Ha iba-iba nga higayon durante han ministeryo ni Jesus, ginpabug-atan niya nga importante an pagpaubos. (Lucas 14:8-11) Karuyag gud niya mabilngan an kalalakin-an ngan kababayin-an nga mapainubsanon ngan naruruyag mag-alagad ha Dios. Tubtob hito nga panahon, an iba ha ira bangin kilala pa gihapon nga magpakasasala.

Naobserbaran han mga Pariseo ngan eskriba nga an sugad nga mga tawo nga gintatagad nira nga waray pulos, namamati kan Jesus ngan ha iya mensahe. Hira nagreklamo: “Gin-aabiabi hini nga tawo an magpakasasala ngan nakaon hiya upod nira.” (Lucas 15:2) Para ha mga Pariseo ngan eskriba, labaw hira ha iba ngan gintatagad nira an ordinaryo nga mga tawo sugad nga tapotapo ha ira mga tiil. Makikita an pagminos han mga lider ha sugad nga mga tawo pinaagi ha pagtawag ha ira nga ‛am ha·’aʹrets, an Hebreo nga pulong nga nangangahulogan hin “mga tawo han tuna.”

Ha kabaliktaran, may dignidad, pagkabuotan, ngan pagpaid an pagtratar ni Jesus ha ngatanan. Salit damu han mga ubos, pati na an iba nga kilala nga magpakasasala an naruruyag gud magpinamati ha iya. Pero, ano an reaksyon ni Jesus ha pakaraot ha iya han mga Pariseo tungod han iya pagbulig ha gintatagad nira nga mga ubos?

Nagin matin-aw an baton hito han nagsumat hi Jesus hin makapabantad nga ilustrasyon pariho han iya gin-unabi didto ha Capernaum. (Mateo 18:12-14) Igin-istorya niya ito ha paagi nga sugad hin an mga Pariseo matadong ngan talwas ha toril han Dios. Ha kabaliktaran, an ubos nga mga tawo amo an nagpapatlaag ngan nagkawawara.

Hi Jesus nagsiring: “Kon an bisan hin-o ha iyo nga may 100 nga karnero mawad-an hin usa, diri ba babayaan niya an 99 ha kamingawan ngan bibilngon ito tubtob nga hiagian? Ngan kon hiagian niya ito, papas-anon niya ito ngan maglilipay. Pag-uli niya, tatawagon niya an iya kasangkayan ngan mga amyaw ngan masiring ha ira, ‘Pagkalipay kita, kay hin-agian ko na an akon karnero nga nawara.’”—Lucas 15:4-6.

Ano an ginsiring ni Jesus nga aplikasyon hito? Hiya nagsaysay: “Susumatan ko kamo, mas daku an kalipay ha langit tungod ha usa nga makasasala nga nagbabasol kay ha 99 nga matadong nga diri kinahanglan magbasol.”—Lucas 15:7.

An pag-unabi ni Jesus mahitungod han pagbasol nakabantad unta ha mga Pariseo. Naghuhunahuna hira nga matadong hira ngan diri na kinahanglan magbasol. Han an iba ha ira nagsaway kan Jesus mga pipira ka tuig na an naglabay tungod kay kinaon hiya kaupod an mga parasukot hin buhis ngan magpakasasala, hiya nagsiring: “Kinanhi ako diri para ha magtadong, kondi para ha magpakasasala.” (Marcos 2:15-17) Waray masantop han nagpapakamatadong nga mga Pariseo nga kinahanglan nira magbasol, salit waray hira makahatag hin kalipay ha langit. Kabaliktaran hito an nahitatabo kon an magpakasasala tinuod nga nagbabasol.

Basi pabug-atan nga an pagbalik han nawara nga magpakasasala naghahatag hin daku nga kalipay ha langit, nagsaysay hi Jesus hin usa pa nga ilustrasyon, usa nga sitwasyon nga nahitatabo ha balay: “Kon an usa nga babaye nga may 10 ka drakma nga sinselyo mawad-an hin usa, diri ba magdadagkot hiya hin lampara ngan maninilhig ha balay ngan pamimilngon ito hin maopay tubtob nga hiagian? Ngan kon hiagian niya ito, tatawagon niya an iya kasangkayan nga kababayin-an ngan mga amyaw. Masiring hiya, ‘Pagkalipay kita, kay hin-agian ko na an akon drakma nga sinselyo nga nawara.’”—Lucas 15:8, 9.

An aplikasyon nga iginhatag ni Jesus pariho han aplikasyon nga iya ginhimo ha ilustrasyon mahitungod han nawara nga karnero. Hiya nagsiring: “Susumatan ko kamo, nagkakalipay an mga anghel han Dios tungod ha usa nga makasasala nga nagbabasol.”—Lucas 15:10.

Hunahunaa la, an mga anghel han Dios interesado gud nga mahibalik an nawara nga magpakasasala! Importante gud ito tungod kay an magpakasasala nga nagbasol ngan nakapanunod ha Ginhadian han Dios ha langit magkakaada hin mas hitaas nga katungdanan kay ha mga anghel! (1 Corinto 6:2, 3) Pero diri naaawa ha ira an mga anghel. Kon sugad, ano an aton sadang abaton kon an usa nga makasasala bumalik ha Dios ngan magbasol?