Dede dxi bizulú Jesús cayuni xhiiñaʼ Dios, nabé huasietenaláʼdxibe binni guizáʼ risaca nga gácacaʼ humilde (Lucas 14:8-11). Nuube guidxélabe binni ni naca humilde ne ni nuu guni xhiiñaʼ Dios. Zándaca runibiáʼ binni laacabe casi pecador.

Bidii ca fariseu ne ca escriba cuenta nabé riuulaʼdxiʼ ca binni ni ruuyacabe laacaʼ casi pecador, gucaadiágacaʼ mensaje stiʼ Jesús. Ngue runi gudiche ruaacaʼ ne nacaʼ: «Riuulaʼdxiʼ hombre riʼ guidxaaga ca pecador ne goné laacabe» (Lucas 15:2). Cumu nabé raca cré ca fariseu ne ca escriba la? runi tratarcaʼ binni casi yú ni ruxhatañeecaʼ. Para gusihuinni ca líder stiʼ ca religión ribixhiláʼdxicaʼ ca binni riʼ, rábicaʼ laacabe ‛am haʼárets, diidxaʼ hebreu ni riníʼ «binni guidxilayú».

Peru maʼ gadxé si Jesús, purtiʼ runi tratar binni né respetu, nacháʼhuibe ne riabe laacaʼ. Pur nga, stale binni pobre, ne xcaadxi binni ni runibiáʼcabe pur ca pecadu stiʼ, nuucaʼ gucaadiágacaʼ Jesús. Peru ¿xi biʼniʼ Jesús ora binadiaga guiráʼ ni caníʼ ca fariseu ne ca escriba yaʼ?

Para gusihuinni xi riníʼ ique, gudixhe Jesús ti ejemplu nabé sicarú ni rusietenalaʼdxiʼ laanu ejemplu ni biquiiñebe Capernaúm (Mateo 18:12-14). Bichaaga Jesús ca fariseu casi dendxuʼ chaʼhuiʼ ni nuu lade ca dendxuʼ stiʼ Dios ne bichaagabe ca binni pecador casi dendxuʼ ni bireechú ne biniti.

Bisiene Jesús: «Pa ñapa tobi de laatu 100 dendxuʼ ne niniti tobi de laacame, ¿ñee cadi dxandíʼ nusaana 99 que lu desiertu ne niyubi ni biniti que dede ra nidxela laame la? Ne ora nidxela laame, nudxiibaʼ laame xayanni ne ñuu nayecheʼ. Ne ora nindá ra lidxi, nuseendacaa ca xhamigu ne ca vecinu stiʼ ne ñabi laacabe: “¡Laguiechené naa, purtiʼ maʼ bidxelaʼ dendxuhuiiniʼ stinneʼ ni biniti que!”» (Lucas 15:4-6).

¿Xi nuu Jesús gusiidiʼ? Laabe guniʼbe: «Zacaca nga laani, jma ziuu guendanayecheʼ guibáʼ ora gaca arrepentir ti pecador que pur 99 binni runi ni jneza ni cadi caquiiñeʼ gaca arrepentir» (Lucas 15:7).

Zándaca bidxagayaa ca fariseu ora binadiágacaʼ ejemplu gudixhe Jesús riʼ, purtiʼ nacaʼ nacháʼhuicaʼ ne cadi caquiiñeʼ gaca arrepentircaʼ. Caadxi iza ante, gúdxicabe Jesús cadi jneza nga goné ca ni runi cobrar impuestu ne ca pecador, óraque bicabi Jesús laacabe: «Cadi zedayubeʼ binni nachaʼhuiʼ, sínuque binni pecador»  (Marcos 2:15-17). Cumu ná ca fariseu cadi naquiiñeʼ gaca arrepentircaʼ la? guirutiʼ riecheʼ guibáʼ pur laacaʼ. Peru riuu guendanayecheʼ guibáʼ ora raca arrepentir ti pecador de guidubi ladxidóʼ.

Para gusiene chaahuiʼ Jesús pabiáʼ riuu guendanayecheʼ guibáʼ ora raca arrepentir ti pecador, gudíxhebe sti ejemplu ni zándaca huazaacanu ra lídxinu: «Pa ñapa ti gunaa chii moneda de dracma, ne nuniti tobi de laani, ¿ñee cadi nucaaguí ti lámpara ne nunduubaʼ ndaaniʼ lidxi ne nuyubi chaahuiʼ ni dede ra nidxela ni la? Ne ora nidxela ni, nuseendacaa ca xhamiga ne ca vecina stiʼ ne ñabi laacabe: “¡Laguiechené naa, purtiʼ maʼ bidxelaʼ moneda de dracma ni biniteʼ que!”» (Lucas 15:8, 9).

Ngue ca si nga ni nuu Jesús gusiidiʼ né guiropaʼ ejemplu ni bizeeteʼ: «Zacaca nga laani, riecheʼ ca ángel stiʼ Dios ora gaca arrepentir ti pecador» (Lucas 15:10).

Dxandíʼ peʼ racalaʼdxiʼ ca ángel gaca arrepentir ca binni pecador. Nabé risaca ndiʼ, purtiʼ ca ni gaca arrepentir ne guiuu ndaaniʼ Reinu stiʼ Dios ni nuu guibáʼ la? jma zasaca caʼ que ca ángel (1 Corintios 6:2, 3). Neca zacá qué rapa ca ángel ca envidia laacabe. Yanna, ¿ximodo naquiiñeʼ guni sentirnu ora gaca arrepentir ti pecador de guidubi ladxidóʼ ne guibiguetaʼ ra nuu Dios yaʼ?