kamalakawani fariseos, tiku lakpuwankgo pi xaʼakgstitum likatsikgo chu ni talakaskin namakgxtakgkgo xtalakgalhinkan. Titaxtunit akgtiy kata akxni makgapitsi fariseos nitlan lichuwinankgolh Jesús xlakata xkatawayan tiku matajinankgo lilakgaxokgon chu makgapitsi makglakgalhinanin, pero xla kawanilh: «Ni kmilh katasani  tiku xaʼakgstitum, wata wa tiku tlawakgo talakgalhin» (Marcos 2:15-17). Xlakata fariseos ni lakpuwankgo pi xlilat nitlan nalimakgkatsikgo xtalakgalhinkan, ni anan tapaxuwan kʼakgapun xpalakatakan. Pero anan tapaxuwan kʼakgapun akxni chatum makglakgalhina xlikana nitlan limakgkatsi tuku tlawanit.

Xlakata tlakg liwana namasiya pi anan tapaxuwan kʼakgapun akxni chatum makglakgalhina makgxtakga xtalakgalhin, Jesús lichuwinan atanu liʼakxilhtit, nema max chuna lay kʼakgtum chiki: «Chatum puskat tiku kgalhi akgkaw tumin xla dracma, komo makgatsankga akgtum dracma, ¿pi ni mapasi xmakgskgot chu kapalhnan kxchik chu liwana putsa asta tekgsa? Chu akxni tekgsa, kamamakxtumi xʼamigas chu xtalakatsunin, chu wan: “Kakilatapaxuwaw, xlakata ktekgsli dracma nema xakmakgatsankganit”» (Lucas 15:8, 9).

Tuku masiya Jesús xtachuna liʼakxilhtit xla borrego nema xtsankganit: «Kkawaniyan pi nachuna, xʼángeles Dios paxuwakgo akxni tiku xtlawa talakgalhin makgxtakga tuku nitlan xtlawama» (Lucas 15:10).

Chuna, ángeles lu lakaskinkgo pi makglakgalhinanin kamakgxtakgkgolh xtalakgalhinkan. Uma kaks malakawaninan, xlakata tiku namakgxtakgkgo xtalakgalhinkan chu namakgtapakgsikgo kTamapakgsin xalak akgapun, tlakg xlakaskinka nalitaxtukgo nixawa ángeles (1 Corintios 6:2, 3). Maski chuna, ángeles ni lakgsitsikgo uma. Wa xlakata, ¿la kilimakgkatsitkan akxni wi tiku makgxtakga xtalakgalhin chu lakgtaspita Dios?