I taimi kese‵kese i te faiga o tena galuega, ne faka‵mafa atu ne Iesu a te tāua o te loto maulalo. (Luka 14:8-11) Ne manako malosi a ia o ‵sala atu ki tāgata mo fāfine kolā e fia tavini atu ki te Atua mo te loto maulalo. Ke oko atu eiloa ki te taimi tenā, kāti koi fai eiloa a nisi o latou mo fai ne tino takutakua i te ma‵sei.

Ne lavea ne te kau Falesaio mo failautusi me i tino penā—ko tino kolā ne manatu fatauva latou ki ei—ko tosina atu ki a Iesu mo tena fekau. Ne fameo atu latou: “E talia ne te tagata tenei a tino agasala kae e ‵kai fakatasi foki mo latou.” (Luka 15:2) Ne fia ma‵luga a te kau Falesaio mo failautusi kae ne fai ne latou a tino ma‵lalo e pelā me ne kaiga. I te mafaufau atu ki te lotou takalia‵lia ki vaegā tino penā, ne fakaaoga ne takitaki a te tugapati faka-Epelu ko te ‛am ha·’aʹrets, ko “tino o te fenua [lalolagi],” ke fakasino atu ki a latou.

E ‵kese mai i ei, ne fakaasi atu ne Iesu ki tino katoa a te āva, te atafai, mo te loto alofa. E tokouke a tino ma‵lalo, e aofia foki i ei a nisi tino takutakua i te faiga o amioga ma‵sei, ne ma‵nako o fakalogo‵logo ki a Iesu. Ne a lagonaga o Iesu e uiga ki fameo a te kau Falesaio mō tena fesoasoani atu ki vaegā tino ma‵lalo penā, kae ne tali atu pefea a ia ki a latou?

Ne manino mai te tali i te taimi ne taku atu ei ne ia se tala fakatusa fakaotia loto, telā e tai ‵pau mo te tala ne taku atu ne ia i Kapanaumi. (Mataio 18:12-14) Ne fakamatala atu ne Iesu a mea konā i te auala telā e fai ei a te kau Falesaio e pelā me e amio‵tonu kae saogalēmū i te lulu mamoe a te Atua. E ‵kese mai i ei, ne fai a tino ma‵lalo e pelā me ne tino kolā ne takase‵se kae ‵galo atu. Ne fai mai a Iesu:

“Ko oi te tagata i a koutou e 100 ana mamoe, kafai e galo se mamoe e tasi, ka se tuku ne ia te 99 i te koga lavaki kae fano o ‵sala te mamoe telā ko galo ke oko ki te taimi e maua ei ne ia? Kafai ko maua ne ia, e amo ne ia te mamoe tenā ki tena tuauma mo te fiafia. Kae i te taimi e oko atu ei a ia ki tena fale, e ‵kami mai ne ia ana taugasoa mo ana tuakoi, kae fai atu ki a latou, ‘Ke fia‵fia fakatasi tatou me ko oti ne maua ne au taku mamoe telā ne galo.’”—Luka 15:4-6.

Se a te aoga o te tala telā ne fai atu ne Iesu? Ne fakamatala mai tou tagata: “Au e fai atu ki a koutou me ka penā foki te lasi o te fiafia e maua i te lagi māfai e salamō se tino agasala e tokotasi i lō te toko 99 o tino amio‵tonu kolā e se ‵tau o sala‵mo.”—Luka 15:7.

Kāti ne ‵poi masei a te kau Falesaio i pati a Iesu e uiga ki te salamō. Ne mafau‵fau latou me i a latou e amio‵tonu kae e se manakogina ke sala‵mō latou. I te taimi ne munasele atu ei a nisi tino o latou ki a Iesu i ne nai tausaga mai mua atu i ei ona ko tena ‵kai fakatasi mo tino ao lafoga mo tino agasala, ne  tali atu a ia: “Au ne vau o kalaga ki tino agasala kae e se ki tino amio‵tonu.” (Maleko 2:15-17) Ne fakata‵mala a te kau Falesaio o fakaasi atu te loto salamō, telā ne seki maua ei te fiafia i te lagi. Kae e ‵kese eiloa māfai ko salamō tonu se tino agasala.

Ke toe faka‵mafa faka‵lei atu a te manatu me i te faka‵fokimaiga o tino agasala kolā ne ‵galo se pogai o te fiafia lasi i te lagi, ne toe fakamatala atu ne Iesu a te suā tala fakatusa, se mea ne tupu i se fale: “Ko oi foki la se fafine e isi ne ana tupe siliva e sefulu, kafai e galo sena tupe siliva e tasi, e se faka‵ka ne ia se molī kae ‵teu tena fale kae salasala faka‵lei atu ki ei ke oko ki te taimi e maua ei ne ia? Kafai ko maua ne ia, e ‵kami ne ia ana taugasoa mo ana tuakoi, kae fai atu, ‘Ke fia‵fia fakatasi tatou me ko oti ne maua taku tupe siliva telā ne galo.’”—Luka 15:8, 9.

E tai ‵pau te aoga o te manatu ne fai ne Iesu i konei mo te mea telā ne taku mai ne ia mai tua o te fakaasiatuga ne ia o te tala fakatusa e uiga ki te mamoe telā ne galo. Ne fai atu nei a ia: “Au e fai atu ki a koutou, e penā foki te fiafia ka maua ne agelu a te Atua i se tino agasala e tokotasi ko salamō.”—Luka 15:10.

Mafaufau la ki te lasi o te fia‵fia o agelu a te Atua ki te ‵fokimaiga o tino agasala kolā ne ‵galo! E fakaofoofogia malosi eiloa te mea tenā, me i tino agasala kolā e sala‵mo kae maua se tulaga i te Malo faka-te-lagi o te Atua, ka maua ne latou se tulaga telā e maluga atu i te kau agelu! (1 Kolinito 6:2, 3) Kae e se loto ma‵sei a te kau agelu. E ‵tau la o pefea ‵tou lagonaga māfai ko ‵fuli atu se tino agasala ki te Atua mo te loto salamō tonu?