Jesuseʼ yaʼab u téenel tsʼoʼok u yaʼalik ka u yeʼes máak kabal óolal (Lucas 14:8-11). Letiʼeʼ u kʼáat u kaxt xiiboʼob yéetel koʼoleloʼob taak u meyajtikoʼob Dios yéetel kabal óolal. Tak beoraaʼ yaan tiʼ letiʼobeʼ jach ojéelaʼan ku beetkoʼob baʼaloʼob kʼaastak.

Le fariseoʼob yéetel le escribaʼoboʼ ku yilkoʼobeʼ ku náatsʼal yiknal Jesús tak le máaxoʼob beetik baʼaloʼob kʼaastakoʼ. Letiʼobeʼ tu yaʼaloʼob: «Le máakaʼ ku kʼamik yéetel kiʼimak óolal le j-kʼeban máakoʼoboʼ yéetel ku janal tu yéeteloʼob» (Lucas 15:2). Le fariseoʼob yéetel le escribaʼoboʼ ku taaskubaʼob nojbaʼalil, ku yilkoʼob u maasil bey jeʼex u luʼumil u yookoʼobeʼ. Ku meyajtiʼob le tʼaan hebreo amjárets, wa «u máakiloʼob luʼum [polvo]», ken tʼaanakoʼob tiʼ le máakoʼob beyoʼ.

Baʼaleʼ Jesuseʼ ku tratartikoʼob yéetel yaabilaj yéetel ku chʼaʼik óotsilil tiʼob. Yaʼab tiʼ le máaxoʼob kabal u yóoloʼob, táakaʼan tak le máaxoʼob beetik baʼaloʼob kʼaastakoʼ, ku náatsʼloʼob u yuʼuboʼob u kaʼansaj. ¿Bix tu yuʼubiluba Jesús yoʼolal le baʼaxoʼob ku yaʼalaʼal tu contra ikil u yáantik le máakoʼob beyoʼ?

Lelaʼ k-naʼatik yoʼolal junpʼéel kettʼaan tu yaʼalaj, chíikaʼan tiʼ le tu yaʼalaj juntéenjeakil tu luʼumil Capernaumoʼ (Mateo 18:12-14). Le bix úuchik u yaʼalik Jesusoʼ ku yeʼesik le fariseoʼoboʼ ku yuʼubikoʼob jach maʼalob baʼax ku beetkoʼob, baʼaleʼ le máaxoʼob kabal u yóoloʼoboʼ ku yuʼubikoʼob jach kʼebanoʼob yéetel náachchajaʼanoʼob tiʼ Dios.

Jesuseʼ tu yaʼalaj: «Wa juntúul ichileʼex yaan cien u túulul u yalakʼ taman, ku saʼatal juntúuleʼ, ¿maʼ wa tu pʼatik le noventinueve u túulal teʼ desierto utiaʼal ka xiʼik u kaxt le saatloʼ? Ken u kaxteʼ, ku kiʼimaktal u yóol yéetel ku naʼaksik tu keléembal. Tsʼoʼoleʼ ken kʼuchuk tu yotocheʼ, ku tʼanik u amigoʼob bey xan u vecinoʼobeʼ, ku yaʼaliktiʼob: ‹Kiʼimakchajak a wóoleʼex tin wéetel tumen tsʼoʼok in kaxtik le in walakʼ taman saatal kaʼachoʼ›» (Lucas 15:4-6).

¿Baʼax tu yóotaj u kaʼans Jesús yéetel le kettʼaanaʼ? Letiʼeʼ tu yaʼalaj: «Kin waʼalikteʼexeʼ maas yaan u yantal kiʼimak óolal teʼ kaʼan yoʼolal juntúul j-kʼeban máak ku kʼexik u tuukul ke yoʼolal noventinueve utsul máakoʼob maʼ kʼaʼabéet u kʼexik u tuukuloʼobiʼ» (Lucas 15:7).

Ka tu yaʼalaj Jesús unaj u arrepentir máakeʼ maʼ maʼalob uʼuyaʼabik tumen le fariseoʼoboʼ. Letiʼobeʼ ku tuklikoʼobeʼ jach maʼalob baʼax ku beetkoʼob, le oʼolal minaʼan baʼax oʼolal u arrepentiroʼob.  Kex dos años paachileʼ tu yaʼaloʼob baʼal tiʼ Jesús tumen ku janal yéetel le máaxoʼob cobrartik impuestoʼob bey xan yéetel le j-kʼeban máakoʼoboʼ, letiʼeʼ tu yaʼalajtiʼob: «Teneʼ maʼ taalen in tʼan máaxoʼob toj u kuxtaloʼobiʼ, baʼaxeʼ taalen in tʼan j-kʼeban máakoʼob» (Marcos 2:15-17). Le fariseoʼoboʼ ku tuklikoʼobeʼ jach maʼalob baʼaxoʼob ku beetkoʼob, le oʼolal minaʼan baʼax oʼolal u arrepentiroʼob, beyoʼ maʼ tu beetoʼob u yantal kiʼimak óolal teʼ kaʼanoʼ. Lelaʼ maʼ bey u yúuchul ken arrepentirnak tu jaajil u yóol le máaxoʼob beetik baʼax kʼaasoʼ.

Utiaʼal u maas eʼesik jach ku yantal kiʼimak óolal teʼ kaʼan ken arrepentirnak juntúul máax beetik baʼax kʼaasoʼ, tu yaʼalaj uláakʼ junpʼéel kettʼaan, lelaʼ ku tʼaan tiʼ junpʼéel baʼax ku yúuchul ichil u yotoch junpʼéel familia: «Wa juntúul koʼolel yaan diez u pʼéelal u taakʼinil dracma tiʼ, ku satik junpʼéeleʼ, ¿maʼ wa ku tʼabik junpʼéel lámpara, ku míistik u yotoch yéetel ku xakʼaltik tubeel tak ken u kaxte? Ken u kaxt túuneʼ, ku tʼanik u amigaʼob yéetel u vecinaʼob yéetel ku yaʼaliktiʼob: ‹Kiʼimakchajak a wóoleʼex tin wéetel tumen tsʼoʼok in kaxtik le junpʼéel u taakʼinil dracma tin sataj kaʼachoʼ›» (Lucas 15:8, 9).

Jeʼex tu kettʼaanil le taman saʼatoʼ, Jesuseʼ tu kaʼa aʼalaj: «Bey xan kin waʼalikteʼexeʼ, u angeloʼob Dioseʼ ku kiʼimaktal u yóoloʼob ken u kʼex u tuukul juntúul j-kʼeban máak» (Lucas 15:10).

Chéen máans ta tuukul, u angeloʼob Dioseʼ jach ku tsʼíiboltkoʼob ka arrepentirnak juntúul máax ku kʼebantal. Lelaʼ ku beetik k-tuukul, tumen wa ku arrepentir juntúul máax beetik baʼax kʼaas yéetel ku kʼaʼamal ichil le máaxoʼob kun binoʼob reinar tu Reino Diosoʼ yaan u tsʼaʼabal junpʼéel puesto tiʼob maas nojoch tiʼ le angeloʼoboʼ (1 Corintoiloʼob 6:2, 3). Kex beyoʼ letiʼobeʼ maʼ u pʼeekoʼobiʼ. Le oʼolaleʼ, ¿bix unaj k-uʼuyikba ken arrepentirnak juntúul máax beet baʼax kʼaas yéetel ken kʼaʼamak tu kaʼatéen tumen Dios?